LUKA 16 - Embimbiliya - Bíblia Sagrada em Umbundu

¹ Eye wa popiavo vali lolondonge viaye hati, Kua kala omunu umue ohuasi haeye wa kala la kalei, kuenje kalei kaco ka sapuiwa kokuaye okuti ka sandola ovikuata viaye.

² Yu wa ka kovonga, wa popia lako hati, Eci nda ku yevela ca lomboloka ndati? Eca okonda yukalei wove momo ku tẽla oku linga vali kalei.

³ Kuenje kalei wa popia lutima waye hati, Omo ñala a kasi loku njupa ukalei, ndinga nye? Si kuete olohõlo vioku lima, okueya ku ndinga osõi.

⁴ A-a-a, ndi ci eci ndinga okuti oco va nambula volonjo viavo eci nundisua kukalei wange.

⁵ Oco wa pañinya olondevali via cime caye, omunu, omunu, yu wa popia lu wa tete, hati, Ciñami wa levala cime cange?

⁶ Eye wa kumbulula hati, Nda levala ocita cololata viulela. Kuenje kalei wa popia laye hati, Tambula ukanda wove, tumala lombili, soneha akui atãlo.

⁷ Wa pula ukuavo hati, Ove wa levala ciñami? Kuenje eye hati, Ame nda levala ocita colohumba viotiliku. Oco kalei wa popia laye hati, Tambula ukanda wove, soneha akui ecelãla.

⁸ Kuenje cime caco wa sivayaila kalei ka sungulukile okulunguka kuaye, momo omãla voluali lulo va velapo oku sokolola ocitumbulukila cavo, omãla vocinyi va sule.

⁹ Kuenje ndu lunguli siti, Talavayi lukuasi wa vĩha oku limuisa ava vo soli okuti eci ukuasi u taka vo tambuli volonjo ka vi pui.

¹⁰ U o linga esunga leci citito, eye o linga esunga leci ca lua, puãi u ka lingi esunga leci citito, eye ka lingi esunga leci ca lua.

¹¹ Oco, nda ka wa lingili esunga lukuasi wa vĩha helie u kundikili ukuasi wocili?

¹² Nda ka wa lingili esunga leci camale, elie o wihi eci cene?

¹³ Lomue ukuenje o tẽla oku vumba vacime vavali, momo pamue ukuavo u suvuka, lukuavo u sola; pamue ukuavo u sumba lukuavo u tomba. Ko tẽla oku vumba Suku kuenda ukuasi.

¹⁴ Va Fariseo, haivo vakuakusola olombongo, va yeva ovina evi viosi kuenje vo pembula.

¹⁵ Puãi eye wa popia lavo hati, Ene vu liyowisila kovaso omanu, puãi Suku wa kũlĩha ovitima viene. Momo eci ca sivayiwa lomanu, oco ku Suku ca linga umbondo.

¹⁶ Ovihandeleko lovaprofeto va kala toke ku Yoano. Tunde apa, ondaka yiwa yusoma wa Suku ya kundiwa, kuenje vosi va lisindiliyilamo.

¹⁷ Ca leluka ilu losi oku takata, okatosi kamuamue kovihandeleko oku imuha oco ca tĩla.

¹⁸ U o nyala ukãi waye kuenje o kuela ukuavo o linga ukahonga, lu o kuela ukãi wa nyaliwa la veyaye, layevo o linga ukahonga.

¹⁹ Kua kala omunu umue ohuasi, wa wala wala ohusu lovalatanya, oloneke viosi wa lia lia elau.

²⁰ Pombundi yaye eteke keteke pa pekayala ongeyi yimue ye yuka apute, onduko yayo Lasaru.

²¹ Lasaru wa livela oku likutisa olosĩsi via loluka komesa yohuasi. Ndaño olombua vieyaiya, via lesa apute aye.

²² Oco ongeyi ya fa, kuenje ovangelo va yi tuala ponete ya Avirahama. Ohuasi ya favo, kuenje va yi kenda.

²³ Eci ohuasi ya kala loku yambuka vonjembo, ya petula ovaso ayo, kuenje ya muila Avirahama ocipãla, kuenda Lasaru yo vonete yaye.

²⁴ Oco ohuasi ya vilikiya yiti, A tate Avirahama, va ndinge ohenda oku tuma Lasaru, a yave osungu yomuine waye vovava, oco a polise elimi liange, momo nda yambuka vulienge ulo.

²⁵ Puãi Avirahama wa linga hati, Amolange, ivaluka okuti, cina wa kala lomuenyo, ove wa kala lovina viove viwa, osimbu Lasaru a tala ohali. Cilo puãi, kulo, eye o lembelekiwa osimbu ove o kasi kohali.

²⁶ Kuenda vali, pokati ketu lene pa pindika ekungu linene okuti ava va yongola oku yokila kokuene ka va ci tẽla, haico vokesinya liene, lomue o tẽla oku yokila kulo.

²⁷ Oco ohuasi ya popia yiti, Nda oco, a tate, hu pinga okuti u tuma konjo ya tate.

²⁸ Momo ñasi la vamanjange vatãlo, oco a va imbe onumbi, sanga veyavo mulo veyambulo lilo.

²⁹ Puãi Avirahama wa linga hati, Va kuete Mose lovaprofeto, va va yeve.

³⁰ Kuenje ohuasi ya popia yiti, Hacoko a tate Avirahama, puãi te nda umue o tunda kovilangu kuenje enda kokuavo oco va likekembela akandu avo.

³¹ Avirahama wa kumbulula ohuasi, hati, Nda ka va yevi Mose lovaprofeto ka va yevi muẽle ndaño umue o pinduka kovilangu.