LUKA 22 - Embimbiliya - Bíblia Sagrada em Umbundu

¹ Oco ofesta yombolo ka yi kuete etumbisa haiyo ya tukuiwa yo Pascoa, ya kala ocipepi.

² Ovitunda vinene la vakuavisonehua va sanda evelo lioku u wipa, momo va kala lusumba womanu.

³ Oco Satana wa wila Yuda, wa tukuiwa Isikariote, haeye umue pekui la vavali.

⁴ Oco, oku tunda, wa ka vanguile lovitunda vinene la vakesongo vaco ondaka yoku pakuila Yesu kokuavo.

⁵ Kuenje ovo va sanjuka, yu va likuminya oku u wiha olombongo.

⁶ Oco eye wa tava, yu wa sanda evelo lioku u pakuila kokuavo eci owiñi ka wuko.

⁷ Eteke liofesta yombolo ka yi kuete etumbisa, hailio eteke va ipa okameme ko Pascoa, lieya.

⁸ Oco Yesu wa tuma Petulu la Yoano, hati, Kuendi. Ka tu yaleli o Pascoa oco tu yi lie.

⁹ Yu vo pula, vati, O yongola okuti tu yi yalela pi?

¹⁰ Eye wa va kumbulula hati, Eci wiñili vimbo, vu ñualẽhẽla lomunu wa ambata esanga liovava. U kuami toke vonjo omo a iñila.

¹¹ Noke, popi la muẽleonjo yaco hoti, Ulongisi wa tuma oku ku pula, hati, Onjo yakombe omo ndi lila o Pascoa kumue lolondonge viange yi kasi pi?

¹² Kuenje eye u lekisi ohondo yinene kosapalalo, lovikuata viaco via angiliyiwa ale. Omo vu tu yalela.

¹³ Kuenje va enda, va ci sanga ndeci a popia lavo, kuenje va yala o Pascoa.

¹⁴ Oco, eci ekumbi liaco lia pitila, eye wa tumala komesa, lovapostolo va kala laye kumue.

¹⁵ Yu wa popia lavo hati, Oku livela nda livela oku lila o Pascoa eyi kumue lene osimbu sia talele ohali.

¹⁶ Momo, mopia lene siti, Si yi li vali, te yi tẽlisiwa vusoma wa Suku.

¹⁷ Oco wa tambula okopo yimue, kuenje, eci a yi panduila, wa linga hati, Yi tambuli, yi liaveli pokati kene.

¹⁸ Momo ndu sapuili siti, Tunde opo si nyui vali kepako liuyuva, toke usoma wa Suku wiya.

¹⁹ Yu wa nyañula ombolo, kuenje eci a yi panduila, wa yi timbula, yu wa yeca kokuavo hati, Eyi etimba liange lio wecelui. Ci lingili onjivaluiso yange.

²⁰ Eci va mala oku lia oco wa nyañula okopo hati, Okopo eyi ocisila cokaliye ca lisililua vosonde yange yo peselelui.

²¹ Puãi, tali, eka liu o makula li kasi kumue lame komesa.

²² Momo Mõlomanu endela vonjila yo sokiyilua, puãi u u pakula, ngongo yaye.

²³ Kuenje va fetika oku lipula pokati vati!, Elie pokati ketu o laika oku linga ocina eci?

²⁴ Va fetika oku lihoyela pokati kavo, vati, U o linga unene pokati ketu helie?

²⁵ Kuenje eye wa popia lavo hati, Olosoma via vakualofeka vi viala omanu vavo, kuenje olombiali viavo via tukuiwa olonekuli.

²⁶ Puãi ene, ko ka lingi ndoco. Pokati kene ukulu a linge ndumalehe, lusongui a linge ndukuakuvumba.

²⁷ Wa velapo elie, yu o tumala komesa ale, ele ukuakuvumba? Siti, Yu o tumala komesa. Ame puãi ñasi pokati kene ndukuakuvumba.

²⁸ Ene, ene wa pandakaisi lame eci nda nyikaiwa.

²⁹ Oco, ndeci Tate a nukuila usoma haico ndu tukuili usoma okuti

³⁰ vu lila loku nyuila komesa yange vusoma wange, kuenje vu tumala kovialo oku tetuluila apata ekui la avali a Isareli.

³¹ Ñala wa popia hati, A Simono, a Simono, limbuka okuti Satana wa panga oku vu kuata vosi okuti o vu sisa ndotiliku,

³² ame puãi nda ku likutilila okuti ekolelo liove ka li tokoka. Kuenda vali, ove, eci o tiuka vali kokuange, kolisa vakuẽle.

³³ Petulu wa popia laye hati, A Ñala, ngenda muẽle love ndaño vokayike, ndaño kokufa.

³⁴ Yesu wa linga hati, A Petulu, hu sapuila siti, Etaili ekondombolo ka li lili te o liñala lutatu, huti, Siu wi.

³⁵ Kuenje wa va pula, hati, Eci ndo tumili okuti ka wa ambateli ocipete, pamue opatolonya, pamue olohaku, wa sukili cimue? Va kumbulula vati, Lacimue.

³⁶ Yu wa popia lavo hati, Puãi kaliye, u o kuete ocipete a ci ambate, lopatolonya haico. Lu ka kuete osipata a landise ocikutu caye oco a lande yimue.

³⁷ Momo ndu sapuili siti, Ocisonehua cina ca popia citi, Wa tendiwila lava va lueya, ci lingiwila vokuange. Momo cosi ca sonehiwila ame ci lingiwa.

³⁸ Kuenje va linga vati, A Ñala, olosipata vivali vievi. Kuenje eye wa popia lavo hati, Ci tẽla.

³⁹ Kuenje Yesu wa tunda, yu wa enda komunda yo Oliveira ndeci a tuwa. Olondonge viaye vio kuama.

⁴⁰ Eci a pitilako, wa popia lavo hati, Likutilili okuti ka vu yonjiwa.

⁴¹ Eye wa liamuha lavo ca soka ndoku imba ewe, yu wa kekama kolongolo kuenda wa likutilila,

⁴² hati, A Tate, nda o ci panga, njupe okopo eyi, haimo lumue, ocipango cange ka ci ka lingiwe, te cove ci lingiwa.

⁴³ Kuo tukulukila ungelo wokilu oku u kolisa.

⁴⁴ Asangu a witaila, kuenje wa likutilila lolupili. Esalamiho liaye lia lokila posi ndalola osonde.

⁴⁵ Kuenje eci a votoka kokulikutilila kuaye, oco weya kolondonge viaye, yu wa va sanga va pekela otulo omo va sumua ca lua.

⁴⁶ Wa popia lavo hati, Wa pekeleli nye? Pasuki, likutilili okuti ka vu yonjiwa.

⁴⁷ Eci a kala loku popia kueya owiñi. U wa tukuiwa Yuda, haeye umue pekui la vavali, eye wa va pitila kovaso. Wa amela ocipepi la Yesu ho sipula.

⁴⁸ Puãi Yesu wa Popia laye hati, A Yuda, o pakula Mõlomanu lesipulo?

⁴⁹ Kuenje eci ava va kala kumue laye va limbuka eci ci laika oku lingiwa, oco va popia vati, A Ñala, tu veta losipata?

⁵⁰ Kuenje umue pokati kavo wa veta ukuenje wocitunda cinene, kuenje wa sonja etui liaye liokondio.

⁵¹ Puãi Yesu wa imba ondaka, hati, Liwekipo. Kuenje oku lamba etui liaye wo sakula.

⁵² Yesu wa pula ovitunda vinene la vakesongo vonembele kuenda akulu vo katukila, hati, Wa tundi hẽ lolosipata lolohunya ndava va yongola oku kuata ocingumba?

⁵³ Eci nda kala kala lene vonembele eteke keteke ka wa ndambeli. Puãi ola yilo ola yene muẽle, haiyo yunene wowelema.

⁵⁴ Kuenje vo kuata kuenda va enda laye, vo wiñisa vonjo yocitunda cinene. Puãi Petulu wo kuama ocituanyima.

⁵⁵ Eci va siakala ondalu vokati kocitali kuenda va tumala kumuamue, oco Petulu wa tumala pokati kavo.

⁵⁶ Kuenje ukãi umue upika, oku u mola eci a tumala vocinyi, oku u vanja suĩ wa popia hati, Ulume u layevo wa kala laye.

⁵⁷ Puãi Petulu wa likala hati, Okãi, siu wi.

⁵⁸ Okasimbu kaño, ukuavo, oku u mola, wa popia hati, Ove lovevo vu wavo. Puãi Petulu hati, Amunu, hameko.

⁵⁹ Puãi eci pa pita ola, umue ukuavo wa toñomala hati, Ocili, ulume u wa kalavo laye, momo u Galilea.

⁶⁰ Puãi Petulu hati, Amunu, eci o popia si ci. Osimbu a kala loku popia, haico ekondombolo lia lila.

⁶¹ Kuenje Ñala wa pukuka oku vanja Petulu. Oco Petulu wa ivaluka ondaka ya Ñala ndeci a popia laye hati, Etaili o liñala lutatu osimbu ekondombolo ka lia lilile.

⁶² Oco wa tunda kuenje wa lila ca lua.

⁶³ Kuenje alume va kuete Yesu vo fuanguila loku u veta.

⁶⁴ Kuenje oku u sitika vovaso, vo pula vati, Pilula. U wa ku veta helie?

⁶⁵ Kuenje va popia ovina via lua vikuavo vioku wimbula.

⁶⁶ Eci kua ca omele, akulu vomanu, okuti ovitunda vinene kuenda vakuavisonehua, va liongolola. Vo tuala vonjango yavo, kuenje vo pula vati,

⁶⁷ Nda ove u Mesiya, tu ci sapuile. Puãi eye wa va kumbulula hati, Ndaño ndu ci sapuili haimo ko tavi.

⁶⁸ Kuenda vali, ndaño ndu puli cimue, haimo ko ñumbululi.

⁶⁹ Puãi, tunde opo, Mõlomanu o tumala kondio yunene wa Suku.

⁷⁰ Oco vosi yavo vo pula vati, Oco hẽ, ca lomboloka okuti vumõla a Suku? Eye wa va kumbulula hati, Ene wa ci popi okuti ame.

⁷¹ Oco va linga vati, Tu yonguila nye vali olombangi? Etu muẽle tua ci yeva vomẽla waye.