LUKA 2 - Embimbiliya - Bíblia Sagrada em Umbundu

¹ Koloneke viaco Soma Augusto wa imba olukuambi hati, Olofeka viosi vi lisonehise.

² Okusonehiwa kuaco oko kuatete, kuenje kua lingiwa eci Kurénio a viala ko Suria.

³ Oco vosi va enda oku ka lisonehisa, u kimbo liavo, u kimbo liavo.

⁴ Kuenje Yosefe wa tunda ko Nasara yo vo Galilea, wa enda ko Yudea, kimbo lia Daviti, onduko yalio Beteleme, momo eye ukuepata lia Daviti.

⁵ Wa ka lisonehisa kumue la Maria ondombua yaye, haeye wa kulilua.

⁶ Oco, eci va kala oko, oloneke viaye vioku cita via tẽla.

⁷ Kuenje wa cita uveli waye, omõla ulume, yu wo vungila ponanga, kuenje, omo vonjo yolongende ka va sangelemo apa va kala, oco wo langeka vocililo colongombe.

⁸ Vofeka yaco mua kala ovangombo va lala lala vusenge oku lava olomeme viavo kuteke.

⁹ Kuenje ungelo wa Yehova wa va tukulukila, lulamba wa Yehova wa va tuila, usumba ka va likuete.

¹⁰ Ungelo wa popia lavo hati, Ko ka yokoki ño, momo tali, ndu sapuili ondaka yiwa yesanju lia lua liya komanu vosi.

¹¹ Momo etaili vimbo lia Daviti muo citilui Upopeli, eye Kristu Ñala.

¹² Eci cu lingili ondimbukiso ceci, Vu ka sanga oñaña ya vungiwa ponanga, ya pekela vocililo colongombe.

¹³ Haico owiñi wolohoka viokilu wa kala kumue lungelo, kuenje va sivaya Suku, vati,

¹⁴ Kilu, ulamba ku Suku. Kilu lieve, ombembua pokati komanu Suku a sanjukila.

¹⁵ Oco, eci ovangelo va tunda kokuavo ha va endi kilu, ovangombo va livangula vati, Tu endi ko Beteleme, tu ka tali eci ca pitako, ca tu sapuila Ñala.

¹⁶ Oco va yayulako, kuenje va sanga Maria la Yosefe kuenda oñaña ya pekela vocililo colongombe.

¹⁷ Eci va yi mola va sapula ondaka yomõla ya va sapuilua.

¹⁸ Vosi va ci yeva va komoha ondaka ya va sapuilua lovangombo.

¹⁹ Maria puãi wa soleka olondaka evi viosi oku vi sokolola vutima waye.

²⁰ Oco ovangombo va tiukila oku tumbangiya loku sivayaila Suku ovina viosi va yeva, haivio va mola ndeci ca va sapuilua.

²¹ Oco, eci a tẽlisa eteke liecẽlãla, hailio eteke lioku seviwa, oco vo luka Yesu, haiyo onduko ya tukuiwa lungelo osimbu ka miniwile handi.

²² Eci oloneke viavo vioku liyelisa ndovihandeleko via Mose via tẽla, oco vo tuala ko Yerusalãi.

²³ Momo ca sonehiwa vovihandeleko via Yehova okuti, uveli wosi ulume o situlula olucito o tukuiwa o kola ku Yehova.

²⁴ Oco va enda oku u tumbika ku Yehova kuenda oku lumba ocilumba ndeci ca tukuiwa vovihandeleko via Yehova okuti olonende vivali, pamue ivuvu vivali violopomba.

²⁵ Vo Yerusalãi mua kala ulume, onduko yaye Simeone, eye ukuesunga, haeye ukuakusumbila Suku, kuenje wa lavoka okulembelekua kua Isareli. Espiritu Sandu wa kala laye.

²⁶ Co situluilua le Espiritu Sandu okuti ka moli okufa te tete wa mola Mesiya ya Ñala.

²⁷ Yu wa songuiwa le Espiritu oku iñila vonembele. Kuenje eci olonjali via nenamo okamõla Yesu oku linga eci ca ka tukuilua lovihandeleko,

²⁸ oco Simeone, oku ka angata, wa sivaya Suku, kuenje hati,

²⁹ Kaliye, a Cime cange, ci tava oku eca ukuenje wove lombembua, ndeci wa likuminya.

³⁰ Momo ovaso ange a mola epopelo liove,

³¹ lina wa angiliyila kovaso olofeka viosi,

³² hailio li linga ocinyi ci tuila vakualofeka, kuenda ulamba womanu vove, va Isareli.

³³ Kuenje isiaye la inaye va komoha ovina vio popiwila.

³⁴ Simeone wa va sumũlũisa, kuenje wa popia la Maria inaye hati, Tala, omõla u wa kapelua olukonyo letumbuluko lia va lua vi Isareli, kuenje o linga ondimbukiso yi patãlãiwa,

³⁵ okuti ovisimilo viovitima via lua vi limbuluka. Unga u tomavo olusole utima wove.

³⁶ Kua kalavo ukãi umue Ana. Eye uprofeto, omõla a Fanuele, ukuepata lia Asere. Eye wa kuka ca lua, wa kala la veyaye anyamo epanduvali tunde pokukueliwa kuaye,

³⁷ yu wa kala ocimbumba toke wa tẽla akui ecelãla kanyamo kanyamo akuãla. Ka tundile vali vonembele puãi wa fendelamo ño-o uteke lutanya loku likandangiya okulia loku likutilaila.

³⁸ Haico eya, yu wa pandula Suku, kuenje, vosi va lavoka eyovo lia Yerusalãi, wa va vanguila Yesu.

³⁹ Eci va mala ovina viosi viovihandeleko via Yehova, va tiukila ko Galilea, kimbo liavo, ko Nasara.

⁴⁰ Kuenje omõlaco wa kula, wa kuata ongusu, haeye we yuka olondunge, kuenda ocali ca Suku ca kala kumue laye.

⁴¹ Olonjali viaye via enda enda ko Yerusalãi, kofesta yo Pascoa, unyamo kunyamo.

⁴² Eci a tẽla ekui lianyamo kanyamo avali, oco va lamanelako ndocituwa cavo.

⁴³ Eci ofesta ya pita kuenje va kasi ale vonjila oku tiukila, umalehe Yesu wa siala konyima vo Yerusalãi. Olonjali viaye ka via ci kũlĩhile,

⁴⁴ puãi, omo va soka vati, O kasi vendo, oco va enda ño etulo, yu vo sanda pokati ka vangandiavo lolonjiwe viavo.

⁴⁵ Eci ka vo sangele va tiukila ko Yerusalãi oku u sanda.

⁴⁶ Kovaso yoloneke vitatu vo sanga vonembele, wa tumala pokati kalongisi oku va yevelela loku va pula pula.

⁴⁷ Kuenje vosi vo yeva va komoha olondunge viaye latambululo aye.

⁴⁸ Eci vo mola va lisalukako kuenje inaye wo pula, hati, Amõlange, nye wa tu ci lingila? Tala, ame la so tua ku sanda lohele ya lua.

⁴⁹ Eye wa va kumbulula, hati, Nye wa sandeli? Ka wa kũlihili okuti nda sesamela oku kala oku kuli ovina via Tate?

⁵⁰ Eci a popia lavo ka ca va lombolokele.

⁵¹ Oco wa lokila kumue lavo, weya ko Nasara, kuenje wa pokoyola kokuavo. Inaye wa patekela olondaka evi viosi vutima waye.

⁵² Kuenje Yesu wa amako kolondunge lo kutunga kuenda oku soliwa la Suku lomanu.