LIOLONGANJI 18 - Embimbiliya - Bíblia Sagrada em Umbundu

¹ Koloneke viaco kIsareli ka kua kaile osoma. Koloneke viaco epata lia va Dani lia kala loku lisandela ocipiñalo ha va tumalamo. Momo toke opo pokati kapata a Isareli, lacimue ocipiñalo ca va ihiwa.

² Va dani va nola kapata avo osi alume vatãlo vakuotõi. Va tunda ko Sora lo kEsitaole, va va tuma oku kũlĩhisa ofeka loku yi nyula. Va popia lavo vati, Kuendi, nyuli ofeka. Oco va pitila kolomunda via Efarimi, konjo ya Mika, kuenje oko va sikĩla.

³ Eci va kala ocipepi lonjo ya Mika, va limbuka ondaka yocikuenjepombo u Lewi. Va ñualapo, yu va popia laye vati, Helie wa ku nena kulo? O kasi loku linga nye kulo? O kuete nye kulo?

⁴ Wa popia lavo hati, Mika wa ndingila ongandi longandi. O nyihaiha ofeto, kuenje nda linga ocitunda caye.

⁵ Va popia laye vati, Tu ku pinga, tu puliliyeko ku Suku, ha tu limbuka nda ungende wetu u laika oku enda ciwa.

⁶ Ocitunda ca popia lavo citi, Kuendi lombembua. Kungende wene Yehova wa imbako iso.

⁷ Oco alume vaco vatãlo va katuka, veya ko Laisi. Va mõla omanu va tungako, ndomo va salala ndocituwa ca va Sidono, va livala, va lipola. Lacimue va kamba vofeka, puãi va kala lukuasi. Va kalavo kupãla la va Sidono, ka va litengele lomanu vakuavo.

⁸ Oco eci va tiuka kuvakuavo ko Sora lo kEsitaole, vakuavo va popia lavo vati, Nye vu tu sapuila?

⁹ Va popia vati, Votoki, tu va katukili, momo tua mõla ofeka, kuenje tala, ya posoka cimue. Nga vu tumãla ño ndoto? Ko ka lendi oku enda loku iñila vofeka, ha vu yi kuata.

¹⁰ Eci wendi, vu ka sanga omanu va lipola. Ofeka ya tanda, kuenda Suku wa yeca povaka ene. Kovina viosi viokilu lieve, lacimue ca kamba vofeka yaco.

¹¹ Ovita epandu vialume vakuepata lia Dani va malehela ovita. Yu va katuka, va tunda ko Sora lo kEsitaole.

¹² Va lamana, yu va tunga ocilombo ko Kiriyata Yeari, ko Yuda. Oco va tukula ocitumãlo caco, vati, Mahanendani, toke etaili lilo. Tala, ci kasi kutakelo wa Kiriyata Yeari.

¹³ Oku tundako, va pitila kolomunda via Efarimi, yu veya konjo ya Mika.

¹⁴ Oco alume vatãlo vana va kũlĩhisile ofeka ya Laisi, va popia lavakuavo vati, Wa kũlĩhi hẽ okuti volonjo evi muli efonde la terafi lociñumañuma ca songiwa, lociñumañuma ca itilua? Kaliye sokololi eci vu linga.

¹⁵ Oco va pambukilako, veya konjo yocikuenjepombo u Lewi, haiyo onjo ya Mika, kuenje vo pula ndomo a kasi.

¹⁶ Ovita epandu vialume va Dani va maleha ovimalẽho viavo viovita, va talama kepandavelo liombundi.

¹⁷ Alume vatãlo vana va kũlĩhisile ofeka, va lamana, yu va iñila. Va nyañula ociñumañuma ca songiwa, lefonde, la terafi, lociñumañuma ca itilua, osimbu ocitunda ca talama kepandavelo liombundi, kumue lovita epandu vialume va malehela ovita.

¹⁸ Eci ovo va iñila vonjo ya Mika, yu vopamo ociñumañuma ca songiwa, lefonde, la terafi, lociñumañuma ca itilua, oco ocitunda ca va pula citi, Ene vu linga nye?

¹⁹ Vo kumbulula vati, Uhako, likuata komela. Ha tu ende, o tu lingile ndonjali kuenda ndocitunda. Ca ku velelapo ci pi, oku linga ocitunda conjo yomunu umuamue, ale oku linga ocitunda cepata locikumba ca Isareli?

²⁰ Utima wocitunda wa sanjuka. Wa yelula efonde, la terafi, lociñumañuma ca songiwa, kuenje wa endela pokati komanu vaco.

²¹ Oco va pongolokako, va tunda, kuenje va pitisa omãla loviunda lovitele viavo kovaso.

²² Eci va kala ale kupãla lonjo ya Mika, oco omanu va kala volonjo vi lisungue lonjo ya Mika va likonga, yu va landula va Dani.

²³ Va vilikiya va Dani. Ovo va pukukako, va popia la Mika vati, Kuli nye? Weyilila nye lohoka ndeyi?

²⁴ eye hati, Olosuku viange, vina nda panga, wa vi pundi kumue locitunda caco, kuenje wa endi. Nda supapo vali la nye? Kaliye vu popia ndati lame hoti, Kuli nye?

²⁵ Va Dani va popia laye, vati, Ondaka yove ka tu ka yi yeve, sanga vakuanyeño va ku undumuhila, hu peselapo omuenyo wove, lomuenyo wocikumba cove.

²⁶ Va Dani va enda lonjila yavo. Eci Mika a mõla okuti vo velapo kongusu, wa ñualapo, kuenje wa tiukila konjo yaye.

²⁷ Oco va Dani va enda locina ca tunga Mika, locitunda va livala haivo va lipola. Va va ipa lomela wosipata, kuenda va yoka imbo liaco londalu.

²⁸ Lomue wa va popela, momo imbo liaco lia kala kupãla la Sidono, kuenda ka va litengele lomanu vakuavo. Lia kala vocimbota ci lisungue la Bete Rehove. Va Dani va tunga vali imbo, yu va tumalamo.

²⁹ Imbo liaco va li luka Dani, ndonduko ya sekulu yavo Dani, wa citilua ku Isareli. Puãi tete onduko yimbo ya kala Laisi.

³⁰ Va Dani va litumbikila ociñumañuma ca songiwa. Yonatão, omõla Gerisiomo, omõla a Mose, eye kumue lomala vaye va linga ovitunda viepata lia va Dani, toke keteke liumandekua wofeka.

³¹ Oco va litumbikila ociñumañuma ca songiwa, cina ca tunga Mika, otembo yosi onjo ya Suku ya kala ko Silo.