I TIMOTEO 4 - Embimbiliya - Bíblia Sagrada em Umbundu

¹ Cilo Espiritu li popia longusu, halatatahãiko, liti, Kotembo yesulilo vamue va konyoha ketavo ha va yevelela kaspiritu uhembi lo kovilongua vieliapu.

² Ovilongua viaco vi longisiwa lomanu va popia ombambe luhembi, haivo ovitima viavo via momẽla, huti ño, via kakuiwa locivela ca sanya.

³ Va lemela oku kuela. Va handeleka oku likandangiya ovilia evi Suku a lulika okuti vi liwa lolopandu lava va tava haivo va kũlĩha ondaka yocili.

⁴ Momo oviluvo viosi via Suku viwa, kuenje lacimue ci lemeliwa nda ci tambuiwa lolopandu.

⁵ Momo, nda oco, ci kolisua londaka ya Suku kuenda lolohutililo.

⁶ Nda o sapula ovina evi ku vamanji o linga oñuatisi yocili ya Kristu Yesu, haiyo ya tekuiwa lolondaka viekolelo, kuenda lovilongua viocili vina o kuãi.

⁷ Yuvula olosapo viaño, haivio ka via tundile ku Suku. Lipindisa oku tuwa nda Suku.

⁸ Momo okupindisa etimba, ocili, ku silivila, puãi okutuwa nda Suku ku kuatisa kovina viosi, momo ku kuete ohuminyo yokomuenyo ulo, kuenda komuenyo wiyako.

⁹ Ondaka eyi yocili kuenda ya posokela oku taviwa kuoha.

¹⁰ Momo oco ocimãho tua loña, haico tu yakela, momo elavoko lietu li kasi ku Suku o kasi lomuenyo. Eye Upopeli womanu vosi, puãi, ca piãla, wava va kolela.

¹¹ Handeleka ovina evi kuenda vi longisa.

¹² Lomue ka ka ku lavisile utila wove, puãi, kondaka, lo kovilinga, lo kocisola, kuenda kekolelo, lo koku yela, eca ongangu ku vakuetavo.

¹³ Kolisako oku tangela omanu ondaka ya Suku, loku kunda, loku longisa, toke njiya.

¹⁴ Ku ka ekelele ocali ci li vokati kove, cina wa ihiwa lovitumasuku via popiwa eci akulu va ku kapa ovaka.

¹⁵ Kolisako oku lingainga ovina evi. Litumbika muẽle kokuavio, oco vosi va mole okuamako kuove.

¹⁶ Lilava ove muẽle. Lavavo okulongisa kuove. Pandikisa lovina evi, omo, nda o ci linga, o lipopela ove muẽle, o popelavo ava va ku yeva.