I YOANO 1 - Embimbiliya - Bíblia Sagrada em Umbundu

¹ Tu kasi loku vu sonehela oku vu lomboluila cimue condaka yomuenyo ci kasi tunde kefetikilo. Etu tua ci yeva, kuenda tua ci mola lovaso etu, tua ci tala, Kuenda tua ci lamba lovaka etu.

² Momo omuenyo wa tukuluiwa. Etu tuo mola kuenda tu wimbila uvangi, kuenje tu vu sapuila omuenyo ko pui, una wa kala la Isia, haiwo wa tukuluiwa kokuetu.

³ Eci tua mola haico tua yeva oco tu sapulavo kokuene okuti vu kala vongongela yimuamue letu. Ongongela yetu yi kasi la Isia l'Omõlaye Yesu Kristu.

⁴ Tu kasi loku soneha ovina evi okuti esanju lietu li suapo.

⁵ Ondaka tua yeva kokuaye kuenje tu yi sapula kokuene yeyi okuti, Suku eye ocinyi. Vokuaye ka muli owelema, ndaño naito.

⁶ Nda tu linga tuti, Tuakuangongela kumuamue laye, osimbu tu endaila vowelema, tu kemba, kuenda kovimuenyo vietu ka tu kuama Ocili.

⁷ Puãi, nda tu endaila vocinyi, ndeci eye a kasi vocinyi, tu kuete ongongela pokati ketu, kuenje osonde ya Yesu Omõlaye yi tu yelisa kakandu osi.

⁸ Nda tu popia tuti, Ka tu kuete akandu, tu lilimbika, kuenda Ocili vitima vietu ka cimo.

⁹ Nda tu likekembela akandu etu loku a sapula, eye ukuacili, haeye ukuesunga, o tu ecela akandu etu, kuenje o tu yelisa kavĩho osi.

¹⁰ Nda tu linga tuti, Ka tua lingile akandu, tuo lingisa ohembi, kuenda ondaka yaye vitima vietu ka yimo.