LIOLONGANJI 10 - Embimbiliya - Bíblia Sagrada em Umbundu

¹ Kovaso ya Avimeleke, Tola, omõla a Puwa, omõla a Dodo, u Isakare, wa katuka ha popela Isareli. Wa tunga ko Siamiri, kolomunda via Efarimi.

² Wa tetuluila Isareli anyamo akuĩ avali la atatu. Noke wa fa kuenje wa kendiwa ko Siamiri.

³ Kovaso yaye kua katuka Yairi u Gileada. Yu wa tetuluila Isareli anyamo akuĩ avali la avali.

⁴ Wa kala lakuĩ atatu komãla valume va endaila kovimbulu akuĩ atatu. Va kala lakui atatu kovaimbo, a tukuiwa Havote Yairi, toke etaili lilo, hao a kasi vofeka ya Gileada.

⁵ Yairi wa fa, kuenje vo kenda ko Kamone.

⁶ Va Isareli va linga vali eci cĩvi kovaso a Yehova. Va vumba vo Baale, lAsitarote, lolosuku via Suria, lolosuku via Sidono, lolosuku via Moavi, lolosuku via va Amoni, lolosuku via va Filisiti. Va yanduluka Yehova, ka vo vumbile.

⁷ Onyeño ya Yehova ya wengukila va Isareli. Yu wa va landisa peka lia va Filisiti lopeka lia va Amoni.

⁸ Va sipata va Isareli kuenda va va talisa ohali unyamo waco. Anyamo ekui lecẽlãla va talisa ohali va Isareli vosi, vana va kala kesinya lia Yordão, vofeka ya va Amori, vo Gileada.

⁹ Va Amoni va yoka Yordão ha va yakivo la Yuda la Benjamini lepata lia Efarimi. Oco Isareli wa sakalaisua calua.

¹⁰ Va Isareli va vilikiya ku Yehova, vati, Tua ku lueyela, momo tua yanduluka Suku yetu, kuenje tua vumba vo Baale.

¹¹ Yehova wa popia la va Isareli, hati, Sio popeleli hẽ ku va Egito la va Amori, loku va Amoni la va Filisiti?

¹² Va Sidono lavovo, la va Amaleke la va Maoni vo talisi ohali. Ene wa vilikiyi kokuange, kuenje ndo popeli peka liavo.

¹³ Haimo wa njanduluki, wa vumbi olosuku viñi. Oco ame siu popeli vali.

¹⁴ Kuendi, ka vilikiyi kolosuku vina wa noli. Ovio viu popeli kohali yene.

¹⁵ Va Isareli va popia la Yehova vati, Tua linga ekandu. Linga letu ndeci ca ku sungulukila. Cinene ndo tu popele ño etaili.

¹⁶ Oco va tundisa olosuku viñi pokati kavo, kuenje va vumba Yehova. Leye ka tẽlele vali oku tutuiya ocikembe cutima waye kupongo wa Isareli.

¹⁷ Va Amoni va likonga, yu va tunga ocilombo ko Gileada. Kuenda va Isareli va liongolola, yu va tunga ocilombo ko Misipa.

¹⁸ Omanu, olombuale via Gileada, va livangula pokati, vati, Helie ulume waco o fetikako oku liyaka la va Amoni? Eye o linga usongui wava vosi va tunga vo Gileada.