LIOLONGANJI 9 - Embimbiliya - Bíblia Sagrada em Umbundu

¹ Avimeleke, omõla a Yerubaale, wa enda ko Sekeme, ku vainanu yaye, yu wa popia lavo kumue lepata liosi lioluina luaye, hati,

² Ndu pingi, puli olonungi viosi via Sekeme, hoti, Co velelipo ci pi, oku vialiwa lomanu akui epanduvali, haivo vosi omala va Yerubaale, ale oku vialiwa lomanu umuamue lika? Ivalukivo okuti ame ndikepa liene kuenda ndisitu yene.

³ Vainanu yaye va popia olondaka evi viosi lolonungi viosi via Sekeme. Kuenje ovitima viavo via tekela koku kuama Avimeleke, momo vati, Eye ngandietu.

⁴ Va wiha akuĩ epanduvali kolosiekele viopalata vopa vonjo ya Baale Beriti. Avimeleke wa fetela lavio alume vakuesanda, va palõha, haivo vo kuama.

⁵ Yu wa enda konjo ya isiaye, kOfira, kuenje wa ipaila vamanjaye omãla va Yerubaale kewe limuamue. Va soka akuĩ epanduvali komanu. Puãi Yotama, kuasula kua Yerubaale, wa supapo, momo wa salamele.

⁶ Olonungi viosi via Sekeme levi viosi via Milo via liongolola, yu va enda kongunji yocinendele ko Sekeme, kuenje va vialeka Avimeleke ha lingi Soma.

⁷ Va ci sapuila Yotama, kuenje wa enda, wa talama kilu liomunda Gerisimi. Wa vilikiya lolukandi, yu wa popia lavo hati, Ene amanu va Sekeme, njeveleli, oco Suku o yeveleli.

⁸ Eteke limue, oviti via katuka ha vi ka livialekela osoma. Via popia luti woliveira viti, Linga osoma yetu.

⁹ Puãi uti woliveira wa popia lavio hati, Ndi liwekapo nga kulela wange, una va sivayaila lawo olosuku lomanu, si ka telela kilu lioviti?

¹⁰ Oco ovita via popia lukuyu, viti, Enju, ndo linge osoma yetu.

¹¹ Puãi ukuyu wa popia lavio hati, Ndi liwekapo nga kokusõsa kuange lokepako liange li pepa si ka telela kilu lioviti?

¹² Oco ovita via popia luyuva viti, Enju, ndo linge osoma yetu.

¹³ Puãi uyuva wa popia lavio hati, Ndi liwekapo nga kovinyu viange, vina vi sanjowaisa olosuku lomanu, si ka telela kilu lioviti?

¹⁴ Oco oviti viosi via popia locikuala viti, Enju, ndo linge osoma yetu.

¹⁵ Ocikuala ca popia loviti citi, Nda vu mbuaveka ocili si lingi osoma yene, oco enjui, ndo vundi vulembo wange. Nda hacoko, ocikuala ci tunda ondalu yi lia olo-cedro via Levanone.

¹⁶ Oco cilo, wa lingi hẽ esunga locili oku vialeka Avimeleke ha lingi osoma? Wa lingi hẽ ciwa la Yerubaale lepata liaye? Wo muisi hẽ eci ca sesamẽla ovilinga viaye?

¹⁷ Momo tate wo yakeli, wa kuata omuenyo waye peka, kuenje wo popeli povaka a Midiane.

¹⁸ Puãi ene etaili wa ñualelipo epata lia tate. Wa ipaili omala vaye kewe limuamue. Va soka akui epanduvali komanu. Kuenje wa vialeki Avimeleke, omõla upika waye, ha lingi Soma ya va Sekeme, momo eye ngandiene.

¹⁹ Oco etaili lilo, nda wa lingi esunga locili ku Yerubaale, eye kumue lepata liaye, oco sanjukili ño Avimeleke, leye o sanjukilevo.

²⁰ Nda hacoko, ku Avimeleke ku tunde ondalu yi lia olonungi via Sekeme, levi via Milo. Lokolonungi via Sekeme levi via Milo, ku tunde ondalu yi lia Avimeleke.

²¹ Yotama wa siõsiõloha, yu wa tila. Wa enda ko Bere. Oko a tumala, momo wa kuatela huvaye Avimeleke usumba.

²² Avimeleke wa viala anyamo atatu kIsareli.

²³ Suku wa tuma espiritu livi pokati ka Avimeleke la va Sekeme. Kuenje va Sekeme va lingila Avimeleke usuanji,

²⁴ oco ekundu lia sangele omãla va Yerubaale akuĩ epanduvali li fetuluinyiwe, losonde yavo oco yi wile huvavo Avimeleke una wa va ipa, la va Sekeme vana va pamisile ovaka aye, ha ipaya vamanjaye.

²⁵ Va Sekeme oku sakalaisa Avimeleke va kapa alume va lavekela kovailu olomunda, yu va punda punda vosi va pita vonjila ocipepi lavo. Oco va ci sapuila Avimeleke.

²⁶ Gaala, omõla a Evede, weya kumue lavangandiaye, kuenje va kala ko Sekeme. Va Sekeme vo kolela.

²⁷ Va enda kovapia. Vongula ayuva koviumbo viavo viayuva. Va a kosa, yu va linga ocipito. Va iñila vonjo yosuku yavo. Va lia, va nyua, kuenje va siñala Avimeleke.

²⁸ Gaala, omõla a Evede, hati, Avimeleke eye eli okuti etu tu va Sekeme tu u vumba? Omõla a Yerubaale kumue la kesongo kaye Sevulu, ka va vumbile hẽ omanu va Hamore, sekulu ya Sekeme? Oco hẽ, etu tu u vumbila nye?

²⁹ Omanu valo, nda va kaile peka liange, nda hĩse, nda nda tundisa Avimeleke. Nda nda popia la Avimeleke siti, Vokiya kolohoka viove, katuka.

³⁰ Sevulu, ombiali yimbo, eci a yeva olondaka via Gaala, omõla a Evede, onyeño yaye ya wenguka.

³¹ Wa tuma olomunga kAruma, ku Avimeleke, hati, Ota, Gaala, omõla a Evede, kumue lavangandiaye, veya ko Sekeme. Kuenje va kasi loku tutuminya imbo ha va ku ñualelapo.

³² Oco cilo katuka uteke, ove kumue lomanu va kasi love. Lavekeli vovisenge.

³³ Omele, eci ekumbi li tunda, katuka, undumuhila imbo. Kuenje eci Gaala lomanu va kasi laye va ku tundila, linga lavo ndeci o tẽla.

³⁴ Avimeleke kumue lomanu vosi va kala laye va katuka uteke. Va litepa kovisoko vikuãla, kuenje va lavekela vonutula ya Sekeme.

³⁵ Gaala, omõla a Evede, wa tunda, wa talama kepandavelo liombundi yimbo. Avimeleke kumue lomanu va kala laye va tunda vonutula.

³⁶ Eci Gaala a mõla omanu vaco, wa popia la Sevulu hati, Tala, kovailu olomunda ku tundilila omanu. Sevulu wa popia laye hati, O lete ocilembo colomunda, kuenje huti, omanu.

³⁷ Gaala wa popia vali hati, Tala vokati kofeka mu tundilila omanu, kuenda ohoka yimue yiya lonjila yokocinendele cavakuakutaha.

³⁸ Oco Sevulu wa popia laye hati, Omela wove u kasi pi? Cina wa popele huti, Avimeleke eye eli, okuti tu u vumba? Ava havoko hẽ omanu vana wa pembuile? Tunda yapa, o liyake lavo.

³⁹ Gaala wa pita kovaso ya va Sekeme, kuenje wa liyaka la Avimeleke.

⁴⁰ Avimeleke wo lundula, leye wa tila kovaso aye. Va lua va fa ongambu, toke kepandavelo liombundi.

⁴¹ Avimeleke wa tumala kAruma. Kuenje Sevulu wa tundisa Gaala kumue lavangandiaye, oco ka va ka tunge vali ko Sekeme.

⁴² Hẽla liaco, omanu va tunda, yu va enda vusenge. Kuenje Avimeleke vo ci sapuila.

⁴³ Eye wa enda lohoka yaye, wa yi tepa kovisoko vitatu, kuenje wa lavekela vusenge. Wa vanja, kuenje ota, omanu va tunda vimbo, vo veya. Oco wa va katukila, yu wa va kundula.

⁴⁴ Avimeleke locisoko ca kala kumue laye va liulumuila kovaso, kuenje va talama kepandavelo liombundi yimbo, osimbu ovisoko vikuavo vivali viondumuhila vosi va kala vusenge, kuenje via va kundula.

⁴⁵ Eteke liaco liosi Avimeleke wa yaka limbo. Wa kuata imbo, yu wa ipa omanu va kalamo. Wa keleñala imbo, yu wa wayamo omongua.

⁴⁶ Omanu vosi vokombonge ya Sekeme eci va ci yeva, va iñila vocilala conjo ya suku Beriti.

⁴⁷ Avimeleke vo sapuila okuti omanu vosi vokombonge ya Sekeme va liongoluila pamosi.

⁴⁸ Oco Avimeleke wa lamanela komunda ya Calimono, eye kumue lomanu vosi va kala laye. Avimeleke wa nyañula ondiaviti, yu wa timbula ocanja cuti umue, wa ci yelula kuenje wa cambata pocitai. Wa popia lomanu va kala laye hati, Wa moli eci nda linga. Yayuliko oku ci lingavo ndeci ame nda linga.

⁴⁹ Oco vosi omunu omunu wa timbulavo ocanja caye, kuenje wa kuama Avimeleke. Yu va yeka ovianja viaco vocilala, kuenje ocilala caco lava va kalamo, va cimba ondalu. Oco omanu vosi vombonge ya Sekeme va favo, va soka ohulukãi yalume lakai.

⁵⁰ Oco Avimeleke wa enda ko Tevese. Wa ñuala Tevese ocingonja kuenje wa li kuata.

⁵¹ Puãi vokati kimbo mua kala ombonge yimue ya pama, kuenje omanu vosi vovimbo, alume lakai, omo va tilila, kuenje va liyikilamo, va londa kolusoka luombonge.

⁵² Avimeleke weya kombonge, wa yaka layo, yu wama kombundi yombonge ha yimbi ondalu.

⁵³ Ukai umue wa imba ewe lioku fulila kutue wa Avimeleke, lio tuiya utue.

⁵⁴ Haico Avimeleke a kovonga umalehe ukuakuambata ovimaleho viaye, wa popia laye hati, Somolamo osipata yove, njipaye, sanga omanu va mopia vati, Wa ipaiwa lukãi. Oco umalehe waco wo toma olusole, yu wa fa.

⁵⁵ Eci alume va Isareli va limbuka okuti Avimeleke wa fa, va enda omunu omunu koliavo.

⁵⁶ Oco Suku wa fetuluinya ongole ya Avimeleke yina a lingila isiaye, cina a ipa vamanjaye akuĩ epanduvali.

⁵⁷ Kuenda ongole yosi ya va Sekeme, Suku wa va yi fetuluinyavo. Esiñalo lia Yotama, omõla a Yerubaale, lia va wila.