LUKA 15 - Embimbiliya - Bíblia Sagrada em Umbundu

¹ Ca kala okuti vakuakutambula elisimu, la vakuakandu, ovo va kala loku kokela kokuaye oku u yevelela.

² Va Fariseo la vakuavisonehua va ci ñuñuila, vati, Omunu u o linala lolondingakandu, kuenda o lia kumue lavo.

³ Oco Yesu wa va tela olusapo olu, hati,

⁴ Pokati kene hẽ, nda umue o kuete ocita colomeme, kuenje nda o nyelisapo yimue, ka si hẽ, akui ecea lecea kolomeme vekalasoko ha endi oku ka vanjiliya eyi ya nyelela toke a yi sanga?

⁵ Kuenje eci a yi sanga o yi imba kapepe lonjolela.

⁶ Kuenje eci eya kimbo, ongolola vakuavo lava a lisungue lavo, o popia lavo hati, Njolelisiko, omo nda sanga omeme yange ya nyelile.

⁷ Mopia lene siti, Haico kilu va yolela ca lua ukuakandu umuamue o likekembela akandu aye, akui ecea lecea komanu vakuesunga ka va sukila oku likekembela akandu, ci sule.

⁸ Pamue ukãi upi, nda o kuete ekui liolopalata, kuenje o nyelisa opalata yimuamue, ka miha ondiyelo loku komba vonjo oku yi sandiliya lutate toke a yi sanga?

⁹ Kuenje eci a yi sanga, ongolola vakuavo lava a lisungue lavo, o popia lavo hati, Njolelisiko, omo nda sanga opalata yange nda nyelisile.

¹⁰ Mopia lene siti, Haico pokati kovangelo va Suku pa kala onjolela eci ukuakandu umuamue a likekembela akandu aye.

¹¹ Eye wa popia vali hati, Omunu umue wa kala lomãla vaye vavali valume.

¹² Umalehe waco wa popia la isiaye hati, A tate, kovipako viove nepeleko onepa yange. Yu wa va tepela ipako viaye.

¹³ Kovaso yoloneke ka via luile, umalehe wa kongela cosi caye, yu wa enda kofeka kupãla, oko a sandowaila ovipako viaye viosi loku mamayala.

¹⁴ Eci a pesela cosi, oco vofeka yaco mueya onjala ya lua, kuenje eye wa fetika oku suka.

¹⁵ Oco wa enda, wa litumbika kumue ukuafeka yaco, yu wo tuma vovapia aye oku lisa olongulu.

¹⁶ Kuenje eye wa livela oku kutisa imo liaye lovingangu via lia lia olongulu, kuenje lomue wa wiha cimue.

¹⁷ Eci mueya olondunge, wa linga hati, Avoyo! oku sokolola vakuopange wa tate! Va kuete okulia ku va tẽla, kuenda ku supoka, osimbu ame fila kulo lonjala!

¹⁸ Ñatuka, ngenda ku tate, ha popia laye siti, A tate, nda lingila ilu ekandu kuenda ove.

¹⁹ Si sesamela oku tukuiwa vali omõlove, ndingise ño ndukuopange wove ukuanganyu.

²⁰ Kuenje wa katuka, wa enda ku isiaye. Puãi osimbu a kasi handi kupala, isiaye wo mola, kuenje wo kuatela ohenda, wa lupuka, wo limbila posingo, yu wo sipula.

²¹ Omõlaco wa popia laye hati, A tate, nda lingila ilu ekandu kuenda ove. Si sesamela oku tukuiwa vali omõlove.

²² Puãi isiaye wa popia lakuenje vaye hati, Yayuliko, kopi uwalo wa velapo, u walisi. Fuomehi onẽla komuine waye. U walisi olohaku kolomãi.

²³ Kopi okangombe ka netisua, ka ipayi, tu li, tu sanjuki.

²⁴ Momo omõlange u wa file, yu o kasi vali lomuenyo, wa nyelile yu wa sangiwa. Oco va fetika oku sanjuka.

²⁵ Omõlaye ukulu puãi wa kala vepia. Eci eya, oku pitila ocipepi lonjo, oco wa yeva oku sika loku cĩla.

²⁶ Yu wa kovonga ukuenje umue, wo pula hati, Oco hẽ, nye?

²⁷ Kuenje eye wo sapuila hati, Manjove weya, so wa ipaya okangombe ka netisua, momo wo tambula vali o ñuai.

²⁸ Puãi eye wa tema kuenje ka tavele oku iñila. Oco isiaye wa tunda oku u livondela.

²⁹ Eye puãi, oku kumbulula, wa popia la isiaye hati, Tala, anyamo a lua nda ku vumba, sia samele ocihandeleko cove, ndaño naito, haimo kua la nyiha cimue, ndaño okahombo okuti ndingila akamba vange ofesta.

³⁰ Puãi u omõlove wa lia ukuasi wove la vakahonga, eci eya, wo wipaila okangombe ka netisiwa.

³¹ Isiaye wo kumbulula, hati, Amõlange, ove o kasi ño-o hũ lame, kuenje cosi cange cove.

³² Ca tu sesamela oku sanjuka loku yolela momo u, manjove, wa file, yu o kasi vali lomuenyo, wa nyelile, yu wa sangiwa.