LUKA 1 - Embimbiliya - Bíblia Sagrada em Umbundu

¹ A Ñala Teofilo, omo va lua va seteka oku soneha esapulo liovina via lingiwa pokati ketu,

² ndeci via tu sapuilua etu lava va linga olombangi loloñuatisi viondaka, tunde kefetikilo,

³ lomo nda kũlĩhisa ovina viosi lutate tunde kefetikilo liavio, oco nda soka siti, Ciwa oku ku sonehela viosi ndeci vi likuã

⁴ okuti o limbuka ocili colondaka wa yeva ño lovatui.

⁵ Koloneke via Herode, Soma yo ko Yudea, kua kala ocitunda, onduko yaco Sakariya, haeye ukuacipo ca Aviya. Ukãi waye ukuepata lia Arone, onduko yaye Elisavete.

⁶ Kavali kavo vakuesunga kovaso a Suku, va enda enda lovihandeleko lovisila viosi via Ñala loku pua eko.

⁷ Puãi ka va kaile lomõla, momo Elisavete osiũle, kuenje kavali kavo va pitahãla ale oloneke viavo.

⁸ Oco osimbu Sakariya a kala loku linga upange wutunda kovaso a Suku, kocipo caye,

⁹ ndovihandeleko viutunda, wa vetiwa locela oku iñila vonembele ya Ñala oku timiha insensu.

¹⁰ Owiñi wosi womanu wa kala loku likutilila posamua, kola yinsensu.

¹¹ Kuenje ungelo wa Ñala wo tukulukila, wa talama kondio yutala winsensu.

¹² Oku u mola, Sakariya wa lisalukako, usumba wo kuata.

¹³ Puãi ungelo wa popia laye hati, A Sakariya, ku ka saluke ño, momo elombelo liove lia yevala. Ukãi wove Elisavete o ku citila omõla, kuenje u luka Yoano.

¹⁴ Ove o kala lonjolela lesanju, kuenje va lua va sanjukila okucitiwa kuaye,

¹⁵ momo o linga unene kovaso a Ñala. Ka nyui ovinyu levi vi koluisa, puãi o yuka Espiritu Sandu tunde vimo lia inaye.

¹⁶ O pongoluisila omãla va lua va Isareli ku Yehova Suku yavo.

¹⁷ U pitila kovaso lespiritu lunene we Eliya, oku pongoluisila ovitima via vaisia komãla vavo, levi via vakuakusina kolondunge via vakuesunga, oku angiliyila Ñala omanu vo sungulukila.

¹⁸ Sakariya yu wa popia lungelo hati, Eci, ndi ci kũlĩha ndati? Momo ndi sekulu kuenda ukãi wange wa pitahãla ale oloneke viaye.

¹⁹ Ungelo wo kumbulula hati, Ame Gabrieli, nalayama kovaso a Suku. Nda tumiwa oku vangula love loku ku sapuila ondaka eyi yiwa.

²⁰ Kuenje tala, o linga ocitende, ku tẽla oku popia vali, toke keteke ovina evi vi lingiwa, omo kua kolelele olondaka viange, evi vi tẽlisiwa keteke liavio.

²¹ Oco omanu va talamela Sakariya, kuenje va komoha osimbu yaco a kala vonembele.

²² Eci a tunda, ka tẽlele oku popia lavo, kuenje va limbuka okuti wa mola owima vonembele. Eye wa va ilaikaila ño kuenje wa kala ño ocitende.

²³ Eci ocipo cupange waye ca pua, wa enda konjo yaye.

²⁴ Kovaso yoloneke viaco Elisavete ukãi waye wa mina kuenje wa salama olosãi vitãlo, momo hati,

²⁵ Eci, oco Ñala a ci ndingila koloneke a mbanja, oku njupa epembe pokati komanu.

²⁶ Oco kosãi yepandu ungelo Gabrieli wa tumiwa la Suku kimbo limue lioko Galilea, onduko yalio Nasara.

²⁷ Wa tumiwa kufeko wa tindikiwa lulume, onduko yaye Yosefe, eye ukuepata lia Daviti. Onduko vufeko Maria.

²⁸ Yu weya kokuaye kuenje wa popia laye hati, Nãho kalunga, okuesumũlũho. Ñala o kasi kumue love.

²⁹ Puãi Maria wa salukila ondaka yaco, kuenje wa sokolola vutima waye hati Ocilamo eci ca lomboloka ndati?

³⁰ Oco ungelo wa popia laye hati, A Maria, ku ka yokoke, momo Suku wa ku nolela esumũlũho.

³¹ Kuenje tala, o mina, o cita omõla ulume u luka YESU.

³² Eye o linga unene, o tukuiwa Mõla a Tõlo, kuenje Yehova Suku o wiha ocalo ca isiaye Daviti.

³³ O viala ño-o hũ epata lia Yakoba, kuenje usoma waye ko sulila.

³⁴ Oco Maria wa pula ungelo hati, Eci hẽ, ci tava ndati? Ulume sio kũlĩhile.

³⁵ Ungelo wo kumbulula hati, Espiritu Sandu o ku wila, lunene wa Tõlo u ku tuvika. Oco omõla o citiwa o tukuiwa O kola, Eye Mõla a Suku.

³⁶ Kuenje tala, ngandiove Elisavete, haeye wa kuka, o misi omõla ulume. U wa tukuiwile osiũle o kasi losãi yepandu.

³⁷ Momo ka kuli eci ka ci tẽliwa la Suku.

³⁸ Oco Maria wa popia hati, Tala, ndupika wa Yehova. Ci ndingiwe ndondaka yove. Ungelo yu wo sia.

³⁹ Koloneke viaco Maria wa katuka kuenje wa enda lokanyanyu kofeka yolomunda, kimbo lio ko Yuda.

⁴⁰ Wa iñila vonjo ya Sakariya yu wa lama Elisavete.

⁴¹ Eci Elisavete a yeva ocilamo ca Maria oco omõla vimo wa lisenga, kuenje Elisavete wa yukisua Espiritu Sandu.

⁴² Yu wa vilikiya lolukandi hati, Pokati kakãi ove muẽle wa sumũlũha, lepako limo liove lia sumũlũha.

⁴³ Ame nda noliwila nye okuti ina ya Ñala yange iya kokuange?

⁴⁴ Momo tala, eci ondaka yocilamo cove ya yevala vovatui ange, oco omõla vimo wa lisenga lonjolela.

⁴⁵ U wa kolela okuti ovina Ñala a popia laye vi lingiwa, wa sumũlũha.

⁴⁶ Kuenje Maria iva linga hati, Utima wange u pandiya Yehova,

⁴⁷ lespiritu liange li nyamuila Suku, upopeli wange,

⁴⁸ momo wa vanja ukukui wupika waye. Momo tala, tunde opo, ovitumbulukila viosi vi nukula viti, Wa sumũlũha.

⁴⁹ Momo Fu wa ndingila ovina vinene, kuenje onduko yaye yi kola.

⁵⁰ Ohenda yaye yi kasi lava vo sumbila, tunde kocitumbulukila toke kocitumbulukila cikuavo.

⁵¹ Eye wa linga ovonene lokuokuo kuaye. Wa sandola vakuemande lovipango viovitima viavo,

⁵² haeye wa tundisa olombiali kolomangu viavio, kuenje wa kemalisa omanu vaño.

⁵³ Wa kutisa vakuanjala ovina viwa. Wa tundisa olohuasi upolokoso.

⁵⁴ Wa kuatisa ukuenje waye Isareli, oku ivaluka ohenda yaye,

⁵⁵ ndeci a popia la vaisietu hati, Ndinga Avirahama lombuto yaye ohenda toke koloneke ka vi pui.

⁵⁶ Kuenje Maria wa kala laye ca soka ndolosãi vitatu, oco a tiukila konjo yavo.

⁵⁷ Eci oloneke via Elisavete vioku cita via tẽla, oco wa cita omõla ulume.

⁵⁸ Ava va lisungue laye la vangandiaye va yeva okuti Yehova wo linga ohenda ya lua, kuenje va sanjukila kumue laye.

⁵⁹ Oco keteke liecelãla veya oku sevisa omõla, kuenje va sokele oku u luka Sakariya, haiyo onduko ya isiaye.

⁶⁰ Puãi inaye wa linga hati, Oyo hayoko, o lukiwa Yoano.

⁶¹ Kuenje va popia laye vati, Lomue ngandiene wa lukiwa londuko eyi.

⁶² Kuenje va popia la isiaco lovoko vati, O yongola oku u luka elie?

⁶³ Isiaco wa pinga evaya lioku sonehela, kuenje wa sonehako hati, Onduko yaye Yoano. Oco vosi va komoha.

⁶⁴ Haico omẽla waye wa situluka lelimi liaye lia kutuluka, kuenje wa popia loku sivaya Suku.

⁶⁵ Usumba wa kuata vosi va lisungue lavo, kuenje olondaka evi viosi via yevala kuosi kolomunda via Yudea.

⁶⁶ Vosi va vi yeva va vi patekela vovitima viavo, vati, Omõla u o linga ndati? Momo eka lia Yehova lia kala kumue laye.

⁶⁷ Isiaye, Sakariya, we yukisua Espiritu Sandu, kuenje wa imba owanji, hati,

⁶⁸ Yehova, Suku ya Isareli, a sivayiwe, momo wa vanja komanu vaye kuenje wa va yovola.

⁶⁹ Wa tu katuila onjovoli ya pama vonjo yukuenje waye Daviti,

⁷⁰ ndeci a popela kimẽla viovaprofeto vaye va kola tunde kosiahũlu.

⁷¹ Wa likuminya oku tu popela kovanyali vetu, lo povaka ava vosi va tu suvuka,

⁷² loku linga olosekulu vietu ohenda, kuenda oku ivaluka ohuminyo yaye yi kola,

⁷³ haiyo ohuminyo a likuminya la kukululu Avirahama,

⁷⁴ okuti etu, eci tu popelua povaka ovanyali vetu, tu u vumba, usumba lakamue,

⁷⁵ loku kala kovaso aye lesunga kuenda ocili oloneke viosi viomuenyo wetu.

⁷⁶ Love, amõlange, o tukuiwa uprofeto wa Tõlo, momo o pita kovaso a Ñala oku sokiya olonjila viaye,

⁷⁷ loku imba omanu vaye onumbi yukũlihiso wepopelo, haiwo wongecelo yakandu avo,

⁷⁸ yina yi sangiwa omo Suku yetu o kasi lohenda. Epopelo liaco liya eci ongula yokilu yi tu cila,

⁷⁹ ocinyi cayo ha ci tuila ava va tumala vowelema lo vulembo wokufa, loku songuila olomãi vietu vonjila yombembua.

⁸⁰ Kuenje omõlaco wa kula, yu wa kolapo vutima, kuenje wa kala vekalasoko toke koloneke a limolehisa ku Isareli.