LIOLONGANJI 4 - Embimbiliya - Bíblia Sagrada em Umbundu

¹ Eci Ehudi a fa, va Isareli va linga vali eci cĩvi kovaso a Yehova.

² Kuenje Yehova wa va landisa peka lia Yavini, Soma ya Kanana, una wa viala vo Hasore. Kesongo kolohoka viaye eye Sisera, haeye wa kala ko Haroseta Goyimi.

³ Va Isareli va vilikiya ku Yehova, momo Yavini wa kala lovita ecea viakalu utale. Anyamo akuĩ avali wa talisa va Isareli ohali yalua.

⁴ Kaliye uprofeto Devora, ukãi wa Lapidoti, eye wa tetuluila Isareli koloneke viaco.

⁵ Wa tumalaile vemi liuti weva wa Devora, pokati ka Rama la Betele, kolomunda via Efarimi. Va Isareli veyaiya kokuaye oku tetuluiluako.

⁶ Wa tuma ko Kedesi Nafitali oku vilikiya Baraka, omõla a Avinoama. Wa popia laye hati, Yehova Suku ya Isareli ka handelekele hẽ, hati, Kuende, loña komunda ya Tavore, kuende kumue lekui liolohũlũkãi via va Nafitali la va Sevulono?

⁷ Sisera, kesongo kolohoka via Yavini, ndu kokela kokuove kolui Kisone, eye kumue lakãlu vaye lolohoka viaye, kuenje ndu weca peka liove.

⁸ Baraka wa popia laye hati, Nda ove wenda lame, ngenda. Puãi nda kuendi lame, si endi.

⁹ Devora hati, Ngenda muẽle kumue love. Haimo ungende waco o linga ndeti, ka u ku muisa ekẽmalo, momo Yehova weca Sisera peka liukãi. Oco Devora wa katuka, yu wa enda kumue la Baraka ko Kedesi.

¹⁰ Oco Baraka wa kovongela Sevulono la Nafitali ko Kedesi. Kuenje ekui liolohũlũkãi vialume, oku votoka haico vo kuama. Kuenje Devora wa endavo kumue laye.

¹¹ Heveru, u Keni, wa litepele la va Keni, vakuepata lia Hovava, ndatembo ya Mose, yu wa sondoluila ombalaka yaye kocinendele ca Caanayi, ocipepi la Kedesi.

¹² Va sapuila Sisera okuti Baraka, omõla a Avinoama, wa lamanela komunda ya Tavore.

¹³ Oco Sisera wongolola akãlu aye osi, a soka ovita ecea viakalu utale, kumue lomanu vosi va kala laye, tunde ko Haroseta Goyimi toke kolui Kisone.

¹⁴ Devora wa popia la Baraka hati, Katuka, lilo olio eteke Yehova a eca Sisera peka liove. Yehova ka ku pitila hẽ kovaso? Oco Baraka wa loka komunda ya Tavore, kumue lekui liolohũlũkãi vialume vo kuama.

¹⁵ Yehova wa lunduila Sisera kovaso a Baraka lomẽla wosipata, eye lakãlu aye osi, lolohoka viaye viosi. Sisera wa kolomoha kekãlu liaye, kuenje wa endela posi, wa tila.

¹⁶ Baraka wa landula akãlu lolohoka viaco, toke ko Haroseta Goyimi. Olohoka viosi via Sisera via kupuka lomela wosipata. Lomue wa supapo.

¹⁷ Sisera puãi wa lupukila posi toke kombalaka ya Yaele, ukãi wa Heveru u Keni. Momo pokati ka Yavini, Soma ya Hasore, lepata lia Heveru u Keni, pa kala ombembua.

¹⁸ Yaele wa tunda ha nũalehela la Sisera. Wa popia laye hati, Pambuka, a ñala yange, pambukila kulo. Ku ka kuate usumba. Oco wa pambukila kokuaye vombalaka, leye wo sikĩlĩla lonyime.

¹⁹ Sisera wa popia laye, hati, Hu pinga, nyiheko otuvava si nyuiko, momo enyona li mbala. Ukãi wa situlula ocipa casenjele, yu wo nyuisako kuenje wo sikĩlĩla.

²⁰ Wa popia lukãi hati, Talama pombundi yombalaka. Nda kuiya umue o ku pula hati, Omo muli omunu? popia huti, Ka muli.

²¹ Oco osimbu a kala loku pekela otulo tuelume, omo wa kava calua, Yaele, ukãi wa Heveru, wa nyañula ombambo yombalaka. Wa kuata omatelo peka. Wo yomba levando kuenje wa valela ombambo polombandu viaye, toke ya toma posi, kuenje wa fa.

²² Kuenje tala, eci Baraka a landula Sisera, Yaele wa tunda ha ñualehela laye. Wa popia laye hati, Enju, hu lekisa omunu o li loku sanda. Oco wa iñila vombalaka yaye, kuenje ota, Sisera wa kunguvala lombambo yombalaka vutue waye.

²³ Oco eteke liaco Suku wa pokuisila Yavini, Soma ya Kanana, kovaso a va Isareli.

²⁴ Eka lia va Isareli liamamako oku yula Yavini, Soma ya Kanana, toke va kundula Yavini, Soma ya Kanana.