LIOLONGANJI 19 - Embimbiliya - Bíblia Sagrada em Umbundu

¹ Koloneke viaco eci kIsareli ka kua kaile osoma, u Lewi umue wa tumala nele oyo yolomunda via Efarimi, yu wa livanjela ukama wa tunda ko Beteleme ya Yuda.

² Ukama waye wa linga ukahonga, kuenje wo tunda, wa enda konjo ya isiaye ko Beteleme ya Yuda. Kuenje wa kalako ca soka olosãi vikuãla.

³ Veyaye wa katuka, yu wo landula, ha popi laye lumbombe loku tiuka laye. Wa enda lukuenje waye kumue lovimbulu vivali. Ufeko wa wiñisa vonjo ya isiaye. Eci isia yufeko o mõla, weya oku u tambula lonjolela.

⁴ Ndatembo yaye, isia yufeko, wo sikiya. Wa kala kumue laye oloneke vitatu. Va lia, va nyua, haiko va lala lala.

⁵ Keteke liakuãla va pasuka ociteketeke, kuenje u Lewi wa liangiliyila oku enda. Puãi isia yufeko wa popia la ndatembo yaye, hati, Pamisa handi utima wove lokambolo, oco wendi noke.

⁶ Oco kavali kavo va tumãla, va lia, va nyua. Isia yufeko wa popia lulume hati, Hu pinga, tava oku lala vali, lutima wove u sanjuke.

⁷ Ulume wa katuka ha endi, puãi ndatembo yaye wo peya, oco wa lala vali.

⁸ Keteke liatãlo, wa pasuka ociteketeke, ha endi. Isia yufeko wa popia laye hati, Pamisa handi utima wove, amisapo toke ekumbi li enda. Oco va lia kavali kavo.

⁹ Eci ulume kumue lukama waye lukuenje waye va katuka ha va endi, ndatembo yaye isia yufeko, wa popia laye hati, Tala, kaliye ekumbi lia enda, lali vali. Tala, ekumbi liñila, lala kulo, lutima wove u sanjuke. Hela vu tunda ociteketeke, hu endi kimbo.

¹⁰ Puãi ulume ka tavele oku lala vali. Wa katuka, wa enda, wa pitila ko Yevusi, haiyo Yerusalãi. Wa kala lovimbulu vivali via walisiwa oviveleko, kuenda ukama waye wa kalavo laye.

¹¹ Eci va pitila ocipepi la Yevusi, ekumbi lia kala koviti. Ukuenje wa popia la cime caye hati, Linga tu pambukile vimbo eli lia va Yevusi, omo tu lala.

¹² Cime caye wa popia laye hati, Ka tu pambukila vimbo liavakualofeka, vana ka va tiamela ku va Isareli, puãi tu pitahalela ko Givea.

¹³ Wa popia lukuenje waye, hati, Tu endi, tu loñi ko Givea pamue ko Rama, oko tu ka lala.

¹⁴ Oco va pitahãla, yu va enda, kuenje ekumbi lia va iñilila koku panda ko Givea ya Benjamini.

¹⁵ Oco va pambukila ko Givea, ha va ka lalako. Wa iñilamo, yu wa tumãla voluwa luimbo, momo lomue wa va yekisa vonjo yaye ha va lalamo.

¹⁶ Kuenje tala, koñolosi kueya osekulu yimue, ya tiuka kupange wayo kepia. Ulume waco wokolomunda via Efarimi, puãi wa kala ko Givea. Vakuimbo liaco va Benjamini.

¹⁷ Wa petula ovaso yu wa mõla ongende voluwa luimbo. Oco sekulu wo pula hati, Wenda pi? Kuenda wa tunda pi?

¹⁸ Eye wa kumbulula hati, Tua tunda ko Beteleme ya Yuda, tu enda nele oyo yolomunda via Efarimi. Oko nda tundile. Nda endele ko Beteleme ya Yuda, kalive ñasi loku enda konjo yange. Kuenje lomue wa sikiya vonjo yaye.

¹⁹ Haimo tu kuete opaya lokulia kuovimbulu vietu. Ame lukãi u, kuenda umalehe o kasi lame, tu kuete ombolo lovinyu. Lacimue tua kamba.

²⁰ Sekulu wa popia hati, Ombembua yi kale love. Cosi o sukila, ci njimbile ño ame, puãi ku ka lale ño voluwa.

²¹ Oco wa wiñisa vonjo yaye. Wa eca okulia kovimbulu. Va sukula kolomãi viavo, kuenje va lia, va nyua.

²² Osimbu va kala loku sanjuisa ovitima viavo, tala, alume vovimbo, vakuevĩho, va ñuala onjo ocingonja, loku totola kepito. Va popia la sekulu, mueleonjo, vati, Tundisila posamua ulume una weya vonjo yove, ha tu u kũlĩha.

²³ Ulume mueleonjo wa tundila kokuavo, wa popia lavo hati, Hacoko akuetu, ko ka lingi cĩvĩ. Omo ulume u weya konjo yange, ko ka lingi umbondo ndowo.

²⁴ Tala, omolange ukãi lukama waye, vava. Ovo nundisila posamua. Pekeli lavo, lingi lavo eci co sungulukili, puãi ko ka lingi umbondo ndowo kulume u.

²⁵ Puãi alume vaco ka va tavele oku yevelela kokuaye. Oco ulume wa kuata ukama waye, wo tundisila kokuavo. Ovo vo kũlĩha, vo nyõla uteke wosi toke komele. Kokutola kuongula, va weca.

²⁶ Kociteketeke ukãi weya, wa liyala pombundi yonjo yulume, muna mua kala cime caye, toke kua ca.

²⁷ Cime caye wa pasuka omele, wa yikula apito onjo, kuenje wa tundila posamua ha endi lonjila yaye. Puãi ota, ukãi, ukama waye, wa liyala pombundi yonjo, lovaka aye polukuki.

²⁸ Wa popia laye hati, Pasuka, tu ende. Puãi eye ka tambuluile. Oco wo kapa kocimbulu. Ulume wa katuka, yu wa enda konjo yaye.

²⁹ Eci a pitila konjo yaye, wa nyañula omoko, wa yelula ukama waye, yu wa sokolola akepa aye, wo vambola kovikepa ekui lavivali, kuenje wa vi tuma kofeka yosi ya Isareli.

³⁰ Vosi va ci mõla vati, Tunde eteke va Isareli va tunda kofeka yEgito toke etaili lilo, ocina ndeci ka ca la lingiwa ndaño oku molẽha. Ci sokololi, ci livanguli, popi.