LIOLONGANJI 5 - Embimbiliya - Bíblia Sagrada em Umbundu

¹ Eteke liaco Devora la Baraka, omõla a Avinoama, va imba vati,

² Omo asongui va votoka oku songuila Isareli lomo omanu va kuatako lutima wosi, oco sivayi Yehova.

³ Ene alosoma, yeveleli. Lene alombuale, kululi atuĩ. Ame njimbila Yehova. Njimbila Yehova, Suku ya Isareli, esivayo.

⁴ A Yehova, eci wa tunda ko Seire, eci wa tunda kovisenge via Edome, osi ya luluma, lovailu a yenguluka, ocili alende a papuka ovava.

⁵ Olomunda via lulumila kovaso a Yehova, ndaño Sinai kovaso a Yehova, Suku ya Isareli.

⁶ Koloneke via Siamigara, omõla a anate, koloneke via Yaele, atapalo a wunda, olongende via pita pita volohoka.

⁷ KIsareli olombiali via puako, via puako muẽle, toke ove wa katuka, a Devora, toke wa katuka ndonjali kIsareli.

⁸ Va nola olosuku viokaliye, kuenje ovita via kala kovivelo. Pokati kakuĩ akuãla kolohũlũkãi via va Isareli, ka pa molehele ociyepelo pamue onjelia.

⁹ Utima wange wa sanjukila asongui va Isareli, pokati komanu, ovo va kuatako lutima wosi. Sivayi Yehova.

¹⁰ Ci sapuli, ene wakuakuendela kovimbulu vi yela, lene wakuakutumala katapete a posoka, lene wakuakuendela volonjila.

¹¹ Kovitapelo, olondaka via vakualohonji vi yevalise ovilinga viesunga via Yehova, ovilinga viesunga viuviali waye kIsareli. Oco omanu va Yehova va lokila kolombundi.

¹² Pasuka, pasuka, a Devora. Pasuka, pasuka, imba ocisungo. Katuka, a Baraka, kuata olomandekua viove, amõla a Avinoama.

¹³ Oco kua loka ocisupe colombuale leci comanu, kuenje Yehova wa lokila kokuange ha njakelako lavakuonene.

¹⁴ KEfarimi kua tunda ava va tunga kAmaleke. Benjamini o ku kuãi, kumue lolohoka viove. Ko Makiri kua tunda olombiali, loko Sevulono kua tunda ava vambata ombueti yusongui.

¹⁵ Olombuale via Isakare via kala kumue la Devora. Isakare wa kakatela Baraka. Vetapi vo lialia akoto. Kolondui via Ruvene kua kala okulisimaila kualua.

¹⁶ Wa tumalela nye pokati koviunda violomeme loku yevelela olombendo vi sikilua oviunda? Kolondui via Ruvene kua kala okusinyanyeha kualua.

¹⁷ Gileada wa tumala kesinya lia Yordão. Dani wa sialela nye volonaviyu viaye? Asiere wa tumãla ño konele yokalunga, wa puyukila vovihondoloka viaye.

¹⁸ Va Sevulono va kuata ovimuenyo viavo povaka, la Nafitali le, koviwulu viusenge.

¹⁹ Olosoma vieya, via yaka. Oco olosoma via Kanana via yakela ko Taanake, kovava a Megido. Layimue opalata va tẽla oku pundako.

²⁰ Kilu olombungululu via yaka. Volonjila viavio via liyaka la Sisera.

²¹ Olui Kisone lua vambata, olui luosiahũlu, olui Kisone. Otima wange, amamako longusu.

²² Oco akonjo otuvalu tuavo a yevala tua! tua! poku tila, poku tila kuakuavita vavo.

²³ Ungelo wa Yehova hati, Siñali Merosi, olonungi vialio vi siñali, vi siñali muẽle. Momo ka veyile oku kuatisa Yehova, oku kuatisa Yehova koku yaka lavakuonene.

²⁴ Yaele, ukãi wa Heveru u Keni, wa sumuluha pokati kakãi. Wa sumuluha pokati kakãi va tunga volombalaka.

²⁵ Sisera wa pinga ovava, yu wa wĩha asenjele. Wo nenela asenjele a kuata veholo liulamba.

²⁶ Peka liaye wa kuata ombambo. Peka liaye liondio wa kuata onjundo yolondingupange. Wa valela Sisera, wa valela vutue waye. Wa sasola, wo tombola polombandu.

²⁷ Leye wa litumala, wa kupuka, wa liyala kolomãi viaye. Wa litumala, wa kupukila kolomãi viaye. Apa a litumalela, haipo a fila ongambu.

²⁸ Ina ya Sisera wa lengelila ponjanela, wa vilikiyila ponjanela hati, Ekalu liaye li tumalela nye, yu ka liya? Ondukuso yakalu aye yi ciluila nye?

²⁹ Akãi va lunguka, vana va kala kumue laye, vo kumbulula. Leye muẽle wa litana lutima waye, hati,

³⁰ Ka va sangele hẽ ovikuata? Ka va kasi hẽ loku litepaila evi va punda? Ulume lulume lufeko waye, pamue vavali. Sisera vo pundila olonanga viovivalo viñi viñi, olonanga viovivalo viñi viñi via posuisua, olonanga vivali via tekiwa, via posuisua, vioku iña kosingo yange.

³¹ Oco ovanyali vove vosi, a Yehova, va takevo ndoco. Puãi ava va ku sole va linge ndekumbi pokutunda kualio longusu. Kuenje ofeka ya pola akuĩ akuãla kanyamo.