LUKA 17 - Embimbiliya - Bíblia Sagrada em Umbundu

¹ Yu wa popia lolondonge viaye hati, Ovilondokua viya muẽle, ka kuli atatahãi, puãi u o kapela ukuavo ovilondokua, ngongo yaye!

² Eye, co velelapo nda ewe lioku fulila li nyoñamisiwa kosingo yaye kuenje imbiwa vokalunga, oku kapela umue wava vatito ocilondokua hacoko.

³ Lunguki lovimuenyo viene muẽle. Ukuẽle nda o lueya, u lemela, nda o likekemba, u wecela.

⁴ Nda o ku lueyela olonjanja epanduvali keteke liongongo, kuenje iya kokuove olonjanja epanduvali loku likekemba hati, Ndeya oku livondela, cove oku u wecela.

⁵ Ovapostolo va popia la Ñala vati, Tu vokiyeko ekolelo.

⁶ Kuenje Ñala wa popia lavo hati, Nda wa kaili lekolelo ndokalumema kombuto yulemba nda vu tẽla oku popia lulemba u hoti, Veyuka, lituika vokalunga, kuenje nda u vu pokola.

⁷ Pokati kene hẽ, peli umue o kasi lukuenje o lima, pamue o lisa olomeme, kuenje, eci ukuenje a tunda vepia, o popia laye hati, Enju lombili, ndo tumale, lia?

⁸ Siti o laika oku popia lukuenje hati, Nelekele handi okulia kuange. Wala uwalo wove woku vumba. Mbumbe osimbu ñasi oku lia loku nyua. Noke oco ci tava ove oku lia loku nyua.

⁹ O pandula hẽ, ukuenje omo a linga ovina vio handelekua?

¹⁰ Lenevo haico, eci wa lingi ovina viosi vio handelekui, lingi hoti, Tuapika vaño. Tua linga ño eci ca tu sesamela.

¹¹ Eci a kala vonjila yoku enda ko Yerusalãi wa pita pokati ka Samária la Galilea.

¹² Kuenje, eci a iñila vimbo limue, oco omanu ekui va vela ovilundu va ñualẽhela laye kuenje va talamela ocipãla.

¹³ Oco va vilikiya vati, A Yesu, a cime cetu, tu linge ohenda.

¹⁴ Eci a va mola, wa popia lavo hati, Kuendi, ka lilekisi kovitunda. Oco, osimbu va enda va yelisua.

¹⁵ Umue wavo, eci a mola okuti wa sakuiwa, wa tiuka loku sambiliya Suku lolukandi,

¹⁶ kuenje, oku kekamela posi kolomãi via Yesu, wo panduila. Eye haeye u Samária.

¹⁷ Oco Yesu wa popia hati, Hekuiko hẽ va yelisua? Ecea liaco li kasi pi?

¹⁸ Ka kuli vali umue ukuavo o tiuka oku tumbangiya Suku, te lika ukuafeka yiñi?

¹⁹ Oco Yesu wa popia lu wa velele ovilundu hati, Ca ku kayisa ekolelo liove. Votoka. Kuende.

²⁰ Eci va Fariseo vo pula vati, Usoma wa Suku wiya eteke lipi? eye wa va kumbulula hati, Usoma wa Suku ka wiya okuti u moleha lovaso.

²¹ Omanu ka va lingi vati, Usoma wa Suku wowu, pamue wowo, momo Usoma wa Suku u kasi pokati kene.

²² Kuenje eye wa popia lolondonge viaye hati, Kuiya oloneke okuti vu livela oku mola ndaño eteke limosi lia Mõlomanu, puãi ko li moli.

²³ Kuenje omanu va popia lene vati, Tali oko, pamue vati; Tali kulo. Ene puãi ko ka endiko, ko ka va kuami.

²⁴ Momo, ndeci ociliakulo ci liakula, kuenje ci tuila ilu tunde konele eyi toke konele yikuavo, haico ci kala Mõlomanu veteke liaye.

²⁵ Tete puãi o tala ohali ya lua, kuenje ocitumbulukila cilo cu takumula.

²⁶ Ndeci ca kaile koloneke via Noha haico ci kala koloneke via Mõlomanu.

²⁷ Va lia lia, va nyua nyua, va likuela kuela, va kuelaisa, toke keteke Noha a wila vocimbaluku, kuenje etande lieya, lia va nyõla vosi.

²⁸ Haico ca kaile koloneke via Lote, va lia lia, va nyua nyua, va landa landa, va landaisa, va lima lima, va tunga tunga.

²⁹ Puãi keteke Lote a tunda vo Sodomo, kilu kua loka ondalu yofuofuo ndombela, yu ya va nyõla vosi.

³⁰ Haico ci kala keteke Mõlomanu a tukuluiwa.

³¹ Keteke liaco, u o kasi kilu lionjo, kuenda ovikuata viaye vi kasi vonjo, ka ka loke oku vi upamo. Lu o kasi vepia haico, ka ka tiuke.

³² Ivaluki ukãi wa Lote.

³³ Wosi o sanda oku popela omuenyo waye u takisa, puãi wosi o takisa omuenyo waye, eye u popela.

³⁴ Ndu sapuili siti, Kuteke waco vula umuamue mu kala omanu vavali, umue upiwamo, ukuavo o sialamo.

³⁵ Ku kala akãi vavali va fula pamuamue, umue upiwapo, ukuavo o sialapo.

³⁶ Vavali va kala vepia, umue upiwamo, ukuavo o siala.

³⁷ Kuenje vo pula vati, A Ñala, kupi? Eye wa va kumbulula hati, Oko kuli ocife haiko ku liongoluila olohokohoko.