LUKA 11 - Embimbiliya - Bíblia Sagrada em Umbundu

¹ Yesu wa kala kumue loku likutilila, kuenje eci a mala, yimue polondonge viaye ya popia laye yiti, A Ñala, tu longise oku likutilila ndeci Yoano a longisa olondonge viaye.

² Yu wa popia lavo hati, Eci vu likutilila lingi hoti, A Tate, onduko yove yi sumbiwe. Usoma wove wiye.

³ Eteke keteke tu ihe okulia kuaco.

⁴ Tu ecele akandu etu, momo eta muẽle tu ecela vosi va tu kuetele olondaka. Kuenje ku ka tu songuile veyonjo.

⁵ Kuenje wa popia lavo hati, Nda umue pokati kene o kuete ekamba kuenje enda kokuaye vokati kuteke oku popia laye, hati, Akamba, ngundike olombolo vitatu,

⁶ momo ekamba liange wa enda ungende, weya konjo yetu, ame puãi si kuete eci ndu poka.

⁷ Eye puãi o kumbuluila vokati hati, Ku ka nduahalise. Epito lia yikiwa, kuenda omãla vange vava kumue lame vula, oco si ci tẽla oku pasuka si ku iha.

⁸ Mopia lene siti, Ndaño ka pasuka oku wiha omo ekamba liaye, haimo o pasukila olupili luaye ha wiha viosi a suka.

⁹ Kuenje mopia lene siti, Pingi kuenje cu wihiwi, vanjiliyi kuenje vu sanga, totoli, kuenje vo yikuluili.

¹⁰ Momo wosi o pinga, o tambula; u o vanjiliya, o sanga; u o totola, vo yikuluila.

¹¹ Pokati kene isia yi pi o kasi lomõla, nda u pinga olusi o wiha onyõha, olusi haluoko?

¹² Pamue nda o pinga esaila, o wiha enyenya?

¹³ Oco nda ene wa tuwi ale oku linga cĩvi, wa kũlĩhi oku eca oviali viwa komãla vene, Isiene ukuailu he, ka velipo oku avela Espiritu Sandu kuava vo pinga?

¹⁴ Yesu wa kala loku tundisa ocilũlu cutende. Eci ocilũlu ca tunda, oco ocitende ca popia, kuenje omanu va komoha.

¹⁵ Puãi vamue vati, O tundaisa ovilũlu lunene wa Belesevulu, osoma yovilũlu.

¹⁶ Puãi vakuavo oku u seteka, vo pinga ondimbukiso yokilu.

¹⁷ Puãi eye, omo a kũlĩha ovisimilo viavo, wa popia lavo hati, Ofeka nda yi litepa yi nyõleha kuenje onjo yi wila konjo yikuavo.

¹⁸ Satana nda wa litepa, usoma waye u tumala ndati? Momo vu linga hoti, O tundaisa ovilũlu lunene wa Belesevulu.

¹⁹ Puãi ame, nda nundisa ovilũlu lunene wa Belesevulu, omãla vene hẽ, va vi tundaisa lunene welie? Oco, ovo va linga olonetululi viene.

²⁰ Puãi nda nundaisa ovilũlu lumuine wa Suku, usoma wa Suku nda weya ale kokuene.

²¹ Ocindululu ca maleha, nda ci lava onjo yaco muẽle, oco ovikuata viaco vi kala lombembua.

²² Puãi nda ocindululu co velapo kongusu ciya, ci ci yula, ci ci punda ovimaleho viaco viosi ca kolelele, kuenje ci amula ovikuata viaye.

²³ U ka kasi lame o matãla, kuenje u ka kongela kumue lame o sandola.

²⁴ Eci ocilũlu ca vĩha ca tunda vomunu ci tungayala vakango omo ka muli ovava, oku sanda epuyuko, kuenje eci ka ci li sangi, oco ci popia citi, Niukila vonjo yange omo nda tunda.

²⁵ Eci ciya ci sanga onjo yaye upolokoso, ya kombiwa kuenda ya yanguiwa.

²⁶ Oco'cenda, ci kopilila ovilũlu vikuavo epanduvali via vĩha ca lua, oco omẽle ci sule, kuenje oku iñila vi tungamo. Oco esulilo liomunu waco lĩvi, ndeci a kaile hise.

²⁷ Osimbu a kala loku popia ovina evi, ukãi umue vowiñi wa popia laye lolukandi hati, Imo lia ku cita lia sumũlũha, ndaño avele wa nyama laovo a sumũlũha.

²⁸ Yesu puãi wa kumbulula hati, Oco muẽle, puãi ava va yeva ondaka ya Suku kuenje va yi pokola ovo va sumũlũha ca velapo.

²⁹ Osimbu omanu va kala loku ongoloka, eye wa fetika oku popia, hati, Ocitumbulukila eci ocitumbulukila ca vĩha ci sanga ondimbukiso, kuenje ka cihiwa ondimbukiso te eyi ya Yona.

³⁰ Momo ndeci Yona a linga ondimbukiso ku va Ninivei, haico Mõlomanu a linga ondimbukiso kocitumbulukila cilo.

³¹ Nasoma yo ko Sul o pindukila kekanga kumue lalume vocitumbulukila cilo, kuenje o va pisa. Momo wa tunda kesulilo lioluali oku iya oku yeva olondunge via Salomone, kuenje tala, kulo kuli u wa velapo, okuti Salomone o sule.

³² Alume va Ninivei va pindukila kekanga kumue locitumbulukila cilo, kuenje va ci pisa momo ovo va likekembela akandu poku yeva ohundo ya Yona, kuenje tala, kulo kuli umue wa velapo okuti Yona o sule.

³³ Lomue, eci a miha ondiyelo, o yi kapa velungi pamue vemi lionjongo, te komesa, okuti ava va iñila va mola ocinyi.

³⁴ Iso liove olio ondiyelo yetimba liove. Eci iso liove li kasi luhayele oco etimba liove liosi li kasi locinyi. Puãi, eci iso liove ka li kasi luhayele, oco etimba liove li kasi lowelema.

³⁵ Oco lunguka, sanga mbi ocinyi covokati kove ci linga owelema.

³⁶ Oco, nda etimba liove liosi li kasi locinyi, okuti lapamue pali owelema, vetimba liosi mu tuila ocinyi, ndeci ci kasi eci ondiyelo yi ku tuila ocinyi lokutaima kuayo.

³⁷ Eci a kala loku vangula, u Fariseo umue wo laleka oku lia laye ongau. Oco wa iñila kuenje wa tumala komesa.

³⁸ Kuenje u Fariseo, eci a mola okuti ka liyelisile osimbu ka lile ongau, wa komoha.

³⁹ Kuenje Ñala wa popia laye hati, Ene a va Fariseo, vu yelisa ño koñoño yonganja leyi yelonga. Puãi vokati kene mue yuka ocipululu levĩho.

⁴⁰ Waveke! Usovoli woñoño heyeko wa sovolavo okati?

⁴¹ Ca velapo, yelisi tete vokati. Kovaso yaco ovina viosi vi yela kokuene.

⁴² A va Fariseo, ngongo yene! Momo vu tepa tepa onepa yekui kocimbumba lo kocelo lo kovikũla viosi vitito, kuenje vu lomboka esunga locisola ca Suku. Evi viesunga locisola ovio vio sesameli oku linga, kuenje ka vi tateka oku suisapo vikuavo.

⁴³ A va Fariseo, ngongo yene, momo vu sole olomangu vio kovaso volosunangonga, kuenda ovilamo viovovitanda.

⁴⁴ Ngongo yene muẽle, momo wa soki ndayambo ka a moleha, kuenje omanu va pitako ka va ci.

⁴⁵ Ulongisi umue wovihandeleko wo kumbulula hati, Olongisi, oku popia ovina evi, o tu popiavo?

⁴⁶ Yesu wa linga hati, Alongisi vovihandeleko, lenevo, ngongo yene, momo vu tuika omanu ovitele viovinjangatela, kuenje ene ko lambi ovitele viaco lomuine umue wene.

⁴⁷ Ngongo yene, momo ovaprofeto vana vaisiene va ipa ene vu va tungila olosonje.

⁴⁸ Oco wa lingi olombangi kuenje wa tavi okuti ovilinga via vaisiene viesunga, momo ovo va va ipa kuenje ene vu va tungila olosonje.

⁴⁹ Oco olondunge via Suku via popela viti, Numa kokuavo ovaprofeto lovapostolo, kuenje vamue, va va ipa, vamue, va va kangisa.

⁵⁰ Via ci popela okuti oco osonde yovaprofeto yosi, yina ya peseka tunde koku lulika oluali, yi fetuluinyilua ocitumbulukila cilo,

⁵¹ tunde kosonde ya Abel toke kosonde ya Sakariya, u wa ipailua pokati kutala lonembele. Ocili muẽle, mopia lene siti, Yi fetuluinyilua ocitumbulukila cilo.

⁵² A vakuavisonehua, ngongo yene, momo wopi osapi yukũlĩhiso. Ka wa iñilili ene muẽle, kuenje wa tateki ava va soka oku iñila.

⁵³ Kuenje eci a tundako, oco vakuavisonehua la va Fariseo va fetika oku u sinda ca lua loku u kongiliya okuti o popia ovina via lua,

⁵⁴ ha vo lavulula oku u kuata londaka yimue yi tunda vomẽla waye.