LIOLONGANJI 3 - Embimbiliya - Bíblia Sagrada em Umbundu

¹ Olofeka Yehova a siapo ha nyiki lavio va Isareli, vosi vana ka va muile ovita viosi viovo Kanana, vievi:

² Wa vi siapo, oco ovitumbulukila via va Isareli vi lilongise oku yaka, kuenda oco a vi longise, cinene ava ka va kũlĩhile ale oku yaka toke opo.

³ Olofeka viaco vievi: Olombuale vitãlo via va Filisiti, la va Kanana vosi, la va Sitono, la va Hiwi vana va tunga komunda ya Levanone, tunde komunda ya Baale Herimone toke koku panda ko Hamati.

⁴ Olofeka viaco via kalela oku nyika va Isareli, loku limbuka nda va pokola kovihandeleko via Yehova, vina a handelekele olosekulu viavo lomela wa Mose.

⁵ Oco va Isareli va tunga pokati ka va Kanana, la va Hiti, la va Amori, la va Perisi, la va Hiwi, la va Yevusi.

⁶ Va kuela omala vavo vakãi. Lomãla vavo vakãi va va kuelisa lomãla valume va va Kanana, kuenda va vumba olosuku viavo.

⁷ Va Isareli va linga eci cĩvi kovaso a Yehova. Va ivala Yehova Suku yavo, kuenje va vumba vo Baale la Asera.

⁸ Oco onyeño ya Yehova ya wengukila Isareli, kuenje wa va landisa peka lia Kusiana Risiatayimi, Soma ya Mesopotamia. Oco va Isareli va vumba Kusiana Risiatayimi anyamo ecẽlãla.

⁹ Eci va Isareli va vilikiya ku Yehova, Yehova wa katuila va Isareli upopeli, kuenje wa va popela. Eye Otiniyele, omõla a Kenasi, manja a Kalembe.

¹⁰ Espiritu lia Yehova lio wila, kuenje wa tetuluila Isareli. Wa tunda oku yaka, kuenje Yehova wa eca peka liaye Kusiana Risiatayimi. Soma ya Mesopotamia. Wa yula Kusiana Risiatayimi.

¹¹ Oco ofeka ya pola akuĩ akuãla kanyamo. Kuenje Otiniyele, omõla a Kenasi, wa fa.

¹² Va Isareli va linga vali eci cĩvi kovaso a Yehova. Kuenje Yehova wa pamisa Egilone, Soma ya Moavi, ha katukila va Isareli, momo va linga eci cĩvi kovaso a Yehova.

¹³ Wonguluila kokuaye va Amoni la va Amaleke. Wa katuka, yu wa lundula va Isareli, kuenje va kuata imbo lioviti vieva.

¹⁴ Va Isareli va vumba Egilone, Soma ya Moavi, anyamo ekui lecẽlãla.

¹⁵ Eci va Isareli va vilikiya ku Yehova, Yehova wa va katuila upopeli, Ehudi, omõla a Gera, u Benjamini, haeye ulume ukuepĩli. Va Isareli vo tuma oku tuala ulambu ku Egilone, Soma ya Moavi.

¹⁶ Ehudi wa lipangela osipata ya tua nẽlembali, okulepa kuayo kua soka ukeya. Yu wa yi maleha kocikalo caye condio, kosi yuwalo waye.

¹⁷ Wa eca ulambu ku Egilone, Soma ya Moavi. Egilone wa neta cimue.

¹⁸ Eci Ehudi a mala oku eca ulambu, wa tiula omanu vambatele ulambu waco.

¹⁹ Eye muẽle wa ñualela kovawe a songiwa, ocipepi la Giligali, kuenje hati, A Soma, ñuete ondaka yimue yuyombeki oku ku sapuila. Soma hati, Uhiko. Oco vosi va talamele konele yaye, va tundako.

²⁰ Osimbu a tumãla lika liaye vohondo yaye yokosapalalo, haiyo yoku pita ofela, oco Ehudi weya kokuaye. Ehudi wa popia hati, Hu kuetele ondaka yimue ya tunda ku Suku. Oco Egilone wa votoka komangu yaye.

²¹ Ehudi wolola eka liaye liepĩli. Wa somõla osipata kocikalo caye condio, yu wa yi suaka vimo liaye.

²² Ocikundo ca puilamovo, kumue locivela caco. Ovilenga via lipota kocivela, momo ka somuile osipata vimo liaye. Kuenje ya tundila nele oyo.

²³ Oco Ehudi wa tundila vocindumba, yu wa yika apito ohondo yosapalalo, wa a yika losapi.

²⁴ Eci a tunda, akuenje va Soma veya. Eci va mõla okuti apito ohondo yosapalalo a yikiwa losapi, va sima vati, Mbi o li loku panga usenge vokati kohondo yaye yoku pitila ofela.

²⁵ Va amisapo toke ca va kuma. Puãi omo lopo ka yikuile apito ohondo yosapalalo, va nyañula osapi, kuenje va a yikula. Ota, cime cavo wa fa, wa liyala posi.

²⁶ Osimbu va kala loku amisapo, Ehudi wa puluka. Wa pitahãla ovawe a songiwa kuenje wa tilila ko Seira.

²⁷ Eci a pitila, wa sika olumbeta volomunda via Efarimi. Va Isareli va tunda kolomunda, va loka kumue laye, leye wa va pitila kovaso.

²⁸ Wa popia lavo hati, Ñuami, momo Yehova wa eca peka liene ovanyãli vene va Moavi. Oco va loka, loku u kuama, yu va kuata olonjiva via Yordão, via lisuñama la va Moavi, kuenje ka va tavele okuti umue o yokilapo.

²⁹ Kotembo yaco, va ipa ca soka ekui liolohulũkãi vialume va Moavi, vosi ovinuasa, haivo vakuotõi. Lomue wa pulukapo.

³⁰ Oco eteke liaco, Moavi wa pokuisua leka lia Isareli. Kuenje ofeka ya pola anyamo akui ecẽlãla.

³¹ U wo kuama, Siamigara, omõla a Anate. Haeye wa ipa ovita epandu vialume va Filisiti locitungo coku ombola olongombe. Kuenje leyevo wa popela Isareli.