LUKA 23 - Embimbiliya - Bíblia Sagrada em Umbundu

¹ Oco onjango yosi ya katuka kuenje yo tuala ku Pilato.

² Va fetika oku u pindika, vati, Tua sanga undeti, wa tatamisa ofeka yetu, kuenje wa tutuiya oku feta elisimu ku Kaisare, hati, Ame Kristu, haime Soma.

³ Oco Pilato wo pula hati, Vusoma ya va Yudea ale? Yesu wo kumbulula hati, Ove wa ci popia.

⁴ Kuenje Pilato wa popia lovitunda vinene lowiñi hati, Ulume u sio sangele leko.

⁵ Puãi va toñomala vali vati, O tutomainya omanu loku longisa vo Yudea yosi. Wa fetikila ko Galilea toke kulo.

⁶ Eci Pilato a ci yeva, wa pula hati, Ulume u u Galilea ale?

⁷ Oco, eci a limbuka okuti wa tiamela kuviali wa Herode, wo tuma kokuaye momo wa kala vo Yerusalãi oloneke viaco.

⁸ Eci Herode a mola Yesu, wa sanjuka ca lua, omo osimbu a yonguile oku u mola, momo wo yevela ovina via lua, kuenje wa lavoka oku mola ocilimbu cimue ci lingiwa laye.

⁹ Oco wo pula olondaka via lua, puãi Yesu ko kumbuluile cimue.

¹⁰ Ovitunda vinene la vakuavisonehua haiko va kala, va lipilika loku u pindika.

¹¹ Oco Herode lasualali vaye vo fukilisa loku u fuanguila. Vo walisa onanga yi ñañala kuenje vo tiuwiya ku Pilato.

¹² Eteke liaco Herode la Pilato va linala pokati, momo ale va likuatelele ukuse.

¹³ Oco Pilato wa pañinya ovitunda vinene lakulu kuenda omanu.

¹⁴ Wa popia lavo hati, Wa neneli omunu u, hoti, O tatamisa ofeka. Ame ndo pulila kovaso ene lutate. Cilo ndu sapuili okuti kolondaka viosi wo pindiki lavio sia sangeleko eko.

¹⁵ Ndaño Herode haico, momo wo tiuwiya kokuetu. Mopia siti, Ka lingile cimue ca sesamela okufa.

¹⁶ Oco ndu tiapula kuenje ndu weca.

¹⁷ Kua kala ocihandeleko cokuti kofesta yo Pascoa va kutuluila omanu omandekua yimue.

¹⁸ Puãi va vilikiyila vosi pamosi, vati, Undeti wipa. Tu kutuluile Baraba.

¹⁹ Baraba eye omandekua yimue ya imbiwile vokayike, omo ya linga usuanji vo Yerusalãi, kuenda ya ponda omunu.

²⁰ Kuenje Pilato wa popia lavo onjanja yavali, momo wa yongola oku eca Yesu.

²¹ Omanu puãi va vilikiya vati, U valela kekulusu. U valela kekulusu.

²² Onjanja yatatu wa popia lavo, hati, Momo nye? Caco cĩvĩ a linga nye? Sio sangele leko li sesamela okufa. Oco ndu tiapula ño kuenje ndu weca.

²³ Puãi va toñomãla, loku vilikiya lolukandi, vati, A valeliwe kekulusu. Kuenje olondaka viavo via yula.

²⁴ Oco Pilato wa teta onimbu, hati, Ndeci vu yongola ci lingiwe.

²⁵ Oco wa va kutuluila una wa imbilua vokayike usuanji lumondi, eye vo pinga. Puãi Yesu wo weca kocipango cavo.

²⁶ Kuenje eci va enda laye, va kuata umue Simono u Kurene, wa tunda kovapia Vo tuika ekulusu oku li ambata loku kuama Yesu.

²⁷ Owiñi wa lua womanu wo kuama Vowiñi mua kala akãi va lila ca lua loku sinumula.

²⁸ Puãi Yesu, oku pukukila kakãi, wa popia hati, Amãla va Yerusalãi, ko ka ndili ame, puãi lilili ene muẽle loku lila omãla vene.

²⁹ Momo ndu sapuili okuti kuiya oloneke eci va popia vati, Olosiũle ovio via sumũlũha, lovaimo ka a citile kuenda avele ka a nyamiwile.

³⁰ Eci viya, omanu va fetika oku popia lolomunda vati, Tu leñuhĩli, kuenda lovivulu vati, Tu tuviki

³¹ Momo, nda va linga ovina evi luti u talala, va linga nye luti wa kukuta?

³² Kuenje kua kala vali vakuavo vavali va ambatiwa ha va pondiwila kumue laye, ovo olondingaĩvi.

³³ Eci veya kusenge wa tukuiwa Ekõlokõlo oco vo valela kekulusu. Olondingaĩvi viaco va vi valela, yimue kondio yaye, yikuavo kepili.

³⁴ Kuenje Yesu wa popia hati, A Tate, va ecela, momo eci va kasi loku linga ka va ci. Va lianjela uwalo waye pokati kavo oku u limbaila ocela.

³⁵ Kuenje omanu va talama oku vanja, akulu puãi vo sevuisa vati, Wa popela vakuavo, a lipopele eye muẽle nda eye ombuavekua ya Suku, haeye Mesiya wa noliwa laye.

³⁶ Asualali lavovo vo fuanguila. Oku iya kokuaye va seteka oku u nyuisa ovindangele,

³⁷ vati, Nda ove Soma ya va Yudea, lipopela.

³⁸ Kilu liaye kua kala ocisonehua citi, U, Soma ya va Yudea.

³⁹ Yimue kolondingaĩvi via nyoñamisua, yo popia etonãi yiti, Haveko Mesiya? Lipopela ove muẽle, tu popelevo etu.

⁴⁰ Puãi ukuavo, oku u lemela, wa kumbulula hati, Anga, ku sumbi ndaño Suku, momo eye love eyambulo liene limosi?

⁴¹ Puãi lietu liesunga, momo tua sanga eyambulo lia sesamela ovilinga vietu. Omunu u puãi ka lingile cimue cĩvi.

⁴² Kuenje wa popia la Yesu hati, Eci wiñila vusoma wove, njivaluke.

⁴³ Yesu wo kumbulula hati, Hu sapuila ocili okuti etaili o kala kumue lame vofeka ya Suku.

⁴⁴ Eci ca soka ndola yepandu, kuenje kueya owelema kofeka yosi toke kola yecea.

⁴⁵ Ekumbi lia fa kuenda ongumbo yonembele ya toka pokati.

⁴⁶ Yesu wa vilikiya londaka yinene hati, A Tate, ñundika omuenyo wange povaka ove. Oco, eci a popia olondaka evi, wa tula omuenyo.

⁴⁷ Eci kesongo a mola ovina via lingiwa, wa tumbangiya Suku hati, Ocili omunu u, ukuesunga.

⁴⁸ Kuenje owiñi wosi wava va liongoluila oku tala, eci va mola ovina via lingiwa, va tiukila kolonjo viavo loku livetaveta polonete.

⁴⁹ Vosi vo kũlĩha, lakãi vo sindikila eci a tunda ko Galilea va talama kupãla oku tala ovina evi.

⁵⁰ Kua kala ulume umue, onduko yaye Yosefe, eye u Arimateya, imbo limue lia va Yudea, haeye wa tiama konjango yakulu. Omunu waco wa sunguluka, haeye ukuesunga.

⁵¹ Eye ka tavele kongombo yavo, ndaño kovina va linga. Wa kala loku lavoka usoma wa Suku.

⁵² Eye wa enda ku Pilato, kuenje wa pinga etimba lia Yesu.

⁵³ Kuenje, oku li tulula, wa li muña vonanga yovalatanya, kuenje wo langeka veleva lia sokotolua vesenje omo lomue wa la kapiwaino.

⁵⁴ Eteke liaco eteke lieliangiliyo lio Pascoa, ekumbi liaco hailio esambata li fetika.

⁵⁵ Kuenje akãi vana vo sindikila eci a tunda ko Galilea, va kuamako, kuenje va mola eleva, kuenda ndeci etimba liaye lia kapiwamo.

⁵⁶ Noke va tiukila, kuenje va pongiya ovihemba vioku sieketa kuenda onguendu. Kuenje kesambata va puyuka ndocihandeleko.