LIOLONGANJI 16 - Embimbiliya - Bíblia Sagrada em Umbundu

¹ Samisone wa enda ko Gasa, kuenje wa muilako ocipuepue. Yu wa iñila vonjo yaco.

² Va sapuila va Gasa, vati, Samisone weya kulo. Vo ñuala ocingonja, yu vo lavekela uteke wosi kombundi yimbo. Uteke wosi voha ño puiliti, momo vati, A kale toke ku ca, oco tu wipa.

³ Samisone wa pekela toke vokati kuteke. Oco vokati kuteke wa pasuka, wa kuata kapito ombundi yimbo lokovikuli viaco vivali, wa vi veyulapo viosi kumue locikundiko caco. Wa vi lituika pocitai, yu wa vi ambata toke kilu liomunda ya lisuñama la Hevrone.

⁴ Kovaso yaco, wa sola ukãi umue wokocimbota ca Soreke. Onduko yaye Delila.

⁵ Olombuale via va Filisiti vieya kokuaye, via popia laye, viti, U yonja, kulihisa apa pali ongusu yaye, lomo tu tẽla oku u yula, ha tu u kuti loku u pokuisa, kuenje etu vosi omunu omunu tu ku iha ohulukãi locita colosiekele viopalata.

⁶ Delila wa popia la Samisone, hati, Hu pinga, sapuileko apa pali ongusu yove yinene, lomo o tẽla oku kutiwa hu pokuisua.

⁷ Samisone wa popia laye hati, Nda va ñuta lalusipa epanduvali okaliye, ka a kukutile handi, oco ndi pua ongusu, kuenje ndinga ndomanu vakuavo.

⁸ Oco olombuale via va Filisiti vo nenela alusipa epanduvali okaliye, ka a kukutile handi, leye wo kuta lao.

⁹ Ukãi wa kala lomanu va lavekela vohondo yovokati. Wa popia laye hati, A Samisone, tala va Filisiti! Puãi eye wa soyola olusipa ndeci ci soyoka onomba nda ya yeva kondalu. Oco ka va limbukile apa pali ongusu yaye.

¹⁰ Delila wa popia la Samisone, hati, Tala, ove puãi wa sevuisa, kuenda wa ñembamo. Kaliye hu pinga, sapuileko ndomo o tẽla oku kutiwa.

¹¹ Eye wa popia lukãi hati, Nda va ñuta lovikolo viokaliye, ka via la kuta cimue, oco ndi pua ongusu kuenje ndinga ndomanu vakuavo.

¹² Oco Delila wa nyañula ovikolo viokaliye, wo kuta lavio, kuenje wa popia laye hati, A Samisone, tala va Filisiti! Vakuakulavekela va kala vohondo yovokati. Ovikolo viokovoko aye, Samisone wa vi soyola ndolumbanja.

¹³ Delila wa popia la Samisone, hati, Toke cilo wa sevuisa ño, kuenda wa ñembamo. Sapuileko ndomo o tẽla oku kutiwa. Eye wa popia lukãi hati, Nda atombi epanduvali okutue wange wa a tuta kumue lonanga, loku a tõlisa lombambo yomakina yoku tuta, oco ndi pua ongusu, kuenje ndinga ndomanu vakuavo.

¹⁴ Oco osimbu a pekela, Delila wa nyañula atombi epanduvali okutue waye, wa a tutila vonanga, yu wa tõlisa lombambo yomakina yoku tuta. Oco wa popia laye hati, A Samisone, tala va Filisiti! Wa pasuka kotulo, kuenje wa veyulapo ombambo lomakina yoku tuta kuenda onanga.

¹⁵ Ukãi wa popia laye hati, O tẽla oku popia ndati, huti, Hu sole, osimbu utima wove ka u kasi lame? Olonjanja evi vitatu wa sevuisa ño, kuenda kua sapuilile apa pali ongusu yove yinene.

¹⁶ Eci eteke keteke o sakalaisa lolondaka viaye loku u peya, oco kutima waye co kuma, okufa hise.

¹⁷ Oco wo sapuila cosi ca kala vutima waye. Wa popia laye hati, Vutue wange ka mua la pita omoko yomuto, momo ndu Nasiri wa Suku tunde vimo lia mai. Nda mutiwa, oco olohõlo viange vi nunda, ndi pua ongusu, kuenje ndinga ndomanu vakuavo.

¹⁸ Eci Delila a limbuka okuti wo sapuila cosi ca kala vutima waye, wa tuma oku kovonga olombuale via va Filisiti, hati, Kaliye yapa, enjui, momo wa sapuila cosi ci kasi vutima waye. Oco olombuale via va Filisiti via lamanela kokuaye, lolombongo povaka avo.

¹⁹ Ukãi wo pekelisa kolongolo viaye. Yu wa pañinya ulume umue, leye wo puta atombi epanduvali okutue waye. Oco wa fetika oku leñela, kuenje ongusu yaye yo tunda.

²⁰ Ukãi hati, A Samisone, tala va Filisiti! Eye wa pasuka kotulo kuenje hati, Nundila posamua ndolonjanja vikuavo, kuenje ndi va likanumula. Puãi ka kulihile okuti Yehova wo tunda.

²¹ Va Filisiti vo kuata. Vo tofola ovaso aye. Va loka laye ko Gasa kuenje vo kuta lalienge osipi. Yu vo kapa koku fula vokayike.

²² Puãi esinga liovutue waye lia fetika oku yova vali, tunde apa a putiwa.

²³ Olombuale via va Filisiti via liongoluila oku lumbila suku yavo Dagoni ocilumba cinene, loku sanjuka, momo vati. Suku yetu wa eca unyali wetu Samisone peka lietu.

²⁴ Eci omanu vo mola, va sivaya Suku yavo, vati, Suku yetu wa eca peka lietu unyali wetu, ocinyõi cofeka yetu, haeye wa kundula valua vakuetu.

²⁵ Eci ovitima viavo via sanjuka, va popia vati, Kovongi Samisone, a tu papalele. Oco va kovonga Samisone vokayike, yu wa papalela kovaso avo. Vo talamisa pokati kolongunji.

²⁶ Samisone wa popia lukuenje wo kuata peka, hati, Ndambise volongunji vi kuete onjo, oco ndi liyekemo.

²⁷ Onjo ye yuka lalume lakãi, lolombuale viosi via va Filisiti haimo via kala. Kolusoka kua kala ca soka olohũlũkai vitatu vialume lakãi, va kala loku tala Samisone o papala.

²⁸ Samisone wa vilikiya ku Yehova, hati, A Yehova Suku, hu pinga njivaluke, hu pinga ñolise onjanja eyi lika, a Suku, oco ndi fetuluinyile va Filisiti olumue ovaso ange avali.

²⁹ Samisone wa kuata kolongunji vivali viovokati, vina vi kuete onjo. Wa kunamela kokuavio, eka liaye liondio kongunji yikuavo, leka liaye liepĩli kongunji yikuavo.

³⁰ Samisone hati, Ndi fe kumue la va Filisiti. Oco wa likukutila longusu yaye yosi, kuenje onjo ya kupukila olombuale lomanu vosi va kalamo. Oco ava a ipa pokufa kuaye, ovo valua, ava a ipa osimbu a kala lomuenyo, va sule.

³¹ Oco vamanjaye lavakuepata lia isiaye vosi va lokilako, vo yelula, yu va lamana laye, kuenje vo kenda pokati ka Sora la Esitaole, veyambo lia isiaye Manoa. Wa tetuluila Isareli akuĩ avali kanyamo.