LUKA 21 - Embimbiliya - Bíblia Sagrada em Umbundu

¹ Yesu wa petula ovaso, kuenje wa mola olohuasi via imba ovilumba viavo vombango.

² Wa molavo ocimbumba cimue, osuke, ca imbamo alusendu avali.

³ Kuenje Yesu wa popia lavo hati, Ndu sapuili siti, Ocili ocimbumba eci, haico osuke, ca imbamo ca lua, vosi vakuavo ci sule.

⁴ Momo ava vosi kukuasi wavo wa lua, vopako ño eci va lumba, eye puãi kusuke waye, wa imbamo cosi a kala laco, haico eteku liaye.

⁵ Kuenje eci vamue va vangula onembele ndeci ya posuisua lovawe a posoka kuenda olombanjaile viomanu, eye wa linga hati,

⁶ Ovina evi vu lete, kuiya oloneke okuti kulo ka ku siala ewe kilu liewe ka li tunguluka.

⁷ Yu vo pula vati, Olongisi, ovina evi vi lingiwa eteke li pi? kuenda ondimbukiso yaco ye, eci ovina evi vi laika oku lingiwa?

⁸ Eye wa va kumbulula, hati, Lunguki sanga vu lueyisua. Momo va lua veya londuko yange vati, Ame, kuenda vali vati, Eteke lieya. Ko ka va kuami.

⁹ Eci vu yeva ovita lovama, ko ka kuati usumba. Momo ovina evi viya tete, puãi ka vi likuama ndopo lesulilo.

¹⁰ Oco wa popia lavo hati, Ofeka lofeka vi likatukila, kuenda usoma lusoma.

¹¹ Ku kala ovilemawe vinene. Kolonele vimue ku kala onjala lefengi. Kilu ku tunda evi vi yokokisa kuenda olondimbukiso vinene.

¹² Puãi osimbu ovina evi viosi ka via lingiwile, vo kuati kuenda vo kangisi, vo pakuili kolosunangonga lo kotuyike kuenje vu tualiwila onduko yange kolosoma kuenda kolonguluvulu.

¹³ Eci cu wihi evelo lioku imba uvangi.

¹⁴ Oco kapi ovitima viene okuti ka vu sokolola ndeci vu kumbulula osimbu ka wa pitilili handi kekanga.

¹⁵ Momo ame ndu wihi omẽla lolondunge vina okuti ovanyali vene vosi ka va tẽla oku vi tamalaila pamue oku vi patãla.

¹⁶ Vu pakuiwa ndaño lolonjali viene, ndaño la vamanjene, la vangandiene kuenda akamba vene. Vamue pokati kene va ipaiwa.

¹⁷ Vu suvukilua onduko yange lomanu vosi.

¹⁸ Puãi ndaño esinga limuamue kovitue viene ka li nyõleha.

¹⁹ Oco, lepandi liene vu mola omuenyo.

²⁰ Puãi, eci vu mola Yerusalãi ya ñualĩwa lovita, limbuki okuti okukunduka kuayo ku kasi ocipepi.

²¹ Oco ava va kasi vo Yudea va tilile kolomunda, lava va kasi vokati ka Yerusalãi va tundemo, lava va kasi ale kumue kuiñi ka va ka iñilemo.

²² Momo oloneke evi viefetuluinyo, haivio viokulingiwa kuovina viosi via sonehiwa.

²³ Ava va kasilili muiñi lava va nyamisa koloneke viaco, ci linga ohenda, ohali yavo yi lua. Momo vofeka mu kala elamba lia lua, kuenje onyeño yi wengukila omanu valo.

²⁴ Va fa losipata, va tualiwa umandekua kolofeka viosi, kuenje Yerusalãi yi kosiwa la vakualofeka toke oloneke via vakualofeka vi sula.

²⁵ Kekumbi lo kosãi kuenda kolombungululu ku kala olondimbukiso. Kilu lieve ku kala upongo wolofeka via tangelekua lokuõla kuokalunga lakimba ako.

²⁶ Omanu va ambuka longuele yovina vi laika oku iya kilu lieve, momo ovonene okilu a lisenga.

²⁷ Kovaso yaco va mola Mõlomanu iyilila velende lunene kuenda ulamba wa lua.

²⁸ Oco, eci ovina evi vi fetika oku lingiwa, petuli ovaso ene, petulivo ovitue viene, momo eyovo liene li kasi ocipepi.

²⁹ Yu wa va tela olusapo hati, Vanji kukuyu, pamue koviti viosi.

³⁰ Tuli vu mola okuti via yova vu limbuka ene muẽle okuti ondombo yi kasi ale ocipepi.

³¹ Haico ene, eci vu mola ovina evi okuti vi kasi loku lingiwa, limbuki okuti Usoma wa Suku u kasi ocipepi.

³² Mopia lene siti, Ocili ocitumbulukila cilo ka ci pui te ovina evi viosi vi lingiwa.

³³ Ilu losi vi takata, olondaka viange puãi ka vi takata.

³⁴ Lilavi sanga ovitima viene vi vulua lelelele luholua kuenda ovikele viokomuenyo wokilu lieve, kuenje eteke liaco liu wili ocipikipiki ndulivi.

³⁵ Momo liya komanu vosi va tunga kuosi kilu lieve.

³⁶ Puãi lavululi olonjanja viosi loku likutilila okuti vu kala longusu yoku puluka kovina evi viosi viya, ho talami kovaso a Mõlomanu.

³⁷ Eteke keteke, utanya wa longaisa vonembele, uteke puãi wa tunda vimbo, oku ka pekela komunda ya tukuiwa Oliveira.

³⁸ Kuenje omanu vosi vo limẽlẽhãila vonembele oku u yevelela.