LIOLONGANJI 15 - Embimbiliya - Bíblia Sagrada em Umbundu

¹ Kovaso yaco, kotembo yoku ungula otiliku, Samisone wa enda oku pasula ukãi waye lokahombo. Kuenje hati, Njongola oku enda kukãi wange, nyiñila vohondo yaye. Puãi isia yukãi ko tavele oku iñilamo.

² Isiaye wa popia hati, Ocili nda sima siti, Ove ukãi wo suvuka. Oco nda weca kukuẽle. Manjaye ko velelepo hẽ keposo? Eye yapa o tambulapo.

³ Samisone wa popia lavo hati, Kaliye ndi pua eko la va Filisiti, nda ndi va linga cĩvi.

⁴ Samisone wa enda. Wa kuata ovita vitatu kolombulu. Yu wa nyañula imihi. Wa ñualisapo olombulu kuenje via limba icĩla. Pokati kicĩla viaco vivali, wa kapapo umihi.

⁵ Eci a miha imihi, wa eca olombulu, yu via enda kolotiliku via va Filisiti, kuenje wa yoka ovitunga viotiliku leyi yi tai, kuendavo oviumbo violiveira.

⁶ Oco va Filisiti vati, Eci helie wa ci linga? Omanu vati, Samisone, ndatembo yu Timina, momo wa wupa ukãi waye, wa weca kukuavo. Oco va Filisiti veya, va yoka ukãi londalu, eye kumue la isiaye.

⁷ Samisone wa popia lavo hati, Nda omo wa lingi omo, ocili si liweka te ndo fetuluinyi.

⁸ Wa va pupola kavangovango lovikalo, wa va kundula cimue. Noke wa lokila keleva liewe lia Etami, yu wa tumalako.

⁹ Oco va Filisiti va katuka, va tunga ocilombo vo Yuda, kuenje va lisandula vo Lehi.

¹⁰ Alume va Yuda va popia vati, Nye wa tu katukilili? Ovo vati, Tueya oku kuta Samisone, ha tu u lingi ndeci eye a tu linga.

¹¹ Oco olohulukãi vitatu vialume va Yuda via lokila keleva liewe lia Etami, va popia la Samisone vati, Kua kũlĩhile nga okuti va Filisiti, ovo olombiali vietu? Eci hẽ nye wa tu linga ndeti? Wa popia lavo hati, Ndeci va ndinga ame, haico nda va linga.

¹² Va popia laye vati, Tueya oku ku kuta, ha tu ku eci peka lia va Filisiti. Samisone wa popia lavo hati, Lisili lame, okuti heneko muẽle vu njipaya.

¹³ Va popia laye vati, Sio, etu tu ku kuta ño loku ku eca povaka avo, puãi ka tu ku ipaya. Oco vo kuta lovikolo vivali viokaliye, yu vo tundisa kewe.

¹⁴ Eci eya ko Lehi, va Filisiti va ñualehela laye loku ulula. Espiritu lia Yehova lio wila lunene. Ovikolo viokovoko aye via linga ndutele wa vawuka londalu. Ovikolo viaye via loluka kovaka aye.

¹⁵ Wa sanga olumbanjo luocimbulu ndopo lua punyuiwa. Wolola eka liaye, yu wa lu nyañula, kuenje wa ipa laluo ohulukãi yalume.

¹⁶ Samisone wa popia hati, Lolumbanjo luocimbulu, olondunda lolondunda! Lolumbanjo luocimbulu, nda ipa ohulũkãi yalume.

¹⁷ Eci a mala oku popia, wa inasi olumbanjo lua kala peka liaye. Ocitumalo caco va ci tukula vati, Ramati Lehi.

¹⁸ Samisone wa kuata enyona lialua, yu wa vilikiya ku yehova, hati, Ove wa eca epopelo eli linene leka liukuenje wove. Kaliye hẽ, ndi fa lenyona loku wila povaka oviyamba?

¹⁹ Suku wa tuiya vocivulunjanja cewe lioko Lehi, kuenje mua tunda ovava. Eci a nyuako, wa kuata vali omuenyo, kuenje wa yovoloka. Oco va luka ono yaco Enihakore. Yi kasi ko Lehi toke etaili lilo.

²⁰ Samisone wa tetuluila Isareli akuĩ avali kanyamo, koloneke via va Filisiti.