LIOLONGANJI 11 - Embimbiliya - Bíblia Sagrada em Umbundu

¹ Yefita u Gileada, wa kala ulume wa pama, ukuotoi. Haeye omõla ocipuepue. Gileada eye wa cita Yefita.

² Ukãi wa Gileada wo citilavo omala valume. Eci omala vukãi waye va kula, va tundisa Yefita, kuenda va popia laye vati, Ove ku piñala vonjo ya tate, momo wumola ukãi umue wiñi.

³ Oco Yefita wa tila ku vamanjaye yu wa tumala kofeka ya Tova. Omanu vakuesanda va liongoluila Yefita, yu va enda enda laye.

⁴ Eci pa pita oloneke, va Amoni va liyaka la va Isareli.

⁵ Oco eci va Amoni va liyaka la va Isareli, akulu va Gileada va kopile Yefita kofeka ya Tova.

⁶ Va popia la Yefita, vati, Enju ndo linge usongui wetu, ha tu liyaki la va Amoni.

⁷ Yefita wa popia lakulu va Gileada, hati, Ka wa suvukili, kuenda ka wa nundisili hẽ vonjo ya tate? Kaliye omo wa sakalaisui, weyi kokuange?

⁸ Akulu va Gileada va popia la Yefita, vati, Oco kaliye tua pongolokela kokuove okuti wenda letu hu yaki la va Amoni, kuenje o linga usongui wetu, usongui wava vosi va tunga vo Gileada.

⁹ Yefita wa popia lakulu va Gileada hati, Nda vu nuala vali kimbo lietu hã si ka liyaka la va Amoni, kuenda nda Yehova o va eca kokuange, oco ndinga usongui wene.

¹⁰ Akulu va Gileada va popia la Yefita vati, Yehova o linga ombangi pokati ketu love. Ocili muẽle, tu linga ndondaka yove.

¹¹ Oco Yefita wa enda kumue lakulu va Gileada, kuenje omanu vo lingisa kesongo liavo kuenda ndusongui. Kuenje Yefita wa popela olondaka viaye viosi kovaso a Yehova ko Misipa.

¹² Yefita wa tuma olomunga kosoma ya va Amoni, hati, Nye o likuetele lame okuti weya kokuange oku yaka lofeka yange?

¹³ Soma ya va Amoni wa tambulula olomunga via Yefita, hati, Momo Isareli, cina a tunda kEgito, wa pundile ofeka yange, tunde kArinone toke ko Yavoke kuenda toke ko Yordão. Oco kaliye yi tiula lombembua.

¹⁴ Yefata wa tuma vali olomunga kosoma ya va Amoni.

¹⁵ Wa popia laye hati, Ca popia Yefita ceci, hati, Isareli ka pundile ofeka ya Moavi, ndaño ofeka ya va Amoni.

¹⁶ Puãi eci Isareli a tunda kEgito, wa pita vekalasoko toke ko Kalunga Kakusuka, kuenje weya ko Kadesi.

¹⁷ Oco Isareli wa tuma olomunga kosoma ya Edome, hati, Tava okuti tu pita vofeka yove. Puãi Soma ya Edome ka tavele. Va tumavo kosoma ya Moavi, puãi leye ka tavele. Kuenje Isareli wa tumala ko Kadesi.

¹⁸ Noke wa tomela vekalasoko. Wa konda ofeka ya Edome, lofeka ya Moavi, kuenje wa pitila kutundilo wofeka ya Moavi. Wa tunga ocilombo sinya olio liolui Arinone. Puãi ka va iñilile vofeka ya Moavi, momo olui Arinone, oluo ongave ya Moavi.

¹⁹ Isareli wa tuma olomunga ku Sihoni, Soma ya va Amori, Soma ya Hesibone. Isareli wa popia laye hati, Tava okuti tu pita vofeka yove ha tu endi kocitumãlo cetu.

²⁰ Puãi Sihoni ka kolelele Isareli oku u pitisa vofeka yaye. Oco Sihoni wongoluila pamosi omanu vaye vosi. Wa tunga ocilombo ko Yahasa, kuenje wa yaka la Isareli.

²¹ Yehova Suku ya Isareli wa eca Sihoni kumue lomanu vaye vosi peka lia Isareli, kuenje va va lundula. Oco va Isareli va kuata ofeka yosi ya va Amori, haivo olonungi viofeka yaco.

²² Va kuata ofeka yosi ya va Amori, tunde kArinone toke ko Yavoke, tunde kekalasoko toke ko Yordão.

²³ Oco Yehova Suku ya Isareli wa tundisa va Amori kovaso omanu vaye va Isareli. Ove nga ove o tambula ofeka yavo?

²⁴ Ku tambula nga ofeka ya ku iha suku yove Kemosi ha yi lingi yove? U wosi Yehova Suku yetu a tundisa kovaso etu, etu tu tambula ofeka yaye.

²⁵ Ove nga wa velapo Balaka, omõla a Cipora, Soma ya Moavi? Eye wa tamalala hẽ la Isareli? Wa liyaka hẽ lavo limue eteke?

²⁶ Ovita vitatu kanyamo Isareli wa tumala ko Hesibone lokovikanjo viaco, lo kAroere lokovikanjo viaco, lokovaimbo osi okonele yolui Arinone. Anyamo aco osi, nye ka wa pundilili vali ovaimbo andeti?

²⁷ Oco ame sia ku lueyelele, ove puãi wa ndueyela oku njakisa. Yehova Onganji, etaili a tetulule pokati ka va Isareli la va Amoni.

²⁸ Haimo Soma ya va Amoni ka yevelelele kolondaka vio tumisa Yefita.

²⁹ Oco Espiritu lia Yehova lia wila Yefita. Yu wa tomẽla ko Gileada la Manase, wa pita ko Misipa ya Gileada, wa katukila va Amoni.

³⁰ Yefita wa lisinga ku Yehova hati, Nda weca va Amoni peka liange,

³¹ oco eci ndi tiuka koku yula va Amoni, wosi o tunda volombundi vionjo yange, ha ñualehela lame, o linga wa Yehova, kuenje ndu lumba ndocilumba coku pia elisi.

³² Oco Yefita wa pitila ku va Amoni, oku liyaka lavo, kuenje Yehova wa va eca peka liaye.

³³ Wa va muisa ekundu linenenene, tunde kAroere toke ocipepi la Miniti, ca soka akui avali kovaimbo, kuenda toke kAvelikerami. Oco va Amoni va pokuisilua kovaso a va Isareli.

³⁴ Yefita wa tiukila konjo yaye ko Misipa. Kuenje tala, omolaye ukãi wa tunda oku ñualehela laye lotuñoma loku cĩla. Eye omolaye wongunga, ka kaile vali ndaño lomola ulume, ndaño lomõla ukãi.

³⁵ Eci o mõla, wa tola uwalo waye, kuenje hati, Avoyo we, amõlange! Wa matulula cimue, ove wa ñokela oku tokotelua. Momo lomela wange nda likuminya ku Yehova, kuenje si tela vali oku litiulamo.

³⁶ Eye wa popia laye hati, A tate, nda lomela wove wa likuminya ku Yehova, oco ndinge ndeci wa popia lomela wove, momo cilo Yehova wa ku fetuluinyila ovanyãli vove, va Amoni.

³⁷ Wa ngece handi olosãi vivali, si endi, si lokila ame kumue lafeko, vakuetu.

³⁸ Wa popia laye hati, Kuende. Oco wa weca olosai vivali. Yu wa enda eye kumue lafeko vakuavo, kuenje wa lilila usombolua waye kolomunda.

³⁹ Kovaso yolosãi vivali, wa tiukila ku isiaye, leye wa linga laye ndesingo liaye a lisingile. Ufeko waco ka la kuliha ulume. Kuenje ca linga ocituwa kIsareli,

⁴⁰ okuti unyamo kunyamo, afeko va Isareli va enda enda oloneke vikuãla vunyamo oku ivaluka omõla a Yefita u Gileada.