I TIMOTEO 3 - Embimbiliya - Bíblia Sagrada em Umbundu

¹ Ondaka yimue ya kolelua yeyi, okuti, nda umue o livela omangu yosungu yekongelo o yongola upange uwa.

² Evi via sesamela u o linga osungu yekongelo, vievi: A pue eko, a linge ulume wukãi umuamue, a lipokuise, a lisuluvike, a linge ukuotate, a sole akombe, a loñolõhe oku longisa,

³ ka ka kolue, ka ka yambule loku veta, a lungule puãi loku unjuka, ka ka hoye, ka ka sole olombongo,

⁴ a songuile ciwa onjo yaye, a pokuise omãla vaye loku va longisa esumbilo.

⁵ Momo omunu nda ka tẽla oku songuila onjo yaye, o lava ndati ekongelo lia Suku?

⁶ U wa tava ndopo heyeko, sanga o lipanda kuenje o fa vepiso lieliapu.

⁷ Kuenda vali wa sesamela uvangi uwa wava ka va tavele, sanga o pembuiwa kuenje o fa vonjanjo yeliapu.

⁸ Oloñuatisi viekongelo laviovo vi kale omanu vakuotate, ka vi ka kale lalimi avali, ka vi ka nyue ovinyu via lua, ka vi ka sokolole enene ofeto.

⁹ Elumbu liekolelo va li lave lutima u yela.

¹⁰ Vi setekiwe tete. Noke, nda vi limbukiwa okuti via pua eko, oco vi linge upange woloñuatisi.

¹¹ Akãi lavovo, va linge vakuotate, ka va ka endise olombonde, ka va ka nyue, va kolelue lovina viosi.

¹² Oloñuatisi viekongelo vi linge alume vukãi umuamue, loku songuila ciwa omãla vavo lolonjo viavo.

¹³ Momo ava va linga ciwa upange woloñuatisi viekongelo va limuisa omangu yi sumbiwa kuenje vamako vekolelo li kasi vu Kristu Yesu.

¹⁴ Ndavoka oku iya ndopo kokuove, puãi ñasi loku ku sonehela ovina evi okuti,

¹⁵ nda nda tumala osimbu, ove o kũlĩha ndeci ca sunguluka oku linga vonjo ya Suku, haiyo ekongelo lia Suku o kasi lomuenyo. Ekongelo liaco olio ongunji yi talamisa Ocili hailio onjaka yaco.

¹⁶ Tua tava okuti, ocili muẽle, okulonga kuondaka yi kola yetavo li koka oku tuwa nda Suku, ku komohisa. Eye wa tukuluisua letimba. Wa tetuluiwa le Espiritu okuti ukuesunga. Wa muiwa lovangelo. Wa sapuiwa ku vakualofeka. Wa taviwa kilu lieve. Wa tambuiwa kilu kulamba.