LIOLONGANJI 17 - Embimbiliya - Bíblia Sagrada em Umbundu

¹ Kolomunda via Efarimi kua kala ulume umue, onduko yaye Mika.

² Wa popia la inaye hati, Ohulukãi locita colosiekele viopalata, vina via ku ivilue, haivio wa popelele esiñalo lia yevala vatui ange, tala, opalata yaco, ame ñasi layo, ame nda yiva. Inaye wa popia hati, Yehova a sumuluise omolange.

³ Oco wa tiula ohulukãi locita colosiekele viopalata ku inaye, kuenje inaye hati, Opalata eyi yopeka liange, ndi yi tumbika ku Yehova hã si pangela layo omõlange ociñumañuma ca songiwa lociñumañuma ca itilua. Oco cilo hu yi tiuwila.

⁴ Eci a tiuwila inaye olombongo, inaye wopapo ovita vivali violosiekele viopalata. Yu wa vi eca kutẽli wopalata, leye wa panga lavio ociñumañuma ca songiwa lociñumañuma ca itilua. Kuenje ca kala vonjo ya Mika.

⁵ Ulume waco Mika wa kala lonjo yosuku yaye. Wa panga efonde limue la terafi yimue, kuenje wa tumbika umue wopomala vaye valume, yu wa linga ocitunda caye.

⁶ Coloneke viaco kIsareli ka kua kaile osoma. Omunu omunu wa linga eci co sungulukila eye muẽle.

⁷ Ko Beteleme ya Yuda kua kala ocikuenjepombo cimue, ukuepata lia Yuda, haeye u Lewi. Oko a tumala.

⁸ Ulume waco wa tunda kimbo lia Beteleme ya Yuda, ha sandi apa a tẽla oku tumala. Eci a kala loku enda, oco weya kolomunda via Efarimi, toke konjo ya Mika.

⁹ Mika wo pula hati, Ove wa tunda pi? Eye wa kumbulula hati, Ame ndu Lewi woko Beteleme ya Yuda. Ñasi oku enda si sandi apa nẽla oku tumala.

¹⁰ Mika wa popia laye hati, Tumãla lame, o ndingile onjali locitunda. Ame hu iha ekui liolosiekele viopalata vunyamo, luwalo o sukila, lokulia. Oco u Lewi wa iñila.

¹¹ U Lewi wa tava oku tumala lulume waco, kuenje ocikuenjepombo co lingila nda umue wopomala vaye.

¹² Mika wa tumbika u Lewi. Ocikuenjepombo caco ca linga ocitunda caye kuenje ca kala vonjo ya Mika.

¹³ Oco Mika wa popia hati, Kaliye nda limbuka okuti Yehova o sumuluisa, momo ñuete ocitunda cu Lewi.