I TIMOTEO 2 - Embimbiliya - Bíblia Sagrada em Umbundu

¹ Tete minga okuti vu likutilila omanu vosi, loku va lombela, loku va pingilako eci va sukila, loku va panduila.

² Likutilili olosoma, la vosi va kasi kolomangu via velapo, okuti tu kala lomuenyo wonjuka haiwo we yuka ombembua lesunguluko kuenda esumbilo ku Suku.

³ Oco ciwa, haico ca sunguluka ku Suku Upopeli wetu,

⁴ u o yongola okuti omanu vosi va popeliwa ha veya kukũlĩhiso w'Ocili.

⁵ Momo kuli Suku umosi, kulivo Mitakati umosi pokati ka Suku lomanu, eye omunu, Kristu Yesu.

⁶ Eye wa liecela oku yovola omanu vosi. Leci ca imbiwila uvangi eci otembo yaco yeya.

⁷ Lame nda noliwila oku linga ukundi kuenda oku linga upostolo loku linga ulongisi woku longisa vakualofeka ekolelo locili. Mopia ocili, si kembi.

⁸ Oco njongola okuti alume ovo va likutilila kuoha, loku tulika ovaka a kola, halonyeñoko pamue lolonamalala.

⁹ Akãi, ndi va yonguila okuti va liposuisa luwalo wa sunguluka, loku liuvika, loku omboka, halocifuko ca vindiwako, pamue lulu, pamue lolomota via tĩla, pamue lolombinja via tĩla,

¹⁰ te lovilinga viwa, oco ca sungulukila akãi va panga oku vumba Suku.

¹¹ Ukãi a lilongise lusima lepokolo.

¹² Ame si tava okuti ukãi o longisa pamue o viala ulume, caye oku uha.

¹³ Momo Adama eye wa lulikiwa tete, noke Heva.

¹⁴ Adama ka kembiwile, te ukãi eye wa kembiwa, kuenje wa linga ekandu.

¹⁵ Haimo koku cita omãla, oko ku tunda okupopeliwa kukãi nda o liuvika kuenje o pandikisa vekolelo locisola kuenda oku kola.