LIOLONGANJI 21 - Embimbiliya - Bíblia Sagrada em Umbundu

¹ Alume va Isareli ko Misipa va lisingile vati, Pokati ketu lomue eca omolaye ukãi ha kuela u Benjamini.

² Omanu veya ko Betele, kuenje va kala kovaso a Suku toke koñolosi. Va kaluka loku lila calua.

³ Va popia vati, A Yehova, a Suku ya Isareli, eci ceyilila nye kIsareli okuti etaili kIsareli ku kamba epata limue?

⁴ Hẽla liaco, omanu va pasuka ociteketeke. Va tungilako utala, kuenje va lumba ovilumba vioku pia elisi lovilumba viombembua.

⁵ Va Isareli va popia vati, Povapata osi a Isareli, li pi ka lieyile kohongele ya Yehova? Momo u wosi keyile ku Yehova, ko Misipa, vo lisingilile esingo linene, vati, O fa muẽle.

⁶ Va Isareli va kuatela manjavo Benjamini ocikembe, kuenje vati, Etaili kIsareli epata limue lia tepako.

⁷ Tu linga ndati, ha tu muisa ava va supapo akãi? Momo tua lisinga la Yehova okuti ka tu va kuelisa omala vetu vakãi.

⁸ Va popia vati, Povapata a Isareli, helie keyile ku Yehova ko Misipa? Kuenje tala, ko Yavesi Gileada, lomue weya kohongele kocilombo.

⁹ Momo eci omanu va tendiwa, tala, lomue wopolonungi via Yavesi Gileada wa kalako.

¹⁰ Oco ohongele ya tumako ekui lavivali kolohũlũkãi vialume, ovinuasa. Va vosika vati, Kuendi, kunduli olonungi via Yavesi Gileada lomela wosipata, ndaño akãi lomala.

¹¹ Eci vu linga ceci: Kunduli muẽle pe alume vosi lakãi vosi va kũliha alume.

¹² Pokati kolonungi via Yavesi Gileada, va sangapo ovita vikuãla viafeko olosombolua, ka va la kuliha ulume loku pekela laye. Va va nena kocilombo ko Silo, yi kasi vofeka ya Kanana.

¹³ Ohongele yosi ya tuma ondaka ku va Benjamini, vana va kala kewe lia Rimone, kuenje va va imbila oluiya luombembua.

¹⁴ Oco koloneke viaco, va Benjamini va tiuka. Yu va va iha akãi vana va popela povakai voko Yavesi Gileada. Haimo ka va sokele lalume vaco.

¹⁵ Omanu va kuatela Benjamini ocikembe, momo Yehova wa vulula epangu kovapata a Isareli.

¹⁶ Akulu vohongele va popia vati, Tu linga ndati ha tu muisa ava va supapo akãi? Momo akãi voko Benjamini va kundukako.

¹⁷ Kuenje vati, Ava va puluka ko Benjamini va kale locipiñalo cavo, oco kIsareli ka ku ka kunguke epata limue.

¹⁸ Haimo ka tu tẽla oku va kuelisa omãla vakãi. Momo va Isareli va lisingile, vati, U wosi wiha u Benjamini ukãi, wa siñaliwa.

¹⁹ Va popia vati, Tala, unyamo kunyamo kuli ofesta yimue ya Yehova ko Silo, yi kasi ko Norte ya Betele, kutundilo wonjila yi tunda ko Betele, yi lamanela ko Sekeme, ko Sul ya Levona.

²⁰ Va sapuila va Benjamini vati, Kuendi, ka lavekeli voviumbo viayuva.

²¹ Lavululi, eci omala vakãi voko Silo va tundila oku cila, oco ene tundi koviumbo viayuva, omunu omunu a kuate ukãi waye pomala vakãi voko Silo, kuenje kuendi kofeka ya Benjamini.

²² Nda vaisiavo pamue vahuvavo veya kokuetu oku liyeya, oco tu popia lavo tuti, Tu va ihi ño yapa, momo kocilunga ka tua va kuatelele omunu omunu ukãi waye. Enevo heneko wa va eci kokuavo. Nda oco, nda wa kaili leko.

²³ Oco va Benjamini va ci linga. Va likuatela akãi ndeci ca soka lokutendiwa kuavo. Va va likuatela pokati kafeko vakuakucĩla. Oco va enda, va tiukila kocipiñalo cavo. Va tumbulula ovaimbo, yu va tumalamo.

²⁴ Koloneke viaco, va Isareli va tundako, ha va endi omunu omunu kepata liaye lokocikumba caye. Va tundako, yu va enda omunu omunu kocipiñalo caye.

²⁵ Koloneke viaco kIsareli ka kua kaile osoma. Omunu omunu wa linga eci co sungulukila eye muẽle.