LIOLONGANJI 14 - Embimbiliya - Bíblia Sagrada em Umbundu

¹ Samisone wa lokila ko Timina, kuenje ko Timina wa molako ukãi umue u Filisiti.

² Eci a tiuka, wa sapuila isiaye la inaye hati, Ko Timina nda muilako ukãi umue u Filisiti.

³ Kaliye ko njupili, ha lingi ukãi wange. Oco isiaye la inaye va popia laye vati, Oco nga, pokati kafeko va vangandiove lopokati komanu vetu vosi, ka pali ukãi? Ci yongola hẽ oku ka sanda ukãi koviyamba viaño va Filisiti? Puãi Samisone wa popia la isiaye hati, Ko njupile, momo eye wa njela kutima.

⁴ Puãi isiaye la inaye ka va kũlĩhile okuti ca tunda ku Yehova. Momo Samisone wa kala loku sanda evelo lioku yakisa va Filisiti. Koloneke viaco, va Filisiti ovo va tulamela Isareli.

⁵ Oco Samisone wa lokila ko Timina, kumue la isiaye la inaye, yu weya koviumbo viayuva vioko Timina. Kuenje tala, eyove liohosi lio tundila loku koma.

⁶ Espiritu lia Yehova lio wila lunene. Yu wa tola ohosi pokati, ndeci omunu a tola okahombo, eye lacimue ambatele peka. Puãi eci a linga, ka ci sapuilile isiaye ndaño inaye.

⁷ Wa lokilako, yu wa vangula lukãi, leye wa yela kutima wa Samisone.

⁸ Kovaso yoloneke vimue, wa tiukila ko Timina oku lomba ukãi. Wa pambuka ha tali ocife cohosi, kuenje tala, vetimba liohosi mua kala esunga liolonyihi lowiki.

⁹ Wa wupamo leka liaye, yu wa enda loku lia vonjila. Eci eya kuisiaye la inaye, wa va ihako, yu va lia. Puãi ka va sapuilile okuti owiki waco wa wupa vocife cohosi.

¹⁰ Isiaye wa lokila kukãi. Kuenje Samisone wa lingilako ofesta. Momo oco amãlẽhe va tuwile oku lingainga.

¹¹ Eci vo mõla va nena akuĩ atatu kakuenje la akuavo ha va kala laye.

¹² Samisone wa popia lavo hati, Kaliye ndu teli olusapo. Nda voloneke epanduvali viofesta vu lu nukuili loku lu situlula oco nda wĩhi akuĩ atatu kovowalo ovalatanya, lakuĩ atatu kovowalo oku lipongolola.

¹³ Puãi nda ko tela oku lu nukuila, oco ene vu nyiha akuĩ atatu kovowalo ovalatanya, lakui atatu kovowalo oku lipongolola. Va popia laye vati, Ta olusapo luove, oco tu lu yeve.

¹⁴ Wa popia lavo hati, Kukuakulia kua tunda eci ci liwa liwa. Ku wa pama kua tunda eci ci sosa. Kuenje voloneke vitatu ka va tẽlele oku tukula olusapo luaco.

¹⁵ Keteke liakuãla, ovo va popia lukãi wa Samisone, vati, Yonja veyove, a tu sapuile olusapo, sanga tu ku yoka londalu, ove lonjo ya so. Nga wa tu lalekeli oku tu punda? Hacoko?

¹⁶ Ukãi wa Samisone wa lilila kovaso aye, kuenje hati, Ove wa suvuka, ku sole ale. Wa tela vakuafeka yange olusapo, kuenje kua lu sapuilile. Samisone wa popia laye hati, Tala, sia lu sapuilile tate ndaño mai, ove nga hu lu sapuila?

¹⁷ Wa lilila kovaso aye oloneke epanduvali via tumala ofesta yavo. Keteke liepanduvali wo sapuilako, momo wo sakalaisa calua. Oco ukãi wa sapuila vakuafeka yaye olusapo luaco.

¹⁸ Eteke liepanduvali, osimbu ekumbi ka lia iñilile, omanu vimbo va popia laye, vati, ye ci sõsa, nda hawikiko? ye ca pama, nda hahosiko? Eye wa popia lavo hati, Nda ka wa limili lonema yange, nda ka wa situluili olusapo luange.

¹⁹ Espiritu lia Yehova lio wila lunene, kuenje wa lokila kAsikelone. Wa ipako akuĩ atatu kalume. Wa nyañula ovikuata viavo kuenje wa eca ovowalo oku lipongolola kuava va tukula olusapo. Wa lamanela konjo ya isiaye, onyeño ka likuete.

²⁰ Ukãi wa Samisone wa eciwa kukuavo, una wa kaile ekamba liaye.