LUKA 12 - Embimbiliya - Bíblia Sagrada em Umbundu

¹ Osimbu a kala loku popia olohũlũkãi viomanu viongoloka okuti owiñi waco wa liliataila. Oco Yesu wa fetika oku popia tete lolondonge viaye, hati, Lunguki letumbisa lia va Fariseo, olio ombambe.

² Momo ka kuli eci ca tuvikiwa okuti ka ci tuvuka, ka kuli eci ca yombekiwa okuti ka ci kũlĩhiwa.

³ Cosi wa popeli vowelema ci yevala kutanya. Eci wa popeli volohondo vio vokati, oku ci loñuila vovatui, ci kalukilua kilu lionjo.

⁴ Akamba vange, mopia lene siti, Ko ka kuateli usumba ava okuti, eci va ipa etimba, noke ka va tẽla vali oku linga cimue.

⁵ Puãi ndu wilikili u wa sesameli oku u kuatela usumba. Kuateli usumba u okuti, eci a ipa, o tẽla oku imba vonjembo. Oco muẽle, mopia lene siti, U u kuateli usumba.

⁶ Olongungu vitãlo hẽ, ka vi landisua olosendu vivali? Kuenje layimue yavio yi ivaliwa kovaso a Suku.

⁷ Puãi ndaño esinga liovovitue viene lia tendiwa liosi. Ko ka kali lusumba. Ene wa velipo okuti olongungu via lua vi sule.

⁸ Mopia lene siti, U o linukuila kovaso omanu, haeye Mõlomanu u litukuilavo kovaso ovangelo va Suku,

⁹ Puãi u o liñalela kovaso omanu, haeye o likalelua kovaso ovangelo va Suku.

¹⁰ Wosi o lundila Mõlomanu cimue cu wecelua, puãi wosi o popia Espiritu Sandu etonãi, ka cu wecelua.

¹¹ Eci vo tuali volosunangonga, pamue kovaso olosoma lo kovaso olombiali, ko ka kali lohele yeci vu kumbulula pamue yeci vu popia,

¹² momo kola yaco muẽle Espiritu Sandu u longisi eci co sesameli oku popia.

¹³ Umue vowiñi wa popia la Yesu hati, Olongisi, va popie la huvange okuti o nepelako kocipiñalo.

¹⁴ Puãi Yesu wo kumbulula hati, Amunu, helie wo nukuili onganji pamue onepisi?

¹⁵ Kuenje wa popia lavo hati, Lunguki kuenda liuviki kocipululu cosi, momo omunu, ndaño ohuasi enene, haimo omuenyo waye ko fukile.

¹⁶ Yu wa va tela olusapo, hati, Ovapia ohuasi yimue a ima ca lua.

¹⁷ Kuenje wa likunda lutima waye, hati, Ndinga nye, momo si kuete omo ngunguila olomema viange?

¹⁸ Oco wa popia hati, Eci ndinga ceci, nungulula olosila viange oco nunga vimue vinene vali, kuenje omo soleka olomema viange viosi lovikuata viange.

¹⁹ Oco mopia lutima wange siti, Otima, o kuete ovikuata via lua via solekelua anyamo a lua, livala, lia, nyua, sanjuka.

²⁰ Puãi Suku wa popia laye hati, Vuveke, uteke ulo va ku upa omuenyo wove, oco evi wa vi pongiya hẽ, vi linga vielie?

²¹ Haico ci kala lu o lisiliyila ukuasi puãi ka kuete ukuasi wa Suku.

²² Kuenje wa popia lolondonge viaye hati, Oco, mopia lene siti, Ko ka kali lohele yomuenyo wene, hoti, Tu lia nye? ndaño yetimba liene hoti, Tu wala nye?

²³ Momo omuenyo wa velapo, okulia ku sule, kuenda etimba lia velapo, uwalo u sule.

²⁴ Sokololi ovikuamanga okuti, ka vimbi ombuto, ka vi ungola, ka vi kuete atambo, pamue osila, haimo Suku o vi tekola. Ene hẽ, ka wa velelipo ca lua okuti olonjila vi sule?

²⁵ Helie pokati kene o tẽla oku vokiya ukeya kutunga waye omo u kuetele ohele.

²⁶ Nda oco ci kasi okuti, ko tẽla oku linga ndaño eci citito, nye vu kuatela vikuavo ohele?

²⁷ Sokololi oloneleho, ndeci vi kula, ka vi lingi upange, ka vi poti, haimo mopia lene siti, Ndaño Salomone vulamba waye wosi ka walele uwalo wa posoka nda yimue yevi.

²⁸ Puãi Suku, nda o walisa ndoco onjunde yi kasi etaili vusenge kuenda hẽla yimbiwa vofolono, a vakuakolelo lititotito, ene hẽ, ko walisa hẽ ca velapo?

²⁹ Ko ka tatayali hoti, Tu lia nye, tu nyua nye? Ko ka kali lutima wa sakalala.

³⁰ Momo vakualofeka va sanda sanda ovina evi, ene puãi Isiene wa kũlĩha okuti vio sesameli.

³¹ Sandi puãi Usoma wa Suku, kuenje ovina evi viosi viu vokiyiwi.

³² Akacunda, ku ka kuate usumba, momo Isiene wa panga oku wihi usoma.

³³ Landisi evi vu kasi lavio. Ecaeci kolosuke. Litungili ovipete ka vi vuli. Kali lukuasi ko pui kilu oko ocimunu ka ci pitila ndaño ombunji ka yi nyõli.

³⁴ Momo oko ku kasi ukuasi wene, haiko ku kalavo utima wene.

³⁵ Iñi pimo, kuenda olondiyelo viene vi taime.

³⁶ Lingi ndomanu va lavoka ñala yavo oku tiuka kuvala, okuti, tuli iya kuenje o totola, haico vo yikuluila.

³⁷ Akuenje va sumũlũha vava okuti, eci cime cavo iya o va sanga ka va pekelele. Mopia lene siti, Ocili, eye muẽle iña pimo, o va tumalisa komesa, kuenje o linga ndukuenje wavo.

³⁸ Nda iya kocipo cavali, pamue catatu, kuenje o va sanga ndoco, akuenje vaco va sumũlũha muẽle.

³⁹ Puãi limbuki eci okuti, muẽleonjo, nda wa kũlĩhile ola yokuiya kuocimunu, nda wa lavuluile, kuenje nda ka sile okuti onjo yaye va yi tuiyila.

⁴⁰ Oco ene, liangiliyi. Momo Mõlomanu iya kola ka wa simili.

⁴¹ Petulu wo pula hati, A Ñala, etu wa tu tela olusapo olu ale, ele wa lu tela vosi?

⁴² Kuenje Ñala wa linga hati, Helie kalei kaco ka kolelua, haiko ka lunguka, okuti ñala yako yi ka tukuila vakuanjo yaye oku va iha ongaso yavo keteke liaco?

⁴³ Ukuenje okuti, cime caye u sanga ndoco eci eya, eye wa sumũlũha.

⁴⁴ Mopia lene siti, Ocili o-o u kundika ovikuata viosi a kuete.

⁴⁵ Puãi nda ukuenje waco o litana lutima waye hati, Cime cange keya ndopo, kuenje o fetika oku veta akuenje lafeko kuenda oku lia loku nyua kuenda oku kolua,

⁴⁶ cime cukuenje waco iya keteke ko lavokaile, kuenda kola ka kũlĩhile, kuenje u yambula ca piãla, loku u kapa kumue lava ka va sungulukile.

⁴⁷ Kuenje ukuenje wa kũlĩha ocipango ca cime caye, puãi ko pongiyilile, kuenje ka lingile ndeci cime caye a yongola, eye o tipuiwa ca lua.

⁴⁸ Puãi u ka ci kũlĩhile, kuenje wa linga evi via sesamela eyambulo, eye o tipuiwa ci sule. Wosi ihiwa ca lua, eye o kisikiwa ca lua. U wa kundikiwa ca lua, eye va pilika ca lua.

⁴⁹ Ndeyilila oku imba ondalu kilu lieve. Nda livela nda ya mihiwile ale!

⁵⁰ Kuli epapatiso okuti ndi papatisiwa lalio kuenda nda sakalala nye toke li telisua!

⁵¹ Wa soki okuti ndeya oku nena ombembua kilu lieve? Mopia lene siti, Ombembua hayoko te olonepele.

⁵² Momo tunde opo, vonjo yimuamue, nda mu kala vatãlo, va litepa, vatatu va liwengula la vavali, vavali va liwengula la vatatu.

⁵³ Oco va litepa, isia o liwengula lomõlaye ulume, lomõla ulume o liwengula la isiaye; ina o liwengula lomõlaye ukãi, lomõla ukãi o liwengula la inaye; ukãi o liwengula lukãi womõlaye, ndatembo yaco o liwengula la ina ya veyaye.

⁵⁴ Oco wa popiavo lowiñi hati, Nda vu mola elende li tundila kutakelo, haico vu linga hoti, Ombela yiya, kuenje yiya.

⁵⁵ Kuenje eci ofela yi tunda ko Sul vu linga hoti, Kuiya ocitenya, kuenje ciya.

⁵⁶ A vakuambambe, wa kũlĩhi oku limbuka ovina vio posi levi vio kilu. Ci kasi ndati okuti ka wa kũlĩhili oku limbuka ovina viotembo yilo?

⁵⁷ Nye ka vu tetuluila lesunga ene muẽle?

⁵⁸ Eci o kasi loku enda konganji lu wa ku pindika, kolisako oku lisokiya laye osimbu vu kasi vonjila, sanga o ku tuala ku soma, kuenje soma o ku eca konjambuli, kuenje onjambuli yi ku imba vokayike.

⁵⁹ Mopia love siti, Ku tundimo vali, toke wa feta olusendu lua sulako.