I YOANO 4 - Embimbiliya - Bíblia Sagrada em Umbundu

¹ A vakuacisola, ko ka tavi kaspiritu osi, puãi seteki aspiritu nda a Suku nda ndati. Momo ovaprofeto vesanda va lua va sandukila voluali.

² Espiritu lia Suku vu li limbuka ndomo, Espiritu liosi li tava okuti Yesu Kristu weya letimba olio Espiritu lia tunda ku Suku.

³ Espiritu liosi ka li tava okuti Yesu Kristu weya letimba olio halia Sukuko, puãi lia antikristu. Wa ci yevi okuti liya, cilo puãi li kasi ale voluali.

⁴ Atumãla, ene wa tiameli ku Suku kuenda wa yuli aspiritu ãvi. Momo u o kasi volonulo viene wa piãla, u o kasi voluali o sule.

⁵ Ovo vakualuali, oco, eci va popia popia, coluali, kuenje oluali lu va yeva.

⁶ Etu tu tiamela ku Suku. Wosi wa kũlĩha Suku o tu yeva. Wosi ka tiamelele ku Suku ka tu yevi. Oko tu limbukila Espiritu liocili lespiritu liuhembi.

⁷ A vakuacisola, tu lisoli pokati, momo ocisola ca tunda ku Suku. Wosi o sole wa citiwa la Suku, kuenje wa kũlĩha Suku.

⁸ U ka soli ka kũlĩhile Suku, momo Suku eye ocisola.

⁹ Ocisola ca Suku ca moleha ocili kokuetu omo a tuma Omõlaye wongunga voluali ha tu muila omuenyo kokuaye.

¹⁰ Omo hetuko tua sola Suku, puãi Suku wa tu sola etu, kuenje wa tuma Omõlaye ha lingi ocitundasonde cakandu etu, oco ca lomboloka ocisola.

¹¹ A vakuacisola, omo Suku a tu sola ndomo, oco ca tu sesamelavo oku lisola pokati.

¹² Lomue wa la mola Suku. Nda tu lisola pokati Suku o kala volonulo vietu, locisola caye ci suapo volonulo vietu.

¹³ Oco tua kũlĩha okuti tu kasi vokuaye, leye o kasivo vokuetu, momo wa tu tepelako onepa ye Espiritu liaye muẽle.

¹⁴ Letu tua mola, kuenje tu imba uvangi okuti, Isiaco wa tuma Omõlaye ha lingi Upopeli woluali.

¹⁵ Wosi o tava okuti Yesu eye Omõla a Suku, Suku o kala vokuaye, leye o kala vu Suku.

¹⁶ Oco tua kũlĩha kuenda tua kolela ocisola caco Suku a tu kuetele. Suku eye ocisola, kuenje u o kala vocisola o kala vu Suku, kuenje Suku o kala vokuaye.

¹⁷ Oco ocisola ci suapo vokuetu. Oco tu kuata utõi veteke liekanga, momo ndeci eye a kasi, haico etu tu kasi voluali lulo.

¹⁸ Vocisola ka muli usumba, puãi ocisola ca suapo cimũla usumba. Momo usumba wenda leyambulo, lu o kasi lusumba ocisola ka co suilepo.

¹⁹ Etu tu u sole momo eye wa lianga oku tu sola.

²⁰ Umue nda o popia hati, Ndi sole Suku, kuenje o suvuka ukuavo, ohembi, momo u ka sole ukuavo a lete ka tẽla oku sola Suku ka lete.

²¹ Tu kuete ocihandeleko ca tunda kokuaye ceci okuti, u o sole Suku a solevo ukuavo.