LIOLONGANJI 20 - Embimbiliya - Bíblia Sagrada em Umbundu

¹ Oco va Isareli vosi va katuka, tunde ko Dani toke ko Bereseva, lofeka ya Gileada loyo le, kuenje ohongele yaco ya liongoluila lutima umuamue kovaso a Yehova, ko Misipa.

² Asongui vomanu vosi, vapata osi a Isareli, va kala vohongele yomanu va Suku, va soka ovita vikuãla kolohũlũkãi vialume vakuakuendela posi, haivo vakualosipata.

³ Va Benjamini va yeva okuti va Isareli va lamanela ko Misipa. Va Isareli va popia vati, Tu sapuiliko, ongole yaco ya lingiwa ndati?

⁴ U Lewi, veya ukãi wa pondiwa, wa kumbulula hati, Ndeya ko Givea ya Benjamini, ame lukama wange, ha tu lalako.

⁵ Alume va Givea va ñatukila. Onjo nda kala va yi ñuala ocingonja uteke. Va si oku njipa, ukama wange va pekela laye, yu wa fa.

⁶ Nda nyañula ukama wange, ndo vambola kovikepa, nda vi tuma kofeka yosi yocipiñalo ca Isareli, momo va linga evĩho lumbondo kIsareli.

⁷ Ene vosi a va Isareli vu kasi kulo, livanguli, tetululi.

⁸ Oco omanu vosi va votoka lutima umuamue, vati, Lomue pokati ketu enda kombalaka yaye, lomue pokati ketu o tiukila konjo yaye.

⁹ Eci tu linga la Givea, ceci: Tu yi katukila locela.

¹⁰ Kapata osi a Isareli tupako omanu. Kocita comanu tupako ekui; kohulukãi tupako ocita; kekui liolohũlũkai tupako ohulũkãi, ha va kopila omanu okulia. Eci veya, tu fetuluinyila Givea ya Benjamini umbondo wosi a lingila kIsareli.

¹¹ Oco alume vosi va Isareli, lutima umuamue, vongolokela imbo.

¹² Apata a Isareli a tuma alume kepata liosi lia Benjamini, vati, Ongole eyi ya lingiwa pokati kene, ya lomboloka nye?

¹³ Oco kaliye, tu ihi alume vakueviho vovo Givea, oco tu va ipaya, ha tu tundisa evĩho kIsareli. Va Benjamini puãi ka va tavele oku yevelela kondaka yavangandiavo va Isareli.

¹⁴ Va Benjamini va tunda kovaimbo avo, yu va liongoluila ko Givea, ha va endi oku yaka la va Isareli.

¹⁵ Eteke liaco va Benjamini va konga kovaimbo avo akuĩ avali lepandu kolohulũkãi vialume vakualosipata. Kua kalavo olonungi via Givea, va soka ovita epanduvali vialume va noliwa.

¹⁶ Pokati komanu vaco vosi, pa kala ovita epanduvali vialume va noliwa, haivo vakuepĩli, loku tulula esaila kutue womunu, oku lueya lakamue.

¹⁷ Va Isareli va tendiwavo, kuenje oku upamo va Benjamini, va soka ovita vikuãla kolohũlũkãi vialume vakualosipata, vosi yavo alume vakuavita.

¹⁸ Va Isareli va katuka, va lamanela ko Betele, yu va puliliya ku Yehova, vati, Pokati ketu helie o fetikako oku yaka la va Benjamini? Yehova wa popia hati, Yuda eye o fetikako.

¹⁹ Va Isareli va tunda omele, yu va tungila Givea ocilombo.

²⁰ Alume va Isareli va tundila oku liyaka la Benjamini. Alume va Isareli va va alekela ocilunga o Givea.

²¹ Va Benjamini va tunda ko Givea, kuenje eteke liaco va kupuila posi ca soka akuĩ avali kolohũlũkãi vialume va Isareli.

²² Omanu vaco, alume va Isareli, va kuata utõi, yu va aleka vali ocilunga apa va lialekelele ale keteke liatete.

²³ Va Isareli va enda, yu va lilila kovaso a Yehova toke koñolosi. Va puliliya ku Yehova, vati, Tuenda vali oku yaka la vamanjetu va Benjamini, ale? Kuenje Yehova hati, Va katukili.

²⁴ Oco keteke liavali, va Isareli vamako, ha va yaki la va Benjamini.

²⁵ Keteke liavali va Benjamini va va tundila ko Givea, yu va kupuila posi ca soka ekui lecẽlala kolohũlũkãi vialume va Isareli, vosi yavo vakualosipata.

²⁶ Oco va Isareli vosi kumue lomanu vosi, va lamana, yu veya ko Betele. Oko va lilila loku kala kovaso a Yehova. Eteke liaco va likandangiya okulia toke koñolosi. Va lumbila kovaso a Yehova ovilumba vioku pia elisi lovilumba viombembua.

²⁷ Va Isareli va puliliya ku Yehova, momo koloneke viaco ocikasa covisila via Suku oko ca kala.

²⁸ Koloneke viaco, Finehase, omõla a Eleasara, omõla a Arone, eye wa vumba vumba kovaso yocikasa. Va puliliya vati, Tu tunda vali oku yaka la vamanjetu va Benjamini, ale tu liwekapo? Yehova wa popia hati, Katuki, momo hela ndi va eca povaka ene.

²⁹ Oco Isareli wa kapa omanu oku lavekela vonutula ya Givea.

³⁰ Keteke liatatu, va Isareli va katukila va Benjamini. Va lialeka ha va yaki la Givea, ndokolonjanja vikuavo.

³¹ Va Benjamini va tundila omanu, toke imbo va li sia kupãla. Ndokolonjanja vikuavo va fetika oku kundula loku ipa vamue pomanu. Va ipa ca soka akuĩ atatu kalume va Isareli. Va ipaila vamue volonjila vi lamanela, yikuavo ko Betele yikuavo ko Givea. Ndaño vovisenge va ipailavo vamue.

³² Va Benjamini vati, Va kunduka, ndokonjanja yatete. Puãi va Isareli vati, Tu tili, tu va kokeli kolonjila, ocipãla limbo.

³³ Alume vosi va Isareli apa va kaile va katukapo, yu va lialekela ko Baale Tamare. Va Isareli vana va lavekela vonutula kutakelo wa Geva, vondumuhamo.

³⁴ Ekui liolohulukãi vialume va noliwa kIsareli yosi, va katukila Givea, kuenje ocilunga ca tokota. Puãi va Benjamini ka va kũlĩhile okuti va laika oku mõla owima.

³⁵ Yehova wa kunduila Benjamini kovaso a Isareli. Kuenje eteke liaco, va Isareli va kundula olohũlũkãi akuĩ avali lavitãlo locita calume. Vosi yavo vakualosipata.

³⁶ Oco va Benjamini va limbuka okuti va yuliwa. Alume va Isareli va pengamo kovaso a Benjamini, momo va kolela ava va kapelue oku lavekela vonutula ya Givea.

³⁷ Vakuakulavekela va yayulako, yu vondumuhila Givea. Vakuakulavekela vamako, kuenje va kundula imbo liosi lomela wosipata.

³⁸ Kaliye ondimbukiso alume va Isareli va liusika lavakuakulavekela, yeyi, okuti va tumule evonge linene liowisi li tundilila vokati kimbo, loku londa vilu.

³⁹ Oco alume va Isareli va pongolokela vocilunga. Va Benjamini va fetikile oku kundula loku ipa ca soka akui atatu kalume va Isareli, momo vati, Ocili va kunduka, ndokocilunga catete.

⁴⁰ Eci evonge liowisi lia fetika oku tundilila vimbo loku londa vilu, oco va Benjamini va vanja konyima yavo, kuenje ota, imbo liosi lia tuima owisi wa londa vilu.

⁴¹ Alume va Isareli va ñualapo, kuenje alume va Benjamini va saluka, momo va mola owima.

⁴² Oco va imba omanu va Isareli onyima, va loña kekalasoko. Puãi ocilunga ca va kuama, ca va lialia akoto, lava va tunda kovaimbo, va va kunduila pokati kavo.

⁴³ Va yula va Benjamini. Va va landula. Va va kosa, tunde ko Noha toke kutundilo, ocipepi la Givea.

⁴⁴ Ko Benjamini kua fa ekui lecẽlãla kekalasoko vialume. Vosi yavo alume vakuotoi.

⁴⁵ Va ñualapo, ha va tilila kekalasoko, kewe lia Rimone. Volonjila va Isareli va lunduilamo olohũlũkãi vitãlo vialume vaco. Va va landula toke ko Gidoma, kuenje va kundula olohũlũkãi vivali vialume.

⁴⁶ Oco eteke liaco, ava vosi va kunduka ko Benjamini va soka akui avali lavitãlo kolõhulũkãi vialume vakualosipata, vosi yavo alume vakuotõi.

⁴⁷ Puãi ovita epandu vialume, vana va ñualelepo ha va tilila kekalasoko, kewe lia Rimone, va tumala olosãi vikuãla kewe lia Rimone.

⁴⁸ Va Isareli va ñualelapo vali va Benjamini. Va va kundula lomela wosipata, ci kale omanu, ci kale ovinyama, leci cosi va sanga. Kuenda ovaimbo osi va sanga, va a imba ondalu.