LIOLONGANJI 2 - Embimbiliya - Bíblia Sagrada em Umbundu

¹ Ungelo wa Yehova wa tunda ko Giligali, yu wa enda ko Bokimi. Kuenje wa popia hati, Nda wupi kEgito, yu ndo neni vofeka yina nda lisilile oku yeca kolosekulu viene. Nda popele siti, Lalimue eteke ndi nyõla ocisila cange nda lisila lene.

² Lene ko ka lisili ocisila la vakuafeka yilo. Leñuli ovotala avo. Puãi ene ka wa yeveleli kondaka yange. Eci wa ci lingili nye?

³ Oco mopia lene siti, Si va tundisa kovaso ene, puãi vo lingili olosongo volomati viene, lolosuku viavo viu lingili onjanjo.

⁴ Eci ungelo wa Yehova a popia olondaka evi la va Isareli, oco omanu va kaluka loku lila.

⁵ Ocitumãlo caco va ci luka vati, Bokimi. Haiko va lumbila Yehova ovilumba.

⁶ Eci Yehosua a sandula omanu, oco va Isareli va enda omunu omunu kocipiñalo caye, ha va tambula ofeka.

⁷ Omanu va vumba Yehova oloneke viosi via Yehosua, loloneke viosi viakulu vokotembo ya Yehosua, vana va muĩle ovopange osi anene Yehova a lingilile Isareli.

⁸ Yehosua, omõla a Nune, ukuenje wa Yehova, wa fa eci a tẽla ocita lekui kanyamo.

⁹ Vo kenda volongave viocipiñalo caye ko Timinata Heresi, volomunda via Efarimi, ko Norte yomunda Gasi.

¹⁰ Ocitumbulukila caco cosi ca pekelavo kumue lolosekulu viavo, kuenje kua va kuama ocitumbulukila cikuavo, ka ca kũlĩhĩle Yehova, ndaño upange una a lingilile Isareli.

¹¹ Va Isareli va linga eci cĩvĩ kovaso a Yehova, kuenje va vumba vo Baale.

¹² Va yanduluka Yehova Suku yolosekulu viavo, una wa vopile vofeka yEgito. Va kuama olosuku viñi viopokati kolosuku violofeka via va ñuala, kuenda va vi fendela. Oco va wengula onyeño ya Yehova.

¹³ Va yanduluka Yehova, va vumba Baale la Asitarote.

¹⁴ Onyeño ya Yehova wa wengukila va Isareli, kuenje wa va eca povaka ava va va punda. Wa va landisa povaka ovanyali vavo va va ñuala, oco ka va tẽlele vali oku litamalala lovanyãli vavo.

¹⁵ Kuosi va tundila oku yaka, eka lia Yehova lia va ñualelapo ha li va lingi cĩvi, ndeci Yehova a ci popele, kuenda ndeci Yehova a lisingile lavo. Kuenje va sakalala cimue.

¹⁶ Yehova wa katula olonganji, yu via va popela peka liava va va punda punda.

¹⁷ Haimo ka va yevelelele kolonganji viavo, momo va linga ukahonga lolosuku viñi, kuenda va vi fendela. Va pambuka lombili vonjila yina olosekulu viavo via endelele loku pokola kovihandeleko via Yehova. Ovo ka va lingile ndoco.

¹⁸ Olonjanja viosi eci Yehova a va katuila olonganji, Yehova wa kala kumue longanji yaco, kuenje wa va popela peka liovanyãli vavo, oloneke viosi vionganji yaco. Momo Yehova wa va kuatela ohenda oku yeva ndomo va leñaleña omo va sakalaisua lomo va talisua ohali.

¹⁹ Puãi olonjanja viosi eci onganji ya fa, va tiukila konyima, kuenje va linga evi via puiya, via lingaile olosekulu viavo vi sule. Va kuama olosuku viñi, va vi vumba loku vi fendela. Lacimue ocituwa cĩvĩ va imbapo, pamue olonjila viavo viumbinde.

²⁰ Oco onyeño ya Yehova ya wengukila Isareli, kuenje wa popia hati, Omo omanu ava va lueyela ocisila cange, cina nda handelekele olosekulu viavo, kuenda ka va pokuile kondaka yange,

²¹ oco cilo, lamevo, layimue ofeka pokati kolofeka via sia Yehosua cina a fa ndi yi tundisa kovaso avo.

²² Ndi nyika lavio Isareli, hã si tali nda va kuata utate woku endela vonjila ya Yehova, ndeci ca lingaile olosekulu viavo, nda ndati.

²³ Oco Yehova wa siapo olofeka viaco, ka vi tundisile lombili, kuenda ka vi ecele peka lia Yehosua.