I VA KORINDO 4 - Embimbiliya - Bíblia Sagrada em Umbundu

¹ Ca sesamela okuti omanu va tu sokolola ndoloñuatisi via Kristu, haetu tuvakalei kalumbu a Suku.

² Kuenda vali, ca sesamela vakalei oku lilekisa okuti va sunguluka.

³ Ame puãi, nda vu sombisa, pamue nda ekanga liomanu li sombisa, ka ci ndingi cimue. Ndaño ame si lisombisa ame muẽle.

⁴ Ocili, sia kũlĩhile eci ci misa, haimo lumue, eci ka ca lombolokele okuti nda yovoka. U o netuluila Ñala.

⁵ Oco, ko ka tetululi osimbu otembo yaco ka yeyile, okuti osimbu Ñala keyile. Eye o nena kutanya evi via wunda handi vowelema, haeye o situlula ovipango viosi viovitima. Kotembo yaco omunu omunu o panduiwa la Suku.

⁶ Cosi eci, a vamanji, nda ci tuala ndolusapo oku u lomboluili Apolosi lame ndomo tu kasi. Njongola okuti u lilongisi kongangu yetu oku pokola kovisonehua, sanga pokati kene umue amela ulongisi u loku pembula ulongisi ukuavo.

⁷ Momo helie o limbuka okuti vu kuete cimue vakuẽle ka va kuete? O kuete nye okuti kua ci tambuile ocali? Nda wa ci tambula ocali o lipandela nye, ndu kua ci tambuile ocali?

⁸ Wekuti ale! Wa lingi ale olohuasi! Wa viali ale ndolosoma eci etu ka tua kailepo! Ñasi loku livela nda wa viali ocili okuti etu nda tua vialelavo kumuamue lene!

⁹ Momo nda sima okuti, etu tuvapostolo Suku wa tu kapa kefulilo liendo ndava va pisiwila okufa, momo tua linga etalula kovaso oluali kuenda kovaso ovangelo lo kovaso omanu.

¹⁰ Etu tuaveke mekonda lia Kristu, ene puãi we yuki olondunge via Kristu. Etu tua leñela, ene puãi wa pami. Ene vu sumbiliwa lulamba, etu tu sepuiwa.

¹¹ Toke kola yilo, tu lamboka, tu yeva yeva enyona, tu kala kala epẽle, tu tendowaiwa, tuakuakutuñayãla.

¹² Tu lingainga upange woku talavaya lovaka etu muẽle. Eci va tu imbula tu va likutilila. Eci va tu talisa ohali tu pandikisa.

¹³ Eci va tu siliñinya tu livondela. Toke etaili lilo omanu va tu lingisa ño ndovina viokeyala lioluali, pamue ndonasi yovina viosi.

¹⁴ Ovina evi sio vi soneheleli oku u kutisi osõi, ndo vi soneheli oku u lunguli ndomãla vange va soliwa.

¹⁵ Omo, ndaño wu kasi lohuluwa yovalongisi vu Kristu, haimo lumue, vaisiene ka va luile. Ame nda linga isiene vu Kristu Yesu eci ndo yevisi ondaka yiwa.

¹⁶ Oco ndu peyeli okuti u setukuli ame.

¹⁷ Oco ndo tumisili Timoteo. Eye omõlange vu Ñala, haeye sole kuenda ndo kolela. Ndo tumila okuti o wivaluisi ovituwa viange vu Kristu, evi ndongaisa kuosi, kakongelo osi.

¹⁸ Vamue pokati kene va lipandiya, huti ño va sima okuti siya vali kokuene.

¹⁹ Puãi ndopo njiya kokuene, nda Suku wa ci panga, kuenje olombangulo viava va lipandiya haivioko ñulĩhisa, te unene wavo.

²⁰ Momo Usoma wa Suku ko limolehaisa lolombangulo, te lunene.

²¹ Vu yongola nye? Njiya kokuene loluhava ale, ele locisola kuenda utima wonjuka?