LUKA 13 - Embimbiliya - Bíblia Sagrada em Umbundu

¹ Haico kueya vamue vo sapuila ondaka ya va Galilea, vana osonde yavo Pilato a tenga lovilumba viavo.

² Eye wa va kumbulula hati, Wa soki hoti, Va Galilea vaco, omo va tala ohali yaco, ca lomboloka okuti ovo vakuakandu ca piãla, okuti va Galilea vakuavo ci sule?

³ Ndu sapuili siti, Hacoko, puãi ene, nda ko likekembela akandu ene, lene vosi vu nyõlehavo ndovo.

⁴ Pamue vali omanu vana ekui lecelãla, ombonge yo ko Siloama ya vondumũhĩla, yu ya va ipa. Wa soki hoti, Ovo vakuakandu ca piãla okuti vosi vakuavo va tunga vo Yerusalãi ci sule?

⁵ Ndu sapuili siti, Hacoko, puãi ene, nda ko likekembela akandu ene, lene vosi vu nyõlehavo ndovo.

⁶ Yu wa ta olusapo olu, hati, Omunu umue wa kala lukuyu wa tuikiwa vocumbo caye cayuva, kuenje weya oku kũlĩhisa nda hẽ kuli epako, puãi lalimue a sangako.

⁷ Yu wa popia lukuacumbo hati, Tala, unyamo ulo tatu ndeyaeya oku vanjiliya epako kukuyu u, kuenje sia la sangako limue. U timbula, u kavisila nye vali osi?

⁸ Kuenje ukuacumbo wo kumbulula, hati, A Ñala, u kale vali unyamo ulo, toke ndu putuila kuenda ñapako ombolela.

⁹ Oco nda wima epako enyamuali, ciwa, puãi nda ka wimi oco ci tava noke oku u timbula.

¹⁰ Yesu wa kala loku longisila vosunangonga yimue kesambata.

¹¹ Kuenje mua kala ukãi umue o kuetiwe locilũlu co velisa ekui lianyamo kanyamo ecelãla. Etimba liaye lia yondovala okuti oku petuka cocili ka ci tẽlele.

¹² Eci Yesu o mola, wo kovonga, kuenje wa popia laye, hati, Okãi, uvei wove wa ku tunda.

¹³ Oco Yesu wo kapa ovaka, kuenje haico a petuka, yu wa tumbangiya Suku.

¹⁴ Ukulu wosunangonga puãi, wa tema omo Yesu a sakula kesambata, oco wa popia lomanu, hati, Kuli oloneke epandu vi sesamela oku linga upange. Enjui voloneke viaco oku sakuiwa, eteke liesambata halioko.

¹⁵ Oco Ñala wo kumbulula, hati, A vakuambambe! Kuli hẽ umue umosi pokati kene okuti keteke liesambata ka kutulula ongombe yaye, pamue ocimbulu caye vocimanga, oku ka ci nyuisa?

¹⁶ Ukãi u, eye omõla a Avirahama, haeye wa kutiwa la Satana ekui lianyamo kanyamo ecelãla, ka co sungulukilile hẽ oku u kutulula kukolo waco keteke liesambata?

¹⁷ Osimbu a kala loku popia ovina evi ovanyali vaye vosi va kutiwa osõi, puãi omanu vosi va sanjukila ovikomo viosi via lingiwa laye.

¹⁸ Oco Yesu wa linga hati, Usoma wa Suku wa lisoka le? Ndu sokisa le?

¹⁹ Wa lisoka ndokalumema kombuto yulemba omunu wa ka nyañula, wa ka imba vocumbo caye. Kuenje ka tunda, ka linga uti, olonjila viovusenge via tunga ovianju viavio vovianja viawo.

²⁰ Wa linga vali, hati, Usoma wa Suku ndu sokisa le?

²¹ Wa lisoka letumbisa ukãi a nyañula kuenje wa li tengela voviyongelo vitatu viosema toke cosi ca tumba.

²² Wamako kungende waye loku longisa vovaimbo anene lovaimbo atito, oku enda ko Yerusalãi.

²³ Umue wo pula hati, A Ñala, ava va popeliwa hẽ, vañamiñami lika? Yesu wa popia lavo hati,

²⁴ Oku iñila, lileki oku pita puvelo wa sukatela, momo ndu sapuili siti, Va lua va sanda oku iñila kuenje ka va ci tẽla.

²⁵ Tuli muẽleonjo a katuka oku yika epito, ene wa talami posamua haico vu fetika oku totola kepito hoti, A Ñala, tu yikuluileko. Eye o vu tambulula hati, Oko wa tundi siko.

²⁶ Oco vu fetika oku linga hoti, Etu, tua lia lia loku nyuila kovaso ove, kuenje ove wa longisa valuwa etu.

²⁷ Eye puãi o popia hati, Oku wa tundi sia kũlĩhileko. Nundi vosi, wakuakulinga evĩho.

²⁸ Oco vu lila loku likeleketa kovayo eci vu mola Avirahama la Isake la Yakoba kuenda ovaprofeto vosi vusoma wa Suku, ene puãi wa tundisiwi.

²⁹ Kuenje omanu va tunda kutundilo lokutakelo, ko Norte lo ko Sul, veya va tumala komesa vusoma wa Suku.

³⁰ Ndu sapuilivo okuti vamue va sulako cilo, kotembo yaco ovo va teteka, kuenje vamue va teteka cilo, kotembo yaco ovo va sulako.

³¹ Ekumbi liaco hailio, vamue va Fariseo veya, va popia laye vati, Tundako, kuende, omo Herode o yongola oku ku ipa.

³² Yu wa popia lavo hati, Kuendi, ka sapuili okambulu kaco okuti etaili la hẽla nundisa ovilũlu kuenda sakula, eteke liatatu oco malusula.

³³ Haimo lumue etaili la hẽla la hẽlãnya, ngenda ño-o ungende wange momo ka ci tava okuti uprofeto o nyõlehela kuiñi te ko Yerusalãi.

³⁴ A Yerusalãi, a Yerusalãi, okuaku ipa ovaprofeto, loku sosola ava va tumiwa kokuove. Olonjanja via lua nda livela oku vutama omãla vove ndeci osanji yi vutama ovivuvu viayo vemi liavava ayo, kuenje ka wa taveli.

³⁵ Tali, cilo onjo yene yo siwili. Kuenje ndu sapuili siti, Ko moli vali, te vu popia, hoti, U iya vonduko ya Ñala a sivayiwe!