LUKA 3 - Embimbiliya - Bíblia Sagrada em Umbundu

¹ Kunyamo wekui latãlo wokuviala kua Kaisare Tibério, eci Pondiu Pilato a kala onguluvulu yo ko Yudea, haico Herode a viala ko Galilea, kuenda manjaye Filipu wa viala kolofeka vio ki Iturea lo ho Trakoniti, kuenda Lusanio wa viala ha Avilene,

² koloneke viutunda wovitunda vinene, Anasi la Kayafa, oco ondaka ya Suku yeya ku Yoano, omõla a Sakariya, eci a kala vekalasoko.

³ Oco wa pita vofeka yosi yi lisungue la Yordão oku kunda ondaka yepapatiso li lekisa oku likekembela akandu, kuenda oku ecelua.

⁴ Ndeci ca sonehiwa velivulu liolondaka viuprofeto Isaya, citi, Ondaka yukuakuvilikiya vekalasoko, yiti, Peli elila lia Yehova. Suñamisi olonjila viaye.

⁵ Ovimbota vi vembikiwa. Oviwulu viosi kuenda olomunda vi tapika, levi via penga vi penguluka, kuenda akungu a linga atapi,

⁶ kuenje omanu vosi va mola epopelo lia Suku.

⁷ Oco eye wa popia lowiñi womanu va tunda oku papatisiwa laye, hati, Ambuto yolonyoha, helie wo lunguli oku tila onyeño yiya?

⁸ Imi apako a sungulukila oku likekembela akandu. Ko ka fetiki oku likunda hoti, Tu kuete kukululu Avirahama, momo mopia lene siti, Suku o tẽla oku pindula ovawe a ha a lingi omãla va Avirahama.

⁹ Momo cilo muẽle ondiaviti yi kasi ale kolombombo vioviti, kuenje oviti ka vimi apako awa vi timbuiwa loku imbiwa vondalu.

¹⁰ Kuenje omanu vo pula, vati, Oco hẽ, tu linga nye?

¹¹ Yu wa va kumbulula hati, U o kuete ovikutu vivali a liamuile lu ka kuete, lu o kasi lokulia haico a linga.

¹² Vakuakutambula elisimu veyavo oku papatisiwa, kuenje vo pula vati, Olongisi, etu hẽ, tu linga nye?

¹³ Yu wa popia lavo hati, Ko ka yukinyi, tambuli puãi eci co tukuilui.

¹⁴ Kuenda asualali vo pulavo vati, Etu hẽ, tu linga nye? Eye wa va kumbulula, hati, Ko ka pundi komanu, ko ka lundili, tẽli lofeto yene.

¹⁵ Omo omanu va kala loku lavoka, lomo omanu vosi va sokoluila Yoano vovitima viavo, nda hẽ eye o Mesiya nda ndati,

¹⁶ oco Yoano wa kumbulula vosi, hati, Ame ndu papatisi lovava, puãi kuiya u wa mbelapo okuti ame ndi sule, ame si sesamela oku itula olonjita violohaku viaye. Eye u papatisi le Espiritu Sandu kuenda ondalu.

¹⁷ Ocipekulo caye ci kasi peka liaye oku yelisa pe ocisaselo caye loku unguila otiliku vosila, ovisaikiti viaco puãi o vi yoka londalu ka yimi.

¹⁸ Oco wa kundila omanu ondaka yiwa lalungulo akuavo aiñi aiñi.

¹⁹ Puãi ombiali Herode, u wa lemeliwa ale la Yoano mekonda lioku kuela Herodiya, ukãi wa manjaye, lovina viosi vĩvi a linga,

²⁰ cilo kovina viaco viosi, wa vokiyako vali oku yika Yoano vokayike.

²¹ Eci omanu vosi va papatisiwa, leci Yesu a papatisiwavo yu wa kala loku likutilila, oco ilu lia yuluka.

²² Kuenje Espiritu Sandu lio wila letimba ndopomba, kuenda ondaka ya tunda kilu, yiti, Ove Vumõlange wa soliwa, nda ku sanjukila.

²³ Kuenje Yesu eci a fetika oku longisa, wa tẽla akui atatu kanyamo. Eye omõla a Yosefe, ndeci va soka, omõla a Heli,

²⁴ omõla a Matata, omõla a Lewi, omõla a Meleki, omõla a Yanai, omõla a Yosefe,

²⁵ omõla a Matatiya, omõla a Amosi, omõla a Nahumi, omõla a Eselei, omõla a Nagai,

²⁶ omõla a Mata, omõla a Matatiya, omõla a Semeni, omõla a Yosefe, omõla a Yoda,

²⁷ omõla a Yoanano, omõla a Resa, omõla a Seruvavele, omõla a Salatiele, omõla a Neri,

²⁸ omõla a Meleke, omõla a Andi, omõla a Kosama, omõla a Elimadame, omõla a Ere,

²⁹ omõla a Yesu, omõla a Elesere, omõla a Yorimi, omõla a Matata, omõla a Lewi,

³⁰ omõla a Sumone, omõla a Yuda, omõla a Yosefe, omõla a Yonama, omõla a Eliakimi,

³¹ omõla a Melea, omõla a Mena, omõla a Matata, omõla a Natana, omõla a Daviti,

³² omõla a Yese, omõla a Ovete, omõla a Boase, omõla a Sala, omõla a Nasone,

³³ omõla a Aminadava, omõla a Adimini, omõla a Arneyi, omõla a Hesironi, omõla a Peresi, omõla a Yuda,

³⁴ omõla a Yakoba, omõla a Isake, omõla a Avirahama, omõla a Terahi, omõla a Nahore,

³⁵ omõla a Seruki, omõla a Reu, omõla a Peleke, omõla a Evere, omõla a Sela,

³⁶ omõla a Kainana, omõla a Aliufasiate, omõla a Seme, omõla a Noa, omõla a Lameke,

³⁷ omõla a Metusale, omõla a Enoke, omõla a Yarete, omõla a Mahalaleli, omõla a Kainana,

³⁸ omõla a Enosi, omõla a Seti, omõla a Adama, omõla a Suku.