LUKA 10 - Embimbiliya - Bíblia Sagrada em Umbundu

¹ Oco kovaso yovina evi Ñala wa nola vali akui epanduvali komanu, kuenje wa va tuma vavali, vavali, okuti vo pitila kovaso oku enda kovaimbo osi lo kolofeka viosi oko a soka oku pita eye muẽle.

² Kuenje wa popia lavo hati, Oku ungula kua lua, puãi olondingupange viñamiñami. Oco, pingi ku Ñala yoku ungula oco a tume olondingupange koku ungula kuaye.

³ Kuendi. Ñasi loku vu tuma ndolomeme pokati kolombinji.

⁴ Ko ka ambati ocipete, ndaño opatolonya, ndaño olohaku. Ko ka pasuisi umue kungende wene.

⁵ Nda wiñili vonjo oku singamo, tete popi hoti, Ombembua yi kale lonjo yilo.

⁶ Nda u o kasimo o sole ombembua, ombembua yene yi kala laye, puãi nda ka yi sole yi kondoka kokuene.

⁷ Vonjo yaco vu singa li loku nyua ovina vo wihi, momo ondingupange ya sesamela onima yayo. Ko ka sondayali kolonjo.

⁸ Olonjanja viosi eci wiñili vimbo limue kuenje vo hindikisi, li ovina vo poki.

⁹ Sakuli olombei vi kasimo. Popi lavo hoti, Usoma wa Suku weya ocipepi lene.

¹⁰ Puãi, olonjanja viosi eci wiñili vimbo limue kuenje ka vo hindikisi, tundili valuwa imbo liaco, kuenje popi hoti,

¹¹ Ndaño oneketela yimbo liene yi lamelelela kolomãi vietu, tu yi puenyelako, haimo limbuki eci okuti, Usoma wa Suku weya ocipepi lene.

¹² Puãi mopia lene siti, Keteke liekanga, Sodomo hise limbo liaco.

¹³ A Horasene, ngongo yove. A Betesaita, ngongo yove, momo ovonene a lingilua vokati kene nda a lingiwilile vo Turo lo vo Sidono, nda va likekembela akandu avo osimbu, loku wala ikẽleyi kuenda oku tumala vetiko.

¹⁴ Kekanga, Turo la Sidono hise lene.

¹⁵ Lovevo, a Kafarinau, o liamisa kilu? O lokila vonjembo.

¹⁶ U o vu yeva o njeva ame, lu o vu likala o liñala ame, lu o liñala ame o likala u wa numa.

¹⁷ Akui epanduvali aco a tiuka lonjolela, vati, A Ñala, ndaño ovilũlu via pokola kokuetu vonduko yove.

¹⁸ Eye wa popia lavo hati, Nda mola Satana wa loka kilu ndociliakulo.

¹⁹ Kũlĩhi okuti ndo wihi unene woku kosa olonyoha lanyenya, lowu woku nyõla ongusu yosi yunyali. Lacimue cu lingi lãvi.

²⁰ Haimo lumue, ko ka yoleli omo ovilũlu via pokola kokuene, yoleli puãi omo olonduko viene via sonehiwa vilu.

²¹ Kola yaco Yesu we yukililua lesanju li'Espiritu Sandu, wa popia hati, Pandu, pandu kokuove, a Tate, a Ñala yokilu loposi, omo wa sitikila ovina evi kolonoño kuenda ku vakualondunge, kuenje wa vi situluila koloñaña. Ocili, a Tate, wa ci linga omo oco ca ku sungulukila.

²² Ovina viosi via ñundikiwa la Tate. Lomue wa kũlĩha Omõla te Isiaco, kuenje lomue wa kũlĩha Isia, te Omõlaco, kuenda u Omõlaco a panga oku u situluila.

²³ Oco, oku pongolokela lika kolondonge, wa popia lavio hati, Ovaso a lete eci ene vu lete a sumũlũha.

²⁴ Momo mopia lene siti, Ovaprofeto va lua lolosoma va yonguile oku mola eci ene vu lete, kuenje ka va ci muile, va yonguile oku yeva eci ene vu yevite kuenje ka va ci yevele.

²⁵ Kuenje ulongisi umue wovihandeleko wa votoka oku u seteka, wo pula hati, Olongisi, ndinga nye okuti ñuata omuenyo ko pui?

²⁶ Yesu wo kumbulula, wo pula hati, Vovihandeleko he, mua sonehiwa nye? O tangamo ndati?

²⁷ Eye wa kumbulula hati. Sola Yehova Suku yove lutima wove wosi, lomuenyo wove wosi, lolohõlo viove viosi, lolondunge viove viosi, kuenda vali, sola u o lisungue love ndeci o lisole ove muẽle.

²⁸ Kuenje Yesu wa popia laye hati, Wa kumbulula ciwa. Ci linga, kuenje o kuata omuenyo.

²⁹ Puãi eye, omo a yongola oku liyowisa wa popia la Yesu hati, U o lisungue lame helie?

³⁰ Yesu wa kumbulula hati, Omunu umue wa tunda ko Yerusalãi kuenje wa kala loku lokila ko Yeriko, yu wa sikila peka liovingumba, vio lula, vio tota olombole, kuenje oku tunda, vio sia lokamuenyo kimbanda.

³¹ Oco ca veta ño okuti ocitunda cimue ca kala loku lokilavo konjila yaco, kuenje eci co mola co pitahala ombamba.

³² Lu Lewi umue le, haico a linga eci a keya kuenje wo mola wo pitahala ombamba.

³³ Puãi u Samária umue wa kala kungende kuenje weya oko a kasi, yu, eci o mola, wo kuatela ohenda.

³⁴ Oco wa kokela kokuaye, kuenje wa kuta apute aye oku itilako ulela lovinyu, loku u kapa kocimbulu caye, wo tuala konjo yolongende yu wo tata.

³⁵ Hẽla yaco wa pola olosingu vivali, yu wa vi eca ku muẽleonjo, hati, U tata, la cosi o pesela vali, eci njiya vali, hu ci tiuwila.

³⁶ Pokati kava vatatu, wa soka huti, Wa linga ndu a lisungue luna wa tokeka lovingumba, helie?

³⁷ Kuenje eye hati, Yu wo linga ohenda. Yesu wa popia laye hati, Kuende, lovevo ka lingainge ndoco.

³⁸ Oco, eci va amako kungende wavo Yesu wa iñila vimbo limue, kuenje ukãi umue, onduko yaye Marta, wo laleka vonjo yaye.

³⁹ Marta wa kala lumue manjaye, onduko yaye Maria, eye wa tumala polomãi via Ñala oku yeva olondaka viaye.

⁴⁰ Puãi Marta wa sakalala lokupoka kua lua, yu weya hati, A Ñala, ka cu ku lingi cimue pua omo manjange a sia lika liange oku poka? U pañinya, a ñuatiseko.

⁴¹ Puãi Ñala wo kumbulula hati, A Marta, a Marta, o kasi lohele ya lua, kuenje wa tokotelua lovina via lua.

⁴² Cimuamue lika ci sukiliwa. Maria wa nolapo eci ca velapo kuenje ka cu nyehiwa.