LUKA 18 - Embimbiliya - Bíblia Sagrada em Umbundu

¹ Wa va tela olusapo luoku va vetiya okuti ca va sesamela oku likutalaila ño-o, oku tokoka hacoko.

² Wa popia hati, Vimbo limue mua kala onganji ka ya sumbile Suku, haiyo ka ya sumbilile omanu.

³ Vimbo liaco mua kalavo ocimbumba ceyaiya kokuaye, citi, Mopele kunyali wange.

⁴ Oloneke vimue onganji yaco ka ya tavele, puãi noke ya popia lutima wayo, yiti, Ndaño sia sumbile Suku, pamue oku sumbila omanu,

⁵ haimo, omo ocimbumba eci ci sakalaisa ño-o, oco ndi ci popela sanga ci ñavisa lokuiyaiya kuaco.

⁶ Kuenje Ñala wa linga hati, Yevi eci ca popia onganji ka ya sungulukile.

⁷ Suku hẽ, ka tetuluila lesunga vaye va noliwa, ava vo vilikaiya utanya luteke? O tutuvala ño-o oku va tetuluila lesunga?

⁸ Mopia lene siti, O va tetuluila lombili. Haimo lumue, eci Mõlomanu eya, o sanga ekolelo kilu lieve?

⁹ Wa telavo olusapo olu vamue va likolela ovo muẽle, vati, Tuakuesunga, kuenje va pembula vakuavo. Wa va tela hati,

¹⁰ Alume vavali va lamanela konembele oku ka likutilila, umue u Fariseo, ukuavo ukuakutambula elisimu.

¹¹ U Fariseo wa talama, wa likutilila hati, A Suku, ndi ku pandula omo sia sokele lomanu vakuavo, olondiandia, ka va sungulukile, vakahonga, pamue ndeci u ukuakutambula elisimu.

¹² Ndi likandangaiya okulia luvali kosimanu, ndukuakulumba onepa yekui yovipako viange viosi.

¹³ Puãi ukuakutambula elisimu wa talama okacinãla, ka petuile ovaso aye, puãi wa lipupola ponete kuenje wa likutilila hati, A Suku, ndinge ohenda, ame ndukuakandu.

¹⁴ Ndu sapuili siti, Eye wa lokila tupu konjo yaye wa tendiwa ndukuesunga, ukuavo heyeko. Momo wosi o liamisa kunene amisua kutito, puãi u o liamisa kutito amisua kunene.

¹⁵ Va kala loku u nenela otuñaña okuti o tu lamba. Eci olondonge via ci mola, via va lemẽla.

¹⁶ Puãi Yesu oku va kovonga, wa linga hati, Otumãla tuiye kokuange, ko ka tu tutuiyi, momo usoma wa Suku wava va linga ndotu.

¹⁷ Mopia lene siti, Ocili, wosi ka tambula usoma wa Suku ndokamõla ka iñilamo.

¹⁸ Kuenje umue ukulu wo pula hati, Olongisi wa sunguluka, ndinga nye okuti ñuata omuenyo ko pui?

¹⁹ Yesu wo kumbulula hati, Nye o nukuila huti, wa sunguluka? Lomue wa sunguluka te umuamue, okuti Suku lika.

²⁰ Wa kũlĩha ovihandeleko,— Ku ka pekelise, Ku ka ipaye, Ku ka ive, Ku ka imbe uvangi wuhembi, Sumba so la nyõho.

²¹ Kuenje eye wa linga hati, Ovina evi viosi ndi vi lingainga tunde kutila wange.

²² Eci Yesu a ci yeva, wa popia laye hati, Lopo pa ku kambela ocina cimosi. Kuende, ka landise cosi o kuete, ci avela olosuke, kuenje o kala lukuasi kilu, oco wiye, o ñuame.

²³ Puãi, eci a yeva ovina evi, wa sumua cimue, momo wa kala lovipako via lua.

²⁴ Yesu wo vanja kuenje wa linga hati, Ava va kasi lovipako via lua ca va tĩlila ca lua oku iñila vusoma wa Suku.

²⁵ Momo ongamelo oku pita venyulu lionguya ca leluka, ohuasi oku iñila vusoma wa Suku upange.

²⁶ Ava va ci yeva vati, Nda oco, helie o tẽla oku popeliwa?

²⁷ Puãi Yesu wa popia hati, Ovina ka vi tẽliwa lomanu vi tẽliwa la Suku

²⁸ Kuenje Petulu wa linga hati, Etu, etu tua sia cetu cosi kuenje tua ku kuama.

²⁹ Yesu wa popia lavo hati, Mopia lene locili siti, Ka kuli umue wa sila usoma wa Suku onjo, pamue ukãi, pamue vamanjaye, pamue olonjali, pamue omãla,

³⁰ okuti voluali lulo muẽle ka tambula eci ca velapo vali enene, kuenje komuenyo wiyako omuenyo ko pui.

³¹ Kuenje wa enda kulika lekui liaco la vavali yu wa popia lavo hati, Kaliye, kua ca, tu lamanela ko Yerusalãi, kuenje ovina viosi ovaprofeto va sonehela Mõlomanu vi lingiwa.

³² Momo o pakuiwa ku vakualofeka, o fuanguiwa, o valuiwa, kuenda o siyilua ovate.

³³ Vo tipula kuenje vo wipa, kuenje eteke liatatu o pinduka.

³⁴ Puãi pokati kolondaka evi layimue yimosi ya va lomboloka. Cosi ca popiwa ca va sitikilua. Ka va limbukile eci ca popiwa.

³⁵ Eci Yesu eya ocipepi lo ko Yeriko kua kala omeke yimue ya tumala konele yelila oku eya.

³⁶ Eci ya yeva owiñi wa vinjuka, ya pula yiti, Oco nye?

³⁷ Vo sapuila vati, Yesu u Nasara o kasi loku vinjuka.

³⁸ Oco wa vilikiya hati, A Yesu, a Mõla a Daviti, ndinge ohenda.

³⁹ Ava va pita kovaso vo lemela, vati, Uhãko. Puãi eye wa vilikiya vali ca lua hati, A Mõla a Daviti, ndinge ohenda.

⁴⁰ Oku talama, Yesu wa pañinya hati, U neneli. Eci eya ocipepi, Yesu wo pula hati,

⁴¹ Nye o yongola okuti hu ci lingila? Kuenje eye hati, A Ñala, njongola okuti ndi letuluka.

⁴² Kuenje Yesu wa popia laye hati, Letuluka. Ca ku kayisa ekolelo liove.

⁴³ Haico a letuluka kuenje wo kuama loku tumbangiya Suku. Kuenje omanu vosi, eci va ci mola, va sivaya Suku.