I VA KORINDO 2 - Embimbiliya - Bíblia Sagrada em Umbundu

¹ A vamanji, ame, eci ndeyile kokuene oku sapula elumbu lia Suku ka lia la situluiwa handi, sieyile lolondaka via longa, pamue lolondunge via piãla.

² Momo nda panga okuti, lacimue ñulĩha pokati kene te Yesu Kristu, u wa valeliwa kekulusu.

³ Nda kala pokati kene lokuleñela, lusumba, lokululuma kua lua.

⁴ Upopi wange lokukunda kuange ka kua kaile lolondaka violondunge vioku longola, te lesituluilo lie Espiritu, kuenda unene,

⁵ okuti oco ekolelo liene ka li kala kolondunge viomanu, te kunene wa Suku.

⁶ Haimo lumue, pokati komanu vamako vetavo, tu kunda olondunge via longa, olondunge viaco puãi havioluali luloko, haviolombiali violuali luloko vina vi imoha.

⁷ Tu kunda kunda puãi olondunge via Suku, haivio elumbu lia sitikiwile. Puãi, tunde ka ku ci, Suku wa panga oku tu muisa ulamba lolondunge viaco.

⁸ Cosi eci ka ca lombolokele kolombiali violuali lulo, momo, nda ca vi lombolokele, nda eka via valelele Ñala yulamba kekulusu.

⁹ Puãi ndeci ca sonehiwa okuti, Evi ka via la muiwa liso, ndaño oku yeviwa letui, pamue oku simiwa lutima womunu, levi Suku a angiliyila ava vo sole,

¹⁰ ovio muẽle Suku a tu situluila la Mitakati Espiritu. Momo Espiritu o kũlãhaisa ovina viosi, ndaño vievi via longa via Suku.

¹¹ Helie wa kũlĩha ovisimilo viomunu? Lomue. Espiritu liomunu olio lika lia kũlĩha ovisimilo vi kasi vutima waye. Haicovo ovisimilo via Suku, lomue wa vi kũlĩha te Espiritu lia Suku.

¹² Etu puãi, ka tua tambuile espiritu lioluali, te Espiritu lia tunda ku Suku. Tua li tambuila okuti tu kũlĩha ovina Suku a tu iha ocali.

¹³ Ovina viaco ka tu kunda kunda lolondaka vi longisiwa lolondunge viomanu, te levi vi longisiwa le Espiritu, okuti oku lombolola ovina viocili vi Espiritu, ku vaku'Espiritu.

¹⁴ Ukuetimba ka tambula oviali viEspiritu lia Suku, momo kokuaye vi linga nduveke, kuenje eye ka tẽla oku vi limbuka momo vi limbukiwa lika lolondunge vi'Espiritu.

¹⁵ Uku'Espiritu o tẽla oku kũlĩhisa ovina viosi; eye muẽle, puãi, ndomo a kasi, lomue mu lomboloka.

¹⁶ Kuli ocisonehua ca pula citi, Helie wa kũlĩha ovisimilo via Ñala okuti o tẽla oku u longisa? Etu puãi tu kasi lovisimilo via Kristu.