LUKA 5 - Embimbiliya - Bíblia Sagrada em Umbundu

¹ Osimbu omanu vo lisindiliya oku yeva ondaka ya Suku, eye wa kala kohulo yociva ca Genesarete.

² Kuenje kohulo yociva wa mola awato avali, vakuakupipa vaco puãi va tundamo, kuenje va kala loku sukula awanda avo.

³ Yu wa wila vowato umue okuti wa Simono, kuenje wo pinga oku u seyisa naito kongongo. Oco Yesu wa tumala vowato kuenje wa longisa owiñi.

⁴ Eci a mala oku longisa oco wa popia la Simono hati, U seyisila apa pa longa. Lowisi awanda ene oku kuata olosi.

⁵ Simono wa kumbulula hati, A cime cange, uteke wosi tua likavisa ño, lacimue tua kuata, puãi londaka yove ndowisa awanda.

⁶ Oku ci linga va kuata ocitundo ca lua colosi. Kuenje omo awanda avo a soka oku tepa,

⁷ oco va payula vakuavo vowato ukuavo okuti veya oku va kuatisa. Oku iya va yukisa awato avali toke a sokele oku vomba.

⁸ Puãi Simono Petulu, oku ci mola, wa kekama kolongolo kovaso a Yesu, kuenje hati, A Ñala, nunde, momo ndukuakandu.

⁹ Momo ndaño eye, ndaño ava va kala kumue laye, vosi va komoha ocitundo colosi va kuata.

¹⁰ Tiago la Yoano, omãla va Sebedeo, haivo vakuekuta lia Simono, va ci komohavo. Yesu wa popia la Simono hati, Ku ka yokoke. Tunde opo o linga enyanga liomanu.

¹¹ Eci veya kongongo lawato avo, va sia ovina viosi kuenje vo kuama.

¹² Eci a kala vimbo limue kueya umue we yuka ovilundu. Eci a mola Yesu oco wa lituvika posi kuenje wo pinga, hati, A Ñala, nda o ci panga, o tẽla oku ñayisa.

¹³ Oco Yesu, oku olõla okuokuo kuaye, wo lamba, hati, Nda panga, kaya. Haico ovilundu vio tunda.

¹⁴ Kuenje wo handeleka hati, Ku ka ci sapuile omunu, puãi kuende, ka lilekise kocitunda, kuenje lumbila uvangi woku yelisua kuove ndeci Mose a handeleka.

¹⁵ Puãi oluhimo luaye lua sandoka vali enene, kuenje owiñi wakahandangala wa liongoluila oku u yeva loku sakuiwa ovovei avo.

¹⁶ Eye puãi wa litepa lowiñi, wa enda kekalasoko oku ka likutilila.

¹⁷ Oco eteke limue, osimbu a kala loku longisa, va Fariseo lalongisi vovihandeleko va tunda kovaimbo osi o ko Galilea lo ko Yudea lo ko Yerusalãi va tumala ocipepi laye. Kuenje unene wa Yehova woku sakula wa kala laye.

¹⁸ Kuenje alume vamue va ambatela vociyalo omunu umue wa fa ovolu, kuenje va seteka oku u wiñisa loku u langeka kovaso a Yesu.

¹⁹ Puãi ka va sangele ndomo vo wiñisa, momo omanu va lua, oco va londa kilu lionjo yu vo pitisa pokati kateya. Vo lowisa lociyalo caye pokati komanu toke a pitila kovaso a Yesu.

²⁰ Eci Yesu a mola ekolelo liavo, wa popia hati, Amunu, akandu ove a ecelua.

²¹ Oco vakuavisonehua la va Fariseo va fetika oku ñuñula vati, Helie u o popia ndeti etonãi? Helie o tẽla oku ecela akandu, nda ha Sukuko lika?

²² Eci Yesu a limbuka ndeci va kala loku lipula pokati oco wa va kumbulula, hati, Nye vu patãlẽla vovitima viene?

²³ Ca lelukapo oku ci popia ci pi, Akandu ove a ecelua, ale, ele oku popia siti, Votoka, enda?

²⁴ Puãi oku vu limbukisa okuti Mõlomanu o kasi lomoko yoku ecela akandu kilu lieve,— wa popia lu wa fa ovolu hati,— Mopia love siti, Votoka. Tikula ula wove. Kuende konjo yove.

²⁵ Haico a votokela kovaso avo, kuenje oku tikula ociyalo a pekelele, wa enda konjo yaye loku tumbangiya Suku.

²⁶ Vosi va komoha kuenje va tumbangiya Suku, yu ve yuka usumba vati, Etaili tua mola ovikomo.

²⁷ Kovaso yovina evi Yesu wa tunda kuenje wa mola umue ukuakutambula elisimu, onduko yaye Lewi, wa tumala powombo. Yu wa popia laye hati, Ñuame.

²⁸ Kuenje oku votoka wa sia cosi, wo kuama.

²⁹ Kuenje Lewi wo lingila ofesta yinene vonjo yaye. Mua kala owiñi wa lua wa vakuakutambula elisimu lomanu vakuavo va tumala komesa kumue lavo.

³⁰ Kuenje va Fariseo la vakuavisonehua vavo va mumuila olondonge viaye vati, Nye vu lila loku nyuila kumue la vakuakutambula elisimu lolondingakandu?

³¹ Kuenje Yesu wa va kumbulula hati, Ava va vela ovo va posokela ondotolo, ava va ñuai havoko.

³² Sieyilile oku kovongela vakuesunga koku likekembela akandu, te vakuakandu.

³³ Kuenje va popia laye vati, Olondonge via Yoano vi likandangaiya okulia, kuenda vi likutalaila, haicovo olondonge via va Fariseo, viove puãi vi lia lia loku nyua.

³⁴ Kuenje Yesu wa popia lavo hati, Vu tẽla oku pangisa vakuasandombua okuti va likandangiya okulia osimbu sandombua a kasi lavo kumue?

³⁵ Kuiya oloneke eci sandombua a vopiwa, oco va likandangiya okulia voloneke viaco.

³⁶ Kuenje eye wa va tela olusapo hati, Lomue o towila uwalo wokaliye ocitetele ha ci tongela emañe kuwalo wa kuka. Nda o ci linga, o tola uwalo wokaliye, kuenda ocitetele ci tunda kuwalo wokaliye ka ci soki luwalo wale.

³⁷ Kuenda vali lomue o longela ovinyu viokaliye volonjeke viovipa via kuka. Nda o ci linga ovinyu viokaliye vi tuiya olonjeke kuenje vi peseka, kuenda olonjeke viaco vi nyõleha.

³⁸ Puãi ovinyu viokaliye vi longelua volonjeke viovipa viokaliye.

³⁹ Kuenje lomue, eci a nyua ovinyu viale, o yongola vali viokaliye, momo o linga hati, Viale ovio viwa.