I VA KORINDO 3 - Embimbiliya - Bíblia Sagrada em Umbundu

¹ Ame puãi, a vamanji, oku popia lene nda la vaku'Espiritu sia ci tẽlẽle, te nda la vakuetimba oloñaña vu Kristu.

² Ndo tekoli lasenjele, halokulia kua kolako, momo ka wa ku tẽleli kuenje lopo ka vu ku tẽla,

³ momo lopo wakuetimba. Momo, osimbu pokati kene pali ukuse luyaki, ka wakuetimbako hẽ? Ka wa tuwili ndomanu?

⁴ Momo, osimbu umue a linga hati, Ame ndukua Paulu, kuenda ukuavo hati, Ame ndukua Apolosi, homanuko?

⁵ Apolosi elie? Paulu elie? Ovo vakuopange, kuenje va talavaya ndeci Ñala a va kundika, omunu omunu, oku u tavisi.

⁶ Ame nda kũla, Apolosi wa tapela, Suku puãi wa kulisa.

⁷ Oco, ndaño u o kũla, ndaño u o tapela, vosi yavo hacimueko, te Suku ukuakukulisa.

⁸ U o kũla lu o tapela va lisoka, kuenje va tambula omunu omunu onima ya sesamela upange waye.

⁹ Etu tulondingupange kumosi la Suku. Ene wupia lia Suku, haene wunjo ya Suku.

¹⁰ Omo nda ci kundikiwa locali ca Suku, oco nda talavayela ndutungi wa loñoloha, oku seveta ociseveto, puãi umue wiñi o tungilako. Vosi, omunu omunu a lunguke ndomo a tungilako.

¹¹ Momo lomue o tẽla oku seveta ociseveto ciñi, te lika eci ca sevetiwa ale cokuti Yesu Kristu.

¹² Nda umue o tungila kociseveto caco ulu, pamue opalata, pamue ovawe a tĩla, pamue oviti, pamue owangu, pamue ovisila viaño,

¹³ upange womanu vosi, omunu omunu, u limbukiwa. Momo eteke liaco li u limbukisa, omo u setekiwa londalu. Ondalu yi seteka upange womunu omunu ndomo u kasi.

¹⁴ Nda upange womunu a tungilako u tumala, omunu waco o tambula onima.

¹⁵ Nda upange womunu u pia, omunu waco o pesela, puãi o popeliwa ndu wa pita vondalu.

¹⁶ Ka wa kũlĩhili okuti ene vunembele ya Suku kuenda okuti Espiritu lia Suku li kasi vokati kene?

¹⁷ Nda umue o nyõla onembele ya Suku, omunu waco Suku u nyõlavo. Momo onembele ya Suku yi kola, kuenje ene, ene vunembele yaco.

¹⁸ Lomue ka ka likembe. Nda umue pokati kene wa soka hati, Ndukualondunge violuali lulo, a linge eveke hã ha lingi ukualondunge viocili.

¹⁹ Omo olondunge violuali lulo ku Suku via soka nduveke. Momo ca sonehiwa okuti, Eye o kuataila vakualondunge pokati kokulunguka kuavo.

²⁰ Kuenda vali hati, Ñala wa kũlĩha ovisimilo via vakualondunge okuti viesanda.

²¹ Oco lomue ka ka lipandele omanu, momo ovina viosi viene.

²² Ndaño Paulu, ndaño Apolosi, ndaño Kefa, ndaño oluali, ndaño omuenyo, ndaño okufa, ndaño ovina via cilo, ndaño evi viya noke, viosi viene.

²³ Ene puãi wa tiami ku Kristu, kuenda Kristu wa tiama ku Suku.