I YOANO 2 - Embimbiliya - Bíblia Sagrada em Umbundu

¹ Atumãla tuange, ñasi loku vu sonehela ovina evi okuti ka vu lingi vali akandu. Puãi, nda umue o linga ekandu tu kuete oñuatisi yi tu livondelela kovaso a Isia, eye Yesu Kristu ukuesunga.

² Eye ocitundasonde cakandu etu, puãi akandu etu ha-oko lika, te la-a oluali luosi.

³ Kokupokola kovihandeleko viaye oko tu limbukila nda hẽ tuo kũlĩha nda ndati.

⁴ U o popia hati, Ndu wi, puãi ka pokola kovihandeleko viaye, ohembi, kuenda vutima waye Ocili ka cimo.

⁵ Puãi wosi o pokola kondaka yaye, ocisola ca Suku ca suapo ocili vutima waye. Oku tu limbukila okuti tu kasi laye koku okuti,

⁶ u o linga hati, Ñala ño-o vokuaye, co sesamela oku endaenda ndeci eye a endaenda.

⁷ A vakuacisola, si kasi loku vu sonehela ocihandeleko cokaliye, te ocihandeleko cale wa kali laco tunde kefetikilo. Ocihandeleko caco cale oco ondaka wa yevi.

⁸ Haimo lumue, ñasi loku vu sonehela ocihandeleko cokaliye haico cocili vokuaye kuenda vokuene, momo owelema u kasi loku pita, locinyi cocili ca fetika ale oku tua.

⁹ U o linga hati, Ñasi vocinyi, kuenje o suvuka ukuavo, eye haimo a kasilili vowelema.

¹⁰ U o sole ukuavo, vocinyi haimo a li. Eye ka lingila ukuavo ocilondokua.

¹¹ Puãi u o suvuka ukuavo, vowelema haimo a li, kuenje endaila vowelema. Ka kũlĩhile oku a ilila, momo owelema wa tekavisa ovaso aye.

¹² Atumãla tuange, ñasi loku vu sonehela omo akandu ene a ecelua mekonda lionduko yaye.

¹³ Alonjali vialume, ñasi loku vu sonehela omo wa kũlĩhi una o kasi tunde kefetikilo. Akuenje, ñasi loku vu sonehela omo wa yuli eliapu. Amãla, ñasi loku vu sonehela omo wa kũlĩhi Isia.

¹⁴ Alonjali vialume, ñasi loku vu sonehela omo u wa kala tunde kefetikilo vu wi. Akuenje, ñasi loku vu sonehela omo wakuangusu, kuenje ondaka ya Suku yi kala volonulo viene, haene wa yuli eliapu.

¹⁵ Ko ka soli oluali pamue ovina vi kasi voluali. Nda omunu o sole oluali, ocisola ca Isia ka ci kasi vutima waye.

¹⁶ Momo ovina viosi vi kasi voluali, okuti oñeyi yetimba, loñeyi yovaso, kuenda oku litunila ovina viomuenyo waluo, ka via tundile ku Isia, te koluali.

¹⁷ Oluali lu takata loñeyi yaluo, puãi u o lingainga ocipango ca Suku o kala oloneke ka vi pui.

¹⁸ Amãla, vilo ovio oloneke viefulilo. Ndeci wa yevi okuti antikristu iya, haico ci kasi, kuenje va antikristu va lua veya ale. Oco tua limbuka okuti vilo ovio oloneke viefulilo.

¹⁹ Va tunda pokati ketu puãi ka va kaile vetu, momo, nda va kaile vetu, nda va tumalale letu, puãi va tunda oco va molehe okuti vosi havetuko.

²⁰ Ene puãi wa wavekiwi lona o kola, kuenda vosi vu kuete ukũlĩhiso.

²¹ Sio soneheleli omo ka wa kũlĩhili ocili, puãi omo wa ci kũlĩhi, kuenje wa kũlĩhivo okuti kocili ka ku tundi uhembi.

²² Ohembi elie, te u wa likala hati, Yesu heyeko Kristu? U o likala Isia la Mõla eye muẽle antikristu.

²³ Lomue o likala Omõla o tẽla oku kala la Isiaco. U o kolela Omõla o kuete Isiaco.

²⁴ Eci wa yevi tunde kefetikilo ci kale volonulo viene oloneke viosi. Nda eci wa yevi tunde kefetikilo ci kala volonulo viene vu kala vu Mõla kuenda vu Isiaco.

²⁵ Eci a tu likuminya ceci, Omuenyo ko pui.

²⁶ Ñasi loku vu sonehela ovina evi oku vu lomboluila ava va yongola oku vu lueyisa.

²⁷ Puãi okuwavekua eye o waveki lakuo ku kala vokuene, kuenje ka vu sukila vali okuti umue o vu longisa. Momo okuwavekua eye o waveki lakuo ku vu longisa kovina viosi, haikuo kuocili, hakuhembiko. Kali vokuaye ndeci kua vu longisa.

²⁸ Kaliye, atumãla, kali vokuaye okuti eci a tukuluka tu kala lutõi, kuenje ka tu u kuatela osõi eci a tukuluka.

²⁹ Nda wa kũlĩhi okuti eye ukuesunga, limbuki okuti wosi o lingainga esunga wa citiwa laye.