LUKA 19 - Embimbiliya - Bíblia Sagrada em Umbundu

¹ Wa iñila vo Yeriko. Eci a kala loku pitamo

² ulume umue, onduko yaye Sangeo, eye ukulu wa vakuakutambula elisimu, haeye ohuasi,

³ wa sanda oku tala Yesu nda wa soka ndati. Puãi, omo owiñi wa lua, oco ka ci tẽlele momo eye umbumbulu.

⁴ Oco wa lupukila kovaso, kuenje wa londa vulemba ha tali Yesu, momo haiko a soka oku vinjuka.

⁵ Yesu, eci a keyako, wa vanja vilu, yu wa popia laye hati, A Sangeo, yayulako, loka, momo etaili singa vonjo yove.

⁶ Oco wa yayulako, wa loka, wo tambula lonjolela.

⁷ Kuenje eci omanu va ci mola, vosi va ñuñula vati, Wa ka singa kondingakandu.

⁸ Oco Sangeo wa talama, kuenje wa popia la Ñala, hati, A Ñala, ngeca ombandu yovikuata viange kolosuke. Nda nda pilika omunu cimue ndu ci tiuwila lukuãla.

⁹ Yesu wa popia laye hati, Etaili epopelo lieya vonjo yilo, momo u, layevo omõla a Avirahama.

¹⁰ Momo Mõlomanu weyilila oku sanda eci ca nyelela loku ci popela.

¹¹ Osimbu va kala loku yeva ovina evi, Yesu wa vokiyako oku ta olusapo, omo a kala ocipepi lo ko Yerusalãi, kuenje va soka okuti usoma wa Suku u tukuluka ndopo.

¹² Oco wa popia hati, Ombuale yimue ya ka tambula uviali ukuavo vofeka yocipãla okuti noke o tiuka.

¹³ Oco wa pañinya ekui liakuenje vaye, yu wa va iha ekui liolokondu, kuenje wa popia lavo hati, Fũli toke njiya.

¹⁴ Puãi vakuafeka yaye vo suvuka, kuenje va tuma olomunga oku u landula, vati, Ka tu yongola okuti ulume u o tu viala.

¹⁵ Eci a tiuka koku tambula uviali waco, oco wa kovonga akuenje vana a ihile olokondu, okuti o kũlĩhisa ndeci va fũla.

¹⁶ Watete weya kokuaye hati, A Ñala, okondu yove ya fũla ekui liolokondu vikuavo.

¹⁷ Kuenje eye wa popia laye hati, Wa linga muẽle, vukuenje wa sunguluka, omo wa linga esunga leci citito, o viala ekui liovaimbo.

¹⁸ Wavali weya hati, A Ñala, okondu yove ya fũla olokondu vikuavo vitãlo.

¹⁹ Yu wa popia laye hati, Ove o viala kovaimbo atãlo.

²⁰ Oco ukuavo weya hati, A Ñala, okondu yove yeyi. Nda yi solekele pelesu,

²¹ momo nda ku sumba, omo ove umunu wa kãla. O yelola eci kua kapele, o lomboyola eci kua limile.

²² Eye wa popia laye hati, Okuenje wa huka, hu pisa leci ca tunda vomẽla wove. Wa kũlĩha okuti ndimunu wa kãla haime ndi yelola eci sia kapele, loku lomboyola eci sia limile.

²³ Oco, nye kua kapelele olombongo viange kombango? Momo nda oco wa lingile, nda eci ndeya, nda nda vi tambula losindike yaco.

²⁴ Kuenje eye wa popia lava va tãiko hati, U nyehi okondu yaye, yeci ku o kasi lekui liolokondu.

²⁵ Va popia laye vati, A Ñala, o o kuete ale ekui liolokondu.

²⁶ Ndu sapuili siti, U o kuete ale vo vokiya, puãi u ka kuete vo nyeha ndaño eci a kuete.

²⁷ Puãi ovanyali vange vana ka va njonguile okuti ndi va viala, va neni kulo, va ipaili kovaso ange.

²⁸ Yesu, eci a popia ndoco, oco, oku pita kovaso, wa lamanela ko Yerusalãi.

²⁹ Eci eya ocipepi ko Betefange lo ko Betánia, komunda va yi tukula Oliveira, polondonge viaye wa tumapo vavali,

³⁰ hati, Kuendi vimbo li kasi kovaso. Eci wiñilimo vu sanga omõla ocimbulu wa pandekiwa, lomue wa la tumalako handi. Ci kutululi kuenda enjui laco.

³¹ Nda umue o vu pula, hati, Vu ci kutuluila nye? kumbululi hoti, Ñala o ci yongola.

³² Oco ava va tumiwa va enda, kuenje va ci sanga ndeci Yesu a va sapuila.

³³ Kuenje, eci va kala loku kutulula ocimbulu oco vamuẽle yaco va va pula vati, Nye vu kutuluila ocimbulu?

³⁴ Oco va kumbulula vati, Ñala o ci yongola.

³⁵ Oco va enda laco ku Yesu kuenje, oku yala uwalo wavo kocimbulu, va tumalisako Yesu.

³⁶ Osimbu a kala loku enda omanu va yala uwalo wavo vonjila.

³⁷ Eci eya ocipepi, okuti o kasi ale kociloka comunda yo Oliveira, oco owiñi wosi woloñame wa fetika oku yolela lolukandi loku sivayaila Suku ovikomo viosi va mola,

³⁸ vati, Soma iyilila vonduko ya Ñala a sivayiwe! Kilu ku kale ombembua! Kovailu ku kale ulamba!

³⁹ Va Fariseo vamue va kala vowiñi va popia laye, vati, Olongisi, lemela oloñame viove.

⁴⁰ Eye wa va kumbulula hati, Ndu sapuili siti, Ava nda voha, ovawe nda a kaluka.

⁴¹ Eci a sumĩhĩla ocipepi, kuenje wa mola imbo, oco wa li lilila.

⁴² Wa popia hati, Ndi livela okuti ndaño etaili nda wa kũlĩha ovina vi ku kokela ombembua. Cilo puãi, via sitikiwa kovaso ove.

⁴³ Momo ku ku iyilila oloneke eci ovanyali vove va ku liongokela ondunda, kuenje va ku ñuala ocingonja loku ku sitika kolonẽle viosi.

⁴⁴ Va ku kupuila posi, ove lomãla vove va kasi vokati kove. Ka va ku sila ewe kilu liewe, momo kua kũlĩhile eteke liove lioku pasuiwa la Suku.

⁴⁵ Yu wa iñila vonembele kuenje wa fetika oku tundisa vakuakulandisa.

⁴⁶ Wa popia lavo hati, Ca sonehiwa citi, Onjo yange yi linga onjo yoku likutilila, ene puãi wa yi lingisi ocilala covingumba.

⁴⁷ Yu wa longisa vonembele eteke keteke. Ovitunda vinene, la vakuavisonehua, lakulu vomanu, va yongola oku u nyõla,

⁴⁸ puãi ka va sangele eci va tẽla oku u linga, momo omanu vo kakatela loku yevelela kolondaka viave.