LIOLONGANJI 8 - Embimbiliya - Bíblia Sagrada em Umbundu

¹ Alume va Efarimi va popia la Gideone vati, Eci wa tu linga ndeti, ca lomboloka nye? Nye kua tu kovongelele, eci wa tundila oku liyaka la Midiane? Yu vo yenja lãvi lãvi.

² Gideone wa popia lavo hati, Nga eci nda linga ca lisoka leci cene? Ayuva a pupulula Efarimi ka a velelepo hẽ a ongula Aviyesere?

³ Suku wa eca povaka ene olombuale via Midiane, Oreve la Seve. Eci nda tẽla oku linga, ca lisoka nga leci wa linga? Eci a popia ndoco, oco onyeño yavo vo kuatelele ya tulumuha.

⁴ Gideone kumue lovita viaco vitatu vialume, vana va kala kumue laye, veya kolui Yordão, yu va lu yoka. Va kava, haimo vamako loku landula.

⁵ Wa popia lomanu va Sukote hati, Ndu pingi, eci olombolo komanu va enda lame, momo va kava kuenda ñasi loku landula Seva la Calimuna, olosoma via Midiane.

⁶ Akulu voko Sukote vati, Oco nga tu eca ndoto ombolo kolohoka viove? Seva la Calimuna hẽ va kasi ale peka liove?

⁷ Gideone wa popia hati, Oco muẽle. Eci Yehova a eca peka liange Seva la Calimuna, ndu tandusuli lolosongo viovakango lovikualu.

⁸ Oku tundako, wa lamanela ko Penuele, haico ño a va pinga. Kuenje va Penuele vo tambulula ndeci va Sukote vo tambuluile.

⁹ Oco wa popiavo la va Penuele hati, Eci niuka lombembua, ombonge eyi ndi yi kupuila posi.

¹⁰ Kaliye Seva la Calimuna va kala ko Karikore, kumue lolohoka viavo, via soka olohulukãi ekui lavitalo vialume, vosi va supile polohoka viosi viomanu vokutundilo. Kua kupuiwile ocita lakui avali kolohũlũkãi vialume vakualosipata.

¹¹ Gideone wa lamana lonjila yovando ya kala kutundilo wa Noba la Yogibeha, yu wondumuhila olohoka, momo olohoka viaco via lipolelepo.

¹² Seva la Calimuna va tila, yu wa va landula. Wa kuata olosoma viaco vivali via Midiane, Seva la Calimuna, kuenje wa lundula olohoka viosi.

¹³ Oco Gideone, omõla a Yoasi, wa tiuka kocilunga. Wa lamana lowulu wa Heresi.

¹⁴ Wa kuata umãlehe umue u Sukote, yu wo pula. Leye wo sonehela olonduko viasongui lakulu va Sukote, va soka akuĩ epanduvali lepanduvali kalume.

¹⁵ Weya ku va Sukote, hati, Seva la Calimuna, havava! Vana wa nondaleleli hoti, Oco nga, tu eca ndoto ombolo kalume vove va kava? Seva la Calimuna hẽ va kasi ale hẽ peka liove?

¹⁶ Wa kuata akulu vimbo. Wa nyañula olosongo viovakango lovikualu, kuenje wa longisa lavio va Sukote.

¹⁷ Wa kupuila posi ombonge ya Penuele, kuenje wa ipa vakuimbo liaco.

¹⁸ Wa popia la Seva la Calimuna, hati, Alume wa ipaili ko Tavore va kala ndati? Yu va kumbulula vati, Va kala ndove muẽle. Vosi yavo va mõleha ndomala vosoma.

¹⁹ Eye hati, Ovo vamanjange, omãla va mai. Ndeci Yehova a kasi lomuenyo, nda wa popeleli omuenyo wavo, nda sia wipaili.

²⁰ Wa popia luveli waye Yetere, hati, Katuka, va ipa. Puãi umãlẽhe ka somuile osipata yaye. Wa kala lusumba, momo omõla handi.

²¹ Oco Seva la Calimuna vati, Katuka ove muẽle, o tu undumuhile. Ulume ulume, longusu yaye yi liñi. Oco Gideone wa katuka, wa ipa Seva la Calimuna. Kuenje wopa ovilimbo via kala kosingo yolongamelo viavo.

²² Alume va Isareli va popia la Gideone, vati, Tu viale, ove lomolove lonekulu yove le. Momo wa tu popela peka lia Midiane.

²³ Gideone wa popia lavo hati, Hameko ndu viali, lomõlange heyeko u viali. Te Yehova eye u viali.

²⁴ Gideone wa popia lavo hati, Ndu pingi cimue, omunu omunu a nyihe ovingelengele viopovikuata viaye a punda. Momo ovanyali vavo va kala lovingelengele, omo va Isameli.

²⁵ Va kumbulula vati, Tu vi eca lesanju. Oco va nyãleha onanga, kuenje omunu omunu wa imbapo ovingelengele viopovikuata viaye.

²⁶ Okulema kuovingelengele viulu vina a pinga, kua soka ohulukai lovita epanduvali violosiekele viulu. Wa kalavo lovilimbo, lovingelengele, lolonanga viohusu violosoma via Midiane, kuenda vali olomota via kala polosingo violongamelo viavo.

²⁷ Gideone wa tunga lavio efonde limue, yu wa li kapa vimbo liaye, vOfira. Haimo va Isareli vosi va lingila lalio ukahonga. Lia lingila Gideone onjanjo, eye kumue lepata liaye.

²⁸ Oco va Midiane va pokuisilua kovaso a va Isareli. Ka va petuile vali utue. Kuenje koloneke via Gideone ofeka ya pola akuĩ akuãla kanyamo.

²⁹ Yerubaale, omõla a Yoasi, wa enda kuenje wa tumãla vonjo yaye muẽle.

³⁰ Gideone wa kala lomãla akuĩ epanduvali, vokombunda yaye muẽle, momo wa kala lakãi valua.

³¹ Ukama waye woko Sekeme, wo citilavo omõla ulume, kuenje wo luka Avimeleke.

³² Gideone, omõla a Yoasi, wa fa tupu ekongo liocili. Vo kenda veyambo lia isiaye Yoasi, kOfira ya va Aviyesere.

³³ Tuli Gideone a fa, va Isareli va tianguluka, kuenje va linga ukahonga la Baale. Baale Beriti vo lingisa suku yavo.

³⁴ Va Isareli ka va ivalukile Yehova Suku yavo, una wa va popelele peka liovanyãli vavo vosi, vana va va ñualele.

³⁵ Ndaño epata lia Yerubaale, haeye Gideone, ka va kaile lalio locisola ca lisoka luwa wosi a lingila Isareli.