I YOANO 5 - Embimbiliya - Bíblia Sagrada em Umbundu

¹ Wosi o tava okuti Yesu eye Mesiya eye wa citiwa la Suku, kuenda wosi o sole onjali o solevo omõla.

² Tua kũlĩha okuti tu sole omãla va Suku nda tu sole Suku loku pokola kovihandeleko viaye.

³ Momo oku sola Suku kua lomboloka oku pokola kovihandeleko viaye. Ovihandeleko viaye ka vi lemi.

⁴ Cosi ca citiwa la Suku ci yula oluali. Eyulo li yula oluali haili, ekolelo lietu.

⁵ U o yula oluali helie, nda hayuko o tava okuti Yesu eye Omõla a Suku?

⁶ Yesu Kristu eye u weya lovava losonde. Halovavako lika puãi lovava losonde.

⁷ Kuenje Espiritu eye ombangi, momo Espiritu eye ocili.

⁸ Kuli olombangi vitatu. Espiritu, lovava, kuenda osonde, katatu kavio uvangi wavio umosi.

⁹ Nda tu tava kuvangi womanu, uvangi wa Suku wa piãla vali. Momo uvangi Suku a imbila Omõlaye owo uvangi wa Suku.

¹⁰ U o tava ku Mõla a Suku o kuete uvangi waco vonulo yaye. U ka tava ku Suku wo lingisa ohembi, momo ka tavele kuvangi una Suku a imbila Omõlaye.

¹¹ Uvangi waco haiwu, Suku wa tu iha omuenyo ko pui, kuenje omuenyo waco u kasi v'Omõlaye.

¹² U o kuete Omõla o kuete omuenyo. U ka kuete Omõla a Suku ka kuete omuenyo.

¹³ Eci ndu ci soneheli ene wa koleli onduko ya Mõla a Suku. Ndu soneheli oco vu kũlĩhe okuti vu kuete omuenyo ko pui.

¹⁴ Ekolelo tu u kuetele lieli, nda tu pinga cimue ca sungulukila ocipango caye eye o tu yeva.

¹⁵ Kuenje, nda tua kũlĩha okuti o tu yeva pokati kapingilo osi, oco tua kũlĩhavo okuti tu tambula eci tuo pinga.

¹⁶ Umue nda o lete manjaye o li loku linga ekandu ka li koki okufa, o pingilako kuenje Suku o muisila omuenyo ava ka va lingile ekandu li koka okufa. Kuli ekandu li koka okufa. Si popi siti, Olio co sesameli oku li likutilila.

¹⁷ Cosi hesungako oco ekandu, puãi ku li ekandu haliokufako.

¹⁸ Tu ci okuti wosi wa citiwa la Suku ka lingainga ekandu. Puãi Yesu, u wa citiwa la Suku, u lava, kuenje eliapu ka liu lambi.

¹⁹ Tu ci okuti tu tiamela ku Suku, loluali luosi li kasi povaka eliapu.

²⁰ Tu ci okuti Omõla a Suku weya, kuenje wa tu iha olondunge vioku kũlĩha U wocili, kuenje tu kasi vu wocili, okuti v'Omõlaye Yesu Kristu. Eye Suku yocili haeye omuenyo ko pui.

²¹ Atumãla, lilavi koviteka.