LIOLONGANJI 7 - Embimbiliya - Bíblia Sagrada em Umbundu

¹ Oco Yerubaale, haeye Gideone, kumue lomanu vosi va kala laye, va katuka omẽle, kuenje va tunga ocilombo konẽle yono ya Harode. Ocilombo ca Midiane ca kala ko Norte yavo, vocimbota, ocipepi lomunda ya More.

² Oco Yehova wa popia la Gideone hati, Omanu va kasi kumue love va lua enene, oco si tẽla oku eca va Midiane peka liavo, sanga Isareli o lipandela kovaso ange, hati, Eka liange muẽle lia mopela.

³ Kaliye, imbila omanu oluiya olu, huti, Wosi esumba haeye o luluma, a tiukile, a tunde komunda Gileada. Oco pomanu pa tiukile, a tunde komunda Gileada. Oco pomanu pa tiukila olohũlũkãi akuĩ avali lavivali. Kuenje pa siala ekui liolohũlũkãi.

⁴ Yehova wa popia la Gideone hati, Omanu lopo valua enene. Lokila lavo kovava, oko hu va nolela. Oco u hu sapuila siti, Omunu u a ende love, eye enda love. Lu hu sapuila siti, Omunu u ka ka ende love, ka endi.

⁵ Oco wa lokila lomanu kovava. Yehova wa popia la Gideone hati, U wosi o capa ovava ndeci ombua yi capa, u tepamo. Haico o linga lu wosi o kekama kolongola ha nyui.

⁶ Ava va sua ovava lovaka avo loku a capa va soka ovita vitatu vialume. Puãi omanu vosi vakuavo, oku nyua ovava va kekama kolongolo.

⁷ Yehova wa popia la Gideone hati, Ovita vitatu vialume va capa, ovio ndu popeli lavio, haivio ngeca lavio va Midiane peka liove. Omanu vosi vakuavo va ende omunu omunu konjo yaye.

⁸ Oco alume va yelula olohuta viomanu lolombeta viavo. Alume vosi vakuavo va Isareli wa va tiuwiya omunu omunu kombalaka yaye, puãi wa supapo lovita vitatu vialume. Ocilombo ca va Midiane ca kala kombuelo yaye vocimbota.

⁹ Uteke waco, Yehova wa popia laye hati, Katuka, tundila ocilombo, momo nda ceca peka liove.

¹⁰ Puãi nda o kuete usumba woku lokilako, kuenda lukuenje wove Pura kocilombo caco.

¹¹ O ka yeva eci va popia, kuenje ovaka ove a pamisua hu tundila ocilombo. Oco eye kumue lukuenje waye wa lokilako toke kolonele viocilombo, kuna kua kala asualali.

¹² Va Midiane la va amaleke lomanu vosi vokutundilo va liyala vocimbota, owiñi waco ndolohuma. Olongamelo viavo oku vi tenda ka ci tẽliwa, viakahandangala ndeseke liokopalaya.

¹³ Eci Gideone a pitilako, tala, ulume umue wa kala loku lomboluila ukuavo onjoi yaye, hati, Ota, nda lota onjoi, handeci ño; Ombolo yimue yosevata ya tiñuluhila vocilombo ca Midiane, yeya toke kombalaka, yu ya litusulamo, kuenje ombalaka ya wa. Ya yi tingulula, loyo ya liyala posi.

¹⁴ Ukuavo wo kumbulula hati, Oyo osipata ya Gideone muẽle, omõla a Yoasi, ulume umue u Isareli, lacimue vali cikuavo. Peka liaye opo Suku a eca Midiane lolohoka viaco viosi.

¹⁵ Eci Gideone a yeva onjoi yaco lelomboluilo liayo, oco wa fendela. Wa tiukila kocilombo ca va Isareli, kuenje hati, Votoki, momo Yehova wa eca olohoka via Midiane povaka ene.

¹⁶ Ovita viaco vitatu vialume, wa vi tepa kovisoko vitatu. Wa eca povaka avo vosi anguena lasanga upolokoso, lovimihi vokati kasanga aco.

¹⁷ Wa popia lavo hati, Vanji kokuange, lingi ndomo ndinga. Tuli mitila konele yocilombo, lingi ndomo ndinga.

¹⁸ Eci ndi sika enguena, ame lava vosi va kasi kumue lame, oco lenevo siki anguena kolonele viosi viocilombo, kuenda kaluki hoti, Ca Yehova la Gideone.

¹⁹ Oco Gideone locita calume va kala kumue laye, va pitila konele yocilombo, kefetikilo lioñolosi yinene, eci va mala ño oku kapa olondavululi. Va sika anguena, va ipa asanga opovaka avo.

²⁰ Ovisoko viaco vitatu via sika anguena. Va ipa asanga. Va kuata ovimihi peka liepĩli, lopeka liondio anguena oku sika. Kuenje va vilikiya vati, Osipata ya Yehova la Gideone.

²¹ Va talama omunu omunu ponele yaye, va ñuala ocilombo. Olohoka viosi via lupuka, via kaluka, kuenje via tila.

²² Eci va sika ovita viaco vitatu vianguena, oco vocilombo cosi Yehova wa panga okuti va liñualelapo lolosipata, omunu lokuavo omunu lokuavo. Oco olohoka via tila toke ko Bete Sita oku panda ko Serera, toke kongave ya Avele Mehola, ko Tabata.

²³ Alume va Isareli va tunda ko Nafitali lo kAsiere, loko Manase yosi. Va likongela yu va landula va Midiane.

²⁴ Gideone wa tuma olomunga kofeka yosi ya Efarimi haiyo yolomunda, hati, Loki ka ñueleheli la va Midiane. Va sitikili polonjiva, toke ko Bete Bara, leyi ya Yordão. Oco alume vosi va Efarimi va liongolola, yu va yika polonjiva, toke ko Bete Bara, leyi ya Yordão le.

²⁵ Va kuata olombuale vivali via Midiane, Oreve la Seve. Oreve va wipaila kewe lia Oreve. Seve va wipaila kocikoselo ca Seve. Va landula va Midiane, kuenje ovitue via Oreve la Seve va vi nena ku Gideone kesinya lia Yordão.