LIOLONGANJI 6 - Embimbiliya - Bíblia Sagrada em Umbundu

¹ Va Isareli va linga vali eci cĩvĩ kovaso a Yehova, kuenje Yehova wa va eca peka lia va Midiane anyamo epanduvali.

² Eka lia va Midiane lia yula Isareli. Va Isareli va lifelela ovilala kolomunda, laleva, lovikolo oku tila va Midiane.

³ Olonjanja viosi eci va Isareli va kũla ombuto, va Midiane kumue la va Amaleke, lomanu vokutundilo, veyaiya, kuenje va va katukila.

⁴ Va tunga ovilombo kovaso avo. Va nyõla ovaima ofeka, toke oku panda ocipepi la Gasa. KIsareli lakumue okulia va siako, ndaño omeme, ndaño ongombe pamue ocimbulu.

⁵ Momo veyaiya loviunda viavo lolombalaka viavo. Veya owiñi ndolohuma. Oku va tenda, ovo kumue lolongamelo viavo, ka ca tẽliwile. Veya vofeka oku yi nyõla.

⁶ Va Isareli va honguela calua va Midiane. Kuenje va Isareli va liyuila Yehova.

⁷ Eci va Isareli va liyuila Yehova omo va Midiane va va sakalaisa,

⁸ oco Yehova wa tuma uprofeto ku va Isareli. Eye wa popia lavo hati, Ca popia Yehova Suku ya Isareli, ceci, hati, Ame nda wupi kEgito, nda wupi konjo yupika.

⁹ Ndo popeli peka lia va Egito, lopeka liava vosi vo talisa ohali. Nda va tundisa kovaso ene, yu nda wĩhi ofeka yavo.

¹⁰ Nda popia lene siti, Ame Yehova Suku yene. Ko ka sumbi olosuku via va Amori, vana wa tungi vofeka yavo. Puãi ka wa yeveleli kondaka yange.

¹¹ Ungelo wa Yehova weya, yu wa tumala vemi liocinendele co kOfira, ca kala ca Yoasi, u Aviyesere. Omolaye Gideone wa kala loku sasa otiliku vocikoselo cayuva, oco va Midiane ka va ka yi mõle.

¹² Ungelo wa Yehova wo tukulukila, wa popia laye hati, Yehova o kasi love, olume wa pama ukuotoi.

¹³ Gideone wa popia laye hati, A ñala yange, nda Yehova o kasi letu, oco hẽ, ovina evi viosi via tu wilila nye? Ovikomo viaye viosi vi kasi pi? Vina olosekulu vietu via tu sapowaila, vati, Yehova ka tupile hẽ kEgito? Puãi cilo Yehova wa tu takumũla, kuenda wa tu eca peka lia va Midiane.

¹⁴ Yehova wo pukukila, wa popia laye hati, Kuende longusu o kuete ndeti. Popela Isareli peka lia va Midiane. Hameko hẽ nda ku tuma?

¹⁵ Gideone wa popia laye hati, A Ñala, ame hẽ, Isareli ndu popela la nye? Tala, ko manase, epata lietu lia sekuka, lame ndi sule vonjo ya tate.

¹⁶ Yehova wa popia laye hati, Puãi ame ñala kumue love, kuenje va Midiane o va kundula ndomunu umosi.

¹⁷ Gideone wa popia laye hati, Cilo nda nda sanga ohenda kovaso ove, ndekisa ondimbukiso yokuti ove o kasi loku vangula lame.

¹⁸ Hu pinga, palo ku ka tundepo, toke niuka kokuove, oku ku nenela ombanjaile yange si ku yi tumbikila. Eye hati, Ngamisapo toke o tiuka.

¹⁹ Oco Gideone wa iñila vonjo, wa teleka okahombo, wa panga olombolo ka vi kuete etumbisa lefa liosema. Ositu yaco wa yi kapa vohumba, lusole waco wa witila vombia. Cosi wo ci tualela vemi liocinendele. Yu wo ci tumbikila.

²⁰ Ungelo wa Suku wa popia laye hati, Nyañula ositu kuenda olombolo ka vi kuete etumbisa. Vi kapa kewe eli. Itilako usole. Oco wa ci linga.

²¹ Ungelo wa Yehova wa tandaveka ombueti ya kala peka liaye, kuenje losungu yaco wa lamba ositu lolombolo ka vi kuete etumbisa. Oco kewe kua tunda ondalu ya lia ositu lolombolo ka vi kuete etumbisa. Kuenje ungelo wa Yehova wa senguluka kovaso aye.

²² Oco Gideone wa limbuka okuti eye ungelo wa Yehova. Gideone hati, Ngongo yange we, a Yehova Suku, momo cilo nda mõla ungelo wa Yehova liso liange muẽle.

²³ Puãi Yehova wa popia laye hati, Ombembua yi kale love. Ku ka saluke. Ku fi.

²⁴ Oco Gideone wa tungilako Yehova utala, kuenje wo luka hati, Yehova eye ombembua. Toke etaili lilo u tãi kOfira ya va Aviyesere.

²⁵ Kuteke waco, Yehova wa popia laye hati, Kuata onui ya so, yina yavali yanyamo epanduvali. Lundula utala wa Baale, una u kuete so, timbula oviti vi kola vi kasi konele yawo.

²⁶ Tungila Yehova Suku yove utala wovawe a longekiwa ciwa kilu liewe lilo. Kuata onui yavali, yi lumba ndocilumba coku pia elisi, lolohui vioviti vi kola o laika oku timbula.

²⁷ Oco Gideone wa enda lekui lialume, akuenje vaye, yu wa linga ndeci Yehova o sapuilile. Puãi omo a yokokela vakuepata liaye lavakuimbo, oco ka tẽlele oku ci linga utanya, puãi wa ci linga uteke.

²⁸ Eci vakuimbo va pasuka ociteketeke, tala, utala wa Baale wa leñuhapo, loviti vi kola viokonele yawo via timbuiwa, kuenda onui yavali ya lumbilua kutala waco wa tungiwa.

²⁹ Va lipula pula vati, Helie wa ci linga? Oco va puliliya loku kulĩhisa, kuenje vati, Gideone, omõla a Yoasi, eye wa ci linga.

³⁰ Oco vakuimbo va popia la Yoasi vati, Tukulula omõlove, oco a fe. Momo wa lundula utala wa Baale kuenda wa timbula oviti vi kola viokonele yawo.

³¹ Yoasi wa popia la vosi va wongolokela, hati, Ene nga vu tundila Baale olunda? Ene nga vu u kuatisiko? U u tundila olunda, o fa muẽle omelilo. Nda Baale osuku, a litundile eye muẽle olunda, momo utala waye wa leñuiwa.

³² Oco eteke liaco vo luka vati, Yerubaale, ca lomboloka citi, Baale a litundile eye muẽle olunda, momo wa leñula utala waye.

³³ Oco va Midiane vosi la va Amaleke lomanu vosi vokutundilo, va likonga, yu va yoka Yordão, kuenje va tunga ocilombo vocimbota ca Yesirele.

³⁴ Puãi Espiritu lia Yehova lia wila Gideone. Wa sika olumbeta, kuenje va Aviyesere va likongela, ha vo kuama.

³⁵ Wa tuma olomunga ko Manase yosi. Yu va likongela ha vo kuama. Wa tumavo olomunga kAsiere loko Sevulono loko Nafitali. Kuenje veya oku ñualehela lavo.

³⁶ Gideone wa popia la Suku hati, Nda ocili ove o yongola oku popela Isareli leka liange, ndomo wa ci popia,

³⁷ tala, ñapa ocipa comeme pocimbandi. Nda kocipa lika ku wila olume, kuenda osi yosi ya kukuta, oco ndimbuka okuti ove o yongola oku popela Isareli leka liange, ndomo wa ci popia.

³⁸ Kuenje haico ca kala. Hẽla liaco, eci a pasuka ociteketeke, wa tieña ocipa, kuenje wa kamako olume luaco, lue yuka petiyela.

³⁹ Gideone wa popia la Suku hati, Onyeño yove ka yi ka mbuengukile, puãi mopia ño lumosi. Hu pinga, linga handi ndi seteke onjanja yimosi lika locipa. Tava okuti ocipa lika ci kukuta, osi yosi yi yule lolume.

⁴⁰ Uteke waco, Suku haico a linga. Ocipa lika ca kukuta, posi yosi pa yula lolume.