LUKA 24 - Embimbiliya - Bíblia Sagrada em Umbundu

¹ Puãi keteke liatete kosimanu, eci kua ca omele, vambata onguendu ya pongiyiwa kuenje va enda keleva.

² Yu va sanga ewe liaco lia tiñuluhako keleva.

³ Puãi, eci va iñilamo, ka va sangelemo etimba lia Ñala Yesu.

⁴ Osimbu va ci lisokaila oco tala, alume vavali va wala uwalo u nina, va tãi ocipepi lavo.

⁵ Kuenje osimbu akãi va lisalukako loku petamela posi, oco alume vaco va popia lavo vati, Nye vu sandela u o kasi lomuenyo pokati ka vakualufa? Mulo kemo, wa pinduka.

⁶ Ivaluki ndeci a popele lene osimbu a kala handi ko Galilea,

⁷ hati, Mõlomanu o pakuiwa povaka omanu vakuakandu, o valeliwa kekulusu, kuenda keteke liatatu o pinduka.

⁸ Kuenje va ivaluka olondaka viaye,

⁹ yu va tunda keleva, kuenje va tiukila oku ka sapuila olondonge ekui lamosi la vakuavo ovina evi viosi.

¹⁰ Ava va sapuila ovapostolo ovina evi, vava, Maria u Magadala, la Yoana, kuenda Maria ina ya Tiago, kuenda akãi vakuavo va kala lavo.

¹¹ Puãi, kovapostolo, olondaka evi via va lingila esanda, ka va vi kolelele.

¹² Petulu puãi Wa votoka, wa lupukila keleva, kuenje, oku petama, wa lengelelamo, yu wa mola olonjambo viaco lika liavio. Oku tundako wa enda konjo, wa komoha eci ca lingiwa.

¹³ Eteke liaco hailio vavali vavo va kala loku enda kimbo limue, onduko yalio Emausi. Upãla waco wa soka ekui liolo-kilometro lo ko Yerusalãi.

¹⁴ Kuenje va kala loku vangula ovina viosi via lingiwa.

¹⁵ Osimbu va kala loku vangula loku likumbolola, Yesu eye muẽle wa kokela ocipepi kuenje wa endela kumue lavo.

¹⁶ Puãi ovaso avo a sitikiwa okuti ka vo limbukile.

¹⁷ Oco, eye wa va pula hati, Ondaka ye vu kasi oku enda loku vangula? Va talama loku nyumala.

¹⁸ Umue, onduko yaye Kelopa, wo kumbulula hati, Pokati kakombe va kasi vo Yerusalãi, ove lika nga kua kũlihile ovina via lingiwamo oloneke vilo?

¹⁹ Oco wa va pula, hati, Ovina vie? Vo kumbulula vati, Ovina via Yesu u Nasara, wa kala uprofeto unene kovilinga kuenda kolondaka, kovaso a Suku, lo kovaso omanu vosi,

²⁰ levi viovitunda vinene lakulu vetu, okuti vo pakula ha vo pisila okufa, kuenje vo valela kekulusu.

²¹ Etu puãi tua lavokaile okuti eye u o laika oku yovola Isareli. Kuenda vali, etaili eteke liatatu apa ovina evi via lingiwila.

²² Kuenda vali, vamue vakuetu, akãi, va tu saluisa. Va limelehelele keleva,

²³ kuenje ka va sangele ocivimbi caco. Oco va tiuka kuenje va tu sapuila vati, Tua mola owima wovangelo va linga vati, O kasi lomuenyo.

²⁴ Kuenje vamue va kala letu va endele keleva, yu va ci sanga ndeci akãi va popia. Eye puãi ka vo muile.

²⁵ Kuenje eye wa popia lavo hati, Wakuanumbi, kuenda wakuepõi liutima lioku kolela olondaka viosi via popia ovaprofeto.

²⁶ Ka ca sesamelele hẽ, okuti Kristu o tala ohali eyi okuti noke iñila vulamba waye.

²⁷ Eye wa va lomboluila ovisonehua viosi via tiamela kokuaye, loku fetika levi via Mose kuenda evi viovaprofeto vosi.

²⁸ Va kokela kimbo oko va lunga. Eye wa linga ndu o pitahala,

²⁹ ovo puãi vo lipilikila vati, Lala letu, momo ekumbi lia enda ale, ndopo ku tekava. Oco wa iñila oku lala lavo.

³⁰ Eci a tumala kumue lavo komesa, oco wa nyañula ombolo kuenje wa yi panduila. Eci a yi timbula wa yeca kokuavo.

³¹ Oco ovaso avo a situluka, vo limbuka, yu wa senguluka kovaso avo.

³² Yu va livangula pokati vati, Ovitima vietu ka via tokotele hẽ osimbu a vangula letu vonjila, cina a tu situluila ovisonehua?

³³ Oco va votoka kola yaco muẽle, kuenje va tiukila ko Yerusalãi, yu va sanga ekui liaco lamosi va liongoluila kumue lava va kala lavo,

³⁴ haivo va popia vati, Ñala wa pinduka muẽle, yu wa moleha ku Simono.

³⁵ Oco Kelopa lukuavo va lombolola cosi ca pita vonjila, lomo vo limbukila poku timbula ombolo.

³⁶ Osimbu va kala loku popia ovina evi, Yesu yu o tãi pokati kavo. Wa popia lavo hati, Ombembua yi kale lene.

³⁷ Puãi va lisalukako kuenda va kala lusumba. Va soka vati, Ocilũlu.

³⁸ Oco eye wa popia lavo hati, Wa yokokeli nye? Nye wa litãtãlãili vovitima viene?

³⁹ Tali ovoko ange lolomãi viange okuti ame muẽle. Ndambi oco vu tale, momo ocilũlu ka ci kasi lositu lakepa ndeci vu lete okuti ñasi lao.

⁴⁰ Kuenje eci a kala loku ci popia, wa va lekisa ovoko aye lolomãi viaye.

⁴¹ Osimbu ka va ci kolelele omo va kala lonjolela kuenda va komoha, eye wa va pula hati, Vu kuete kamue kokulia?

⁴² Oco vo wiha ocinimbu colusi lua yuyiwa.

⁴³ Kuenje wa ci tambula, wa ci lila kovaso avo.

⁴⁴ Yu wa popia lavo hati, Evi ovio olondaka viange nda popele lene, cina nda kala kumue lene, okuti ovina viosi via sonehelua ame vovihandeleko via Mose lovaprofeto lolosamo vi lingiwa.

⁴⁵ Oco wa situlula ovitima viavo okuti va limbuka ovisonehua

⁴⁶ Yu wa popia lavo hati, Ca sonehiwa ndoco citi, Kristu o tala ohali kuenda eteke liatatu o pinduka ku vakuavilangu,

⁴⁷ citivo okulikekembela akandu kuenda okuecelua ku kundilua vonduko yaye kolofeka viosi oku fetikila ko Yerusalãi.

⁴⁸ Ene vulombangi viovina evi.

⁴⁹ Kuenje ndu tumisi ohuminyo ya Tate, puãi kali vimbo toke wa walisiwi lunene wokilu.

⁵⁰ Yu wa enda lavo toke ko Betánia. Oco wa tulika ovoko aye kuenje wa va sumũlũisa.

⁵¹ Oco, eci a kala loku va sumũlũisa eye wa litepa lavo, kuenje wa yeluiwa kilu.

⁵² Yu vo fendela, kuenje va tiukila ko Yerusalãi lonjolela ya lua.

⁵³ Va tongeka ño-o oku sivaya Suku vonembele.