I YOANO 3 - Embimbiliya - Bíblia Sagrada em Umbundu

¹ Tali ocisola ca piãla ndomo Isia a tu ciha okuti tua tukuiwa omãla va Suku, kuenje ocili, tumãla vaye. Omo oluali ka luo kũlĩhile eye, oco ka lua tu kũlĩhilevo etu.

² A vakuacisola, kaliye tumãla va Suku. Ka ca molehele handi ndomo tu kala. Puãi tua kũlĩha okuti, eci a tukuluka, tu lisetahala laye momo tu u mola ndomo a kasi.

³ Wosi u kuetele elavoko liaco o liyelisa, ndeci eye muẽle a yela.

⁴ Wosi o linga ekandu wa pia ekandu lioku sinila ovihandeleko, momo ekandu esino.

⁵ Wa kũlĩhi okuti eye wa tukulukila oku upa akandu, kuenje vokuaye ka muli ekandu.

⁶ Wosi o kala kala vokuaye ka lingainga ekandu. Wosi o lingainga akandu ko moli, pamue oku u kũlĩha.

⁷ Amãla, lomue ka ko lueyisi. U o lingainga esunga ukuesunga ndomo Omõla a Suku ukuesunga.

⁸ U o lingainga akandu ukueliapu, momo eliapu li lingainga akandu tunde kefetikilo. Oco Omõla a Suku a tukulukila okuti o nyõla ovilinga vieliapu.

⁹ Wosi wa citiwa la Suku ka lingainga akandu, momo omuenyo wa Suku u kala kala vonulo yaye, kuenje eye ka tẽla oku lingainga akandu, momo wa citiwa la Suku.

¹⁰ Omãla va Suku lomãla veliapu va limbukiwa ndomo okuti, wosi ka lingi esunga hamõla a Sukuko, ndaño u ka sole ukuavo.

¹¹ Ondaka wa yevi tunde kefetikilo yeyi yokuti, cetu oku lisola pokati,

¹² oku setahala ukueliapu Kaini, una wa ponda manjaye, hacoko. Wo pondela nye? Wo ponda momo ovilinga viaye via vĩha, via manjaye via sunguluka.

¹³ Ko ka komohi, akuetu, nda oluali lu vu suvuka.

¹⁴ Tua kũlĩha okuti tua sondoluiwa kokufa loku sondoluiwila komuenyo momo tu sole vakuetu. U ka sole ukuavo o kala ño-o vokufa.

¹⁵ Wosi o suvuka ukuavo omondi, kuenje wa kũlĩhi okuti layimue omondi yi kasi lomuenyo ko pui vokati kaye.

¹⁶ Omo a tu ecela omuenyo waye, oco tua kũlĩha ocisola ndomo ci kasi. Ca tu sesamela oku ecela vakuetu ovimuenyo vietu.

¹⁷ Puãi, nda umue o kuete ovipako violuali lulo, kuenje, eci a lete ukuavo lusuke, o tĩlisa utima, ocisola ca Suku ci tumala ndati vutima waye?

¹⁸ Atumãla, ka tu ka soli londaka pamue lelimi, te lovilinga kuenda locili.

¹⁹ Nda tu ci linga tu limbuka okuti tua tiamela kocili, kuenje tu tulila ovitima vietu kovaso aye,

²⁰ eci ovitima vietu vi tu veta evelo. Momo Suku wa piãla, ovitima vietu vi sule, kuenje eye wa kũlĩha cosi.

²¹ A vakuacisola, nda ovitima vietu ka vi tu veta evelo tu kala lutõi kovaso a Suku.

²² Kuenje cosi tu pinga kokuaye tu ci tambula, momo tu pokola kovihandeleko viaye loku linga ovina viu sanjuisa.

²³ Ocihandeleko caye ceci okuti, tu kolela onduko y'Omõlaye Yesu Kristu loku lisola pokati ndeci a tu handeleka.

²⁴ Wosi o pokola kovihandeleko via Suku o kala vu Suku, kuenje Suku o kalavo vokuaye. Tua kũlĩha okuti eye o kala vokuetu, momo wa tu iha Espiritu.