LIOLONGANJI 12 - Embimbiliya - Bíblia Sagrada em Umbundu

¹ Alume va Efarimi va likonga, yu va yokila ko Safono, kuenje va popia la Yefita, vati, Wa endelele nye kesinya oku liyaka la va Amoni, yu kua tu pañinyile ha tu endi love? Tu ku yokela onjo yova koñoño.

² Yefita wa popia lavo hati, Ame lomanu vange tua kala luyaki walua la va Amoni. Eci ndo pañinyi, ene ka wa mopeleli peka liavo.

³ Eci nda limbuka okuti ko mopela, oco nda kuata omuenyo wange peka, nda katukila va Amoni, kuenje Yehova wa va eca peka liange. Oco hẽ, nye wa ñatukilili etaili, ho liyaki lame?

⁴ Oco Yefita wongolola alume vosi va Gileada, kuenje wa liyaka la va Efarimi. Alume va Gileada va lundula va Efarimi, momo va popele vati, Ene a va Gileada, wa tili kEfarimi, ene vu kasi pokati kEfarimi la Manase.

⁵ Va Gileada va kuata olonjiva via Yordão via lisuñama la Efarimi. Kuenje eci umue wa tila kEfarimi a popia hati, Njokisi, oco alume va Gileada va popia laye vati, Ove wu Efarimi, ale? Nda o popia hati, Sio,

⁶ va popia laye vati, Popia huti, Civolete. Eye hati, Sivolete, momo ka tela oku yi tukula ciwa. Oco vo kuata, va wipaila kolonjiva via Yordão. Koloneke viaco kua fa olohulukãi akuĩ akuãla lavivali via va Efarimi.

⁷ Yefita wa tetuluila Isareli anyamo epandu. Yefita u Gileada wa fa, kuenje vo kenda vimbo limue liovo Gileada.

⁸ Kovaso yaye, Ivisana u Beteleme eye wa tetuluila Isareli.

⁹ Wa kala lakuĩ atatu komala valume. Akuĩ atatu komala vaye vakãi, wa va kuelisa kapata amue añi, kuenje wopako akuĩ atatu komãla vakãi ha va kuela lomãla vaye valume. Wa tetuluila Isareli anyamo epanduvali.

¹⁰ Ivisana wa fa kuenje vo kenda ko Beteleme.

¹¹ Kovaso yaye, Eloni u Sevulono, eye wa tetuluila Isareli. Wa tetuluila Isareli ekui lianyamo.

¹² Oco Eloni u Sevulono wa fa, yu vo kenda kAyalone, vofeka ya Sevulono.

¹³ Kovaso yaye, Avidone, omõla a Hileli, u Piratoni, eye wa tetuluila Isareli.

¹⁴ Wa kala lakuĩ akuãla komãla valume, lakuĩ atatu kolonekulu. Ovo va endaila kovimbulu akuĩ epanduvali. Wa tetuluila Isareli anyamo ecẽlãla.

¹⁵ Avidone, omõla a Hileli, u Piratoni, wa fa. Yu vo kenda ko Piratoni, vofeka ya Efarimi, kolomunda via va Amaleke.