LUKA 20 - Embimbiliya - Bíblia Sagrada em Umbundu

¹ Eteke limue, eci Yesu a kala loku longisa omanu vonembele loku kunda ondaka yiwa, oco ovitunda vinene la vakuavisonehua lakulu veya kokuaye.

² Va popia laye vati, Tu sapuileko, omoko o lingainga layo ovina evi, ye? Lu wa ku iha omoko eyi, elie?

³ Oco wa va kumbulula hati, Lame ndu pulivo epulilo. Sapuiliko.

⁴ Epapatiso lia Yoano hẽ, liokilu ale, ele liomanu?

⁵ Va livangula pokati vati, Nda tu kumbulula tuti, Liokilu, eye o tu pula hati, Nye ka wo taveleli?

⁶ Puãi nda tu kumbulula tuti, Liomanu, omanu vosi va tu asa ovawe, momo vosi va soka vati, Yoano uprofeto.

⁷ Oco va kumbulula vati, Oko ya tunda ka tuiko.

⁸ Yesu wa popia lavo hati, Lamevo siu sapuili omoko ndinga layo ovina evi.

⁹ Oco a fetika oku tela omanu olusapo olu, hati, Omunu umue wa tuika ocumbo cayuva, noke wa ci pindikisa kolongunja, kuenje wa enda vofeka yikuavo oku tumala osimbu.

¹⁰ Oco, kuvo waco, wa tuma ukuenje kolongunja viaco okuti, kapako ocumbo cayuva vo wihako amue. Puãi olongunja via tipula, kuenje vio tiuwiya ño ovoko.

¹¹ Oco wa tuma vali ukuenje ukuavo. Eye layevo vo tipulavo, loku u fũkĩlisa, kuenje vo tiuwiyavo ovoko.

¹² Oco wa tuma vali watatu, eye vo tota olombole loku u wimba vusenge.

¹³ Muẽleacumbo hati, Ndinga nye? Numa omõlange wa soliwa, mbi eye va sumbila.

¹⁴ Puãi, eci olongunja vio mola, via livangula pokati, viti, U, eye kapiñala. Tu wipayi oco ocipiñalo ci linge cetu.

¹⁵ Kuenje vo tundisa vocumbo, yu vo wipa. Oco hẽ, muẽleacumbo o linga nye lavo?

¹⁶ Iya, o nyõla olongunja viaco kuenje eca ocumbo cayuva ku vaiñi. Eci va ci yeva va linga vati, Hacoko.

¹⁷ Puãi eye, oku va vanja, wa popia lavo hati, Nda hacoko, ca lomboloka ndati eci ca sonehiwa citi, Ewe lia inasi atungi, olio lia lingiwa utue wevindi?

¹⁸ U o kupukila kewe liaco o teka teka, puãi eci li kupukila umue liu keleketa ndoneketela.

¹⁹ Vakuavisonehua lovitunda vinene, kola yaco haiyo, va sanda oku u kuata, momo va limbuka okuti ovo a tela olusapo luaco, puãi va kuatela omanu usumba.

²⁰ Oco vo lavulula, kuenje va tuma olondavululi oku liluvikiya ndomanu vocili, loku u nula londaka okuti vo weca komoko yonguluvulu kuenda kokutetulula kuayo.

²¹ Vo pula vati, Olongisi, tu ci okuti eci o popia ca sunguluka, leci o longisa, cocili. Ku kuete ocame, puãi o longisa locili onjila ya Suku.

²² Oco hẽ, ca sunguluka etu oku lambuila Kaisare ale, ele ka ca sungulukile?

²³ Eye puãi wa limbuka atutu avo kuenje wa popia lavo, hati,

²⁴ Ndekisi ocingangu cimue colombongo. Ociluvialuvia eci hẽ, locisonehua eci, celie? Kuenje va kumbulula vati, Ca Kaisare.

²⁵ Yu wa popia lavo, hati, Oco, evi via Kaisare vi eci ku Kaisare, levi via Suku vi eci ku Suku.

²⁶ Kuenje kovaso omanu ka va tẽlele oku u kuata leci a popia. Puãi va komoha ekumbululo liaye kuenje voha.

²⁷ Vamue va Sandukeo, haivo va longisa vati, Ka kuli epinduko, veya kokuaye.

²⁸ Kuenje vo pula vati, Olongisi, Mose wa tu sila ocisonehua citi, Nda ulume o fa kuenje o sia ukãi, puãi ka kuete omõla, oco manjaye o piñala ukãi waco oku tumbuluila huvaye ombuto.

²⁹ Oco kua kala vamanji epanduvali. Ukulu waco wa kuela ukãi, kuenje oku fa ka sile omõla,

³⁰ wa vali haico.

³¹ Lu wa tatu wo kuela, haico epanduvali liavo vosi va fa, kuenje ka va sile omõla.

³² Noke ukãi wa favo.

³³ Oco kepinduko hẽ, o linga ukãi welie? Momo epanduvali liaco liosi lio kuelele.

³⁴ Yesu wa va kumbulula hati, Omãla vomuenyo ulo va kuela kuenda va kuelaisua.

³⁵ Puãi ava va posokela oku mola omuenyo ukuavo kuenda epinduko ku vakuavilangu, ovo ka va kuela, ndaño oku kueliwa.

³⁶ Ka va tẽla oku fa vali, momo va lisoka lovangelo haivo omãla va Suku omo omãla vepinduko.

³⁷ Puãi kondaka yepinduko lia vakuavilangu, ndaño Mose wa lekisa okuti ondaka yaco yocili, eci, vesapulo liocisapa, a tukula Yehova okuti eye Suku ya Avirahama, haeye Suku ya Isake, haeye Suku ya Yakoba.

³⁸ Suku heyeko Suku yava va fa, te yava va kasi lomuenyo, momo vosi omuenyo eye vo kuetele.

³⁹ Vamue vakuavisonehua va kumbulula vati, Olongisi, wa popia ciwa.

⁴⁰ Kuenje lomue wa lukuta vali oku u pula cimue.

⁴¹ Eye puãi wa va pula, hati, Va popia ndati vati, Kristu omõla a Daviti?

⁴² Momo muẽle Daviti velivulu liolosamo wa popia hati, Ñala wa popia la Ñala yange hati, Tumala kondio yange,

⁴³ toke hu kapela ovanyali vove ociliatelo colomãi viove.

⁴⁴ Omo Daviti o tukula Kristu hati, Ñala, oco hẽ, Kristu o linga ndati omõlaye?

⁴⁵ Eci omanu vosi va kala loku u yevelela, eye wa popia lolondonge viaye hati,

⁴⁶ Lunguki la vakuavisonehua. Va sole oku ñuala ñuala loku wala uwalo wa lepa. Va sole oku lamiwa vovitanda loku tumala kolomangu via velapo volosunangonga lo kolofesta.

⁴⁷ Va lia lia olonjo viovimbumba, kuenje, oku pipiya, va likutilila ovilañela. Episo liavo li piãla.