I TIMOTEO 6 - Embimbiliya - Bíblia Sagrada em Umbundu

¹ Vosi va kasi vomi yupika va sumbile vacime cavo ndava va sesamela esumbilo liosi, okuti onduko ya Suku lovilongua viaco ka vi tombiwa.

² Ava va kuete vacime cavo vakuetavo, ka va ka va tombele omo va linga vamanjavo, puãi va va vumbe ca piãla momo ava va kuatisiwa lupange wavo, vakuetavo, haivo va soliwa. Ovina evi ovio o longisa loku vi sapula.

³ Umue nda o longisa ovilongua vimue viñi, kuenje ka tava kolondaka viocili via Ñala yetu Yesu Kristu lo kovilongua via longisa okutuwa nda Suku,

⁴ ca lomboloka okuti omunu waco wa lituna ño esanda, ka kũlĩhile cimue; o mamõha lolondaka lolomata vi koka onya, lema, loku imbula, lalundi,

⁵ kuenda olonjuela pokati komanu vakuavitima via vĩha, haivo ka va kasi locili, haivo va soka vati, Kokutuwa nda Suku oko ku tunda onganyu ya lua.

⁶ Ocili, ku wa sanjukila oku vumba Suku kuli onganyu ya piãla.

⁷ Momo ka tua nenele cimue voluali, kuenje, oku ambata cimue eci tu tunda, ka tu ci tẽla.

⁸ Nda tu kuete okulia leci tu lisikilĩla ci tu tẽla, kuenje tu sanjuka laco.

⁹ Puãi ava va yongola oku linga olohuasi va kupukila vayonjo, va fa vonjanjo kuenje ya kuatiwa lalivelo uveke, hao a nyõla, kuenje a kokela omanu oku vombisua loku nyõleha.

¹⁰ Momo ocisola coku sola olombongo oco olumbombo luavĩho osi. Vamue oku pindamua laco va yapuka vekolelo, kuenje va litoma lohali ya lua.

¹¹ Puãi ove amunu wa Suku, yuvula ovina evi viosi. Kuama esunga, loku fendela Suku, kuenda ekolelo, locisola, lepandi, kuenda usima,

¹² Yaka uyaki uwa wekolelo. Kuatelela omuenyo ko pui una wa kovongiwila eci wa lekisa etavo liove kovaso olombangi via lua.

¹³ Hu lunguila kovaso a Suku ukuakumuisa omuenyo ovina viosi, lo kovaso a Kristu Yesu una wa imba uvangi uwa wetavo liaye kovaso a Pondio Pilato.

¹⁴ Hu lungula siti, Lava ocihandeleko okuti ka ci kuata etime pamue etondelo toke ketukuluko lia Ñala yetu Yesu Kristu.

¹⁵ Etukuluko liaco liya kotembo ya li sokiyiwila la Suku, eye lika Ukuonene, haeye wa pua atondelo, eye Soma yolosoma haeye Ñala yoloñala.

¹⁶ Eye lika o kasi lomuenyo ko pui, haeye o kala kala vocinyi cina ka ci tava oku amelako. Lomue wa lo mola, lomue o tẽla oku u mola. Kokuaye ku kale esumbilo luviali ka u pui. Amene.

¹⁷ Lungula olohuasi viovina violuali lulo okuti ka vi lipandiya loku kolela ukuasi u pua pua, vi kolele puãi Suku u o tu ihaiha ovina viosi ha tu sanjuka lavio.

¹⁸ Vi lungula okuti vi linga ohenda ha vi kuata ukuasi wovilinga viwa. Vi ecaece lombili ku vakuavo loku va kuatisa,

¹⁹ ha vi liangiliyila ociseveto ciwa cokotembo yi laika oku iya oco vi kuate omuenyo wocili.

²⁰ A Timoteo, lava eci ca kundikiwa kokuove. Yuvula olondaka vietombo, levi viumamõhe, lolonamalala violondunge viesanda.

²¹ Vamue poku sakalala lavio va lipumbisa ekolelo. Ocali ci kale lene.