I TIMOTEO 5 - Embimbiliya - Bíblia Sagrada em Umbundu

¹ Ukulu wendamba ku ko vete evelo lukãlu, puãi u lungula nda so. Lungulavo ikuenjepombo nda vamanjove.

² Ovivenji vi lungula nda vanyõho, lovakãi vamalehe nda vamukãi wove lutima wa yela.

³ Kuatisa ovimbumba via suka ocili.

⁴ Nda kuli ocimbumba ci kuete omãla pamue olonekulu, omãla vaco kuenda olonekulu va lilongise okuti ocikele catete cukuetavo oku kuatisa epata loku tiuwilako olonjali viavo, momo oco ca sunguluka ku Suku.

⁵ Ocimbumba ca suka ocili, haico ca siala ulika, ci lavoka lika ku Suku, kuenje ci pandikisa lapingilo lolohutililo uteke lutanya.

⁶ Ocimbumba ci livela lika oku lisanjuisa ca fa ale ndaño ci kasi lomuenyo.

⁷ Handeleka ovina evi okuti lovimbumba lapata va pua evelo.

⁸ Umue nda ka kuatisa vangandiaye, ca piãla vakuanjo yaye, ca lomboloka okuti wa likala etavo liaye, kuenje u ka tavele wo velapo.

⁹ Ka va ka sonehe ocimbumba okuti ci kuatisiwa te ca tẽla akui epandu kanyamo, kuenda ca kala ukãi wulume umuamue.

¹⁰ Kuenje oku u soneha te omanu vo wimbila uvangi wovilinga viwa, okuti wa tekola omãla vaye, wa poka poka akombe, wa sukola olomãi violosandu, wa kuataisa ava va kala lohali, kuenje wa linga ovina viosi viwa lombili.

¹¹ Puãi ku ka tave oku sonehisa ovimbumba viamalehe, momo, eci oku kala la Kristu ci va kuma, oco va yongola oku kuela,

¹² kuenje va pia momo va sia ohuminyo yavo yatete.

¹³ Kuenda vali, va lilongisa usiãi, va ñuala ñuala kolonjo. Ka va lingi lika usiãi, puãi va lingavo vakualombonde, haivo vakuasiata, va popia ovina ka via sungulukile oku vi popia.

¹⁴ Njongola okuti ovimbumba viamalehe vi kuela, vi cita omãla, kuenje vi songuila ciwa olonjo viavo. Ka vi ka ece kunyali evelo lioku tu vetisa evelo.

¹⁵ Momo vamue va yapukila ale ku Satana.

¹⁶ Nda kuli omunu ukuetavo o kasi lovimbumba vepata liavo, a vi kuatise eye muẽle. Ekongelo ka li ka tuikiwe ocilemo cavio, okuti li tẽla oku kuatisa ovimbumba via suka ocili.

¹⁷ Olondingupange viekongelo vi talavaya ciwa vi sesamela esumbilo loku fetiwa lesunga, ca piãla vava va kunda lava va longisa.

¹⁸ Momo ovisonehua viti, Ku ka kute komẽla wongombe yi sasa olomema, kuenda vali viti, Ukuopange wa sesamela onima yaye.

¹⁹ Ku ka tave kondaka yi pindika ukulu, te lolombangi vivali pamue vitatu.

²⁰ Ava va lingainga ño-o ekandu va vetisila evelo kovaso omanu vosi, oco vakuavo va kuate usumba.

²¹ Hu kundika kovaso a Suku la Kristu Yesu kuenda ovangelo va noliwa okuti o pokola kovihandeleko evi. Ku ka amele omunu. Ka ci tava oku kala locame.

²² Ku ka kape umue ovaka lonjanga. Ku ka linge onyima yakandu omunu ukuavo. Lilava. Pua eko.

²³ Ku ka nyua nyue vali ovava lika, puãi nyua nyua tumue otuvinyu mekonda liovimo liove lolongembia o kala kala lavio.

²⁴ Akandu omanu vamue a moleha lonjanga, okuti a sesamela oku tetuluiwa, a vakuavo puãi a moleha noke.

²⁵ Haico ci kasi lovilinga viwa okuti vi moleha, puãi ndaño ka vi moleha, oku vi vundisa osimbu ka ci tava.